الماتىدا قازاقستان مەن ورتالىق ازيا ەلدەرىنىڭ جاس كوشباسشىلارىن بىرىكتىرگەن Almaty Youth Forum 2026 حالىقارالىق جاستار فورۋمى وتۋدە. فورۋمنىڭ باستى تاقىرىپتارى – جاساندى ينتەللەكت، كليماتتىق تەحنولوگيالار، تسيفرلىق قاۋىپسىزدىك، ۆولونتەرلىك جانە الەۋمەتتىك يننوۆاتسيالار.

فورۋم حالىقارالىق تۇراقتى دامۋ ماقساتىنداعى ەرىكتىلەر جىلى اياسىندا الماتى قالاسى اكىمدىگىنىڭ، قازاقستانداعى بۇۇ بالالار قورىنىڭ (يۋنيسەف) جانە الماتى قالاسى ۆولونتەرلەر فرونت-ءوفيسىنىڭ ۇيىمداستىرۋىمەن وتۋدە.

«بۇگىندە جاستاردىڭ يدەيالارى ناقتى جوبالارعا اينالىپ، ولاردىڭ باستامالارى مەملەكەت، حالىقارالىق ۇيىمدار مەن بيزنەس تاراپىنان قولداۋ تاباتىن ورتا قالىپتاستىرۋ اسا ماڭىزدى. Almaty Youth Forum قازاقستان مەن ورتالىق ازيا جاستارىن تۇراقتى دامۋ مەن ۆولونتەرلىكتىڭ ورتاق قۇندىلىقتارى توڭىرەگىندە بىرىكتىرەتىن ءدال وسىنداي الاڭعا اينالدى»، – دەدى الماتى قالاسى جاستار ساياساتى باسقارماسىنىڭ باسشىسى ازيز قاجدەنبەك.

ەكى كۇندىك فورۋم باعدارلاماسىندا جاساندى ينتەللەكت، قارجىلىق ساۋاتتىلىق، تۇراقتى دامۋ جانە ينۆەستيتسيالار سالاسىنداعى پانەلدىك پىكىرتالاستار، پراكتيكالىق ۆوركشوپتار مەن ساراپشىلاردىڭ ءسوز سويلەۋى قاراستىرىلعان.

فورۋمنىڭ ماڭىزدى وقيعالارىنىڭ ءبىرى – ءال-فارابي اتىنداعى قازاق ۇلتتىق ۋنيۆەرسيتەتىنىڭ بازاسىندا UNICEF Zhastary Hub ورتالىعىنىڭ قۇرىلاتىنى تۋرالى حابارلانۋى بولدى. يۋنيسەف پەن ۋنيۆەرسيتەت اراسىندا ىنتىماقتاستىق تۋرالى مەموراندۋمعا قول قويىلدى. جاڭا حاب ۆولونتەرلىكتى دامىتۋعا جانە جاستار باستامالارىن قولداۋعا ارنالعان الاڭعا اينالادى.

باعدارلامادا جاستار جوبالارىنىڭ كورمەسىنە دە ەرەكشە ورىن بەرىلدى. قازاقستان مەن قىرعىزستاننان كەلىپ تۇسكەن 211 ءوتىنىمنىڭ ىشىنەن 29 باستاما فينالعا ءوتتى. ولاردىڭ قاتارىندا جاساندى ينتەللەكت پەن سپۋتنيكتىك دەرەكتەردى پايدالانا وتىرىپ، مۇزدىق كولدەردىڭ جارىلۋ قاۋپىن الدىن الا ەسكەرتۋگە ارنالعان GLOFcast جۇيەسى، وندىرىستىك كاسىپورىندارداعى قاۋىپسىزدىكتى ارتتىرۋعا باعىتتالعان Samruq.AI جوباسى جانە اۆتوكولىكتەردەن شىعاتىن زياندى قالدىقتاردى ازايتۋعا ارنالعان EcoTube جوباسى بار.

11 تامىزدا فورۋم Almaty Museum of Arts-پەن سەرىكتەستىكتە جالعاسادى. قاتىسۋشىلاردى شىعارماشىلىق سەسسيالار، پىكىرتالاستار جانە جاستار جوبالارى بايقاۋىنىڭ فينالى كۇتەدى. ون كوماندا ءوز ازىرلەمەلەرىن ساراپشىلار القاسىنا تانىستىرادى، ال ۇزدىك جوبالار باستامالارىن ودان ءارى دامىتۋ ءۇشىن مەنتورلىق قولداۋعا يە بولادى.

Abai.kz