21 اقپاندا قازاقستانىڭ باس اسكەري پروكۋراتۋراسى جامبىل وبلىسىنداعى ءشولدالا شەكارا زاستاۆاسىندا اسىلىپ قايتىس بولعان بەكبول ميراشتىڭ سەكسۋالدى زورلىق كورگەنى تۋرالى مالىمەت راستالماعانىن حابارلادى. اسكەري پروكۋراتۋرانىڭ حابارىندا «ساربازدى ءوز-وزىنە قول سالۋعا دەيىن جەتكىزدى» دەگەن كۇدىكپەن اتالعان زاستاۆانىڭ اسكەري قىزمەتكەرى تەرگەلىپ جاتقانى، كۇدىكتىنىڭ بەكبول ميراشتى دا، باسقا ساربازداردى دا ۇنەمى ۇرىپ-سوعىپ، قورلاعانى ايتىلدى.

وتكەن ايدا قاماۋداعى كۇدىكتىنىڭ ادۆاكاتى پىراليەۆ «ولگەن شەكاراشى سەكسۋالدى زورلىق پەن بوپساعا ۇشىراعان» دەپ مالىمدەگەن ەدى. ساراپتاما ناتيجەسىن العا تارتقان ادۆوكات ساربازدىڭ اۋزى مەن ىشكيىمىنەن بىرنەشە ەر ادامنىڭ بيوماتەريالى تابىلعانىن حابارلاعان. وسىدان كەيىن ىشكى ىستەر مينيسترلىگى «ادۆوكات ەتيكانى بۇزدى»، «شىندىققا ساي كەلمەيتىن تۇجىرىم ويلاپ تاپتى» دەپ ايىپتادى. قازاقستانىڭ باس اسكەري پروكۋراتۋراسى ادۆوكات سەرجان پىراليەۆتىڭ ارەكەتىن ارنايى قاراستىراتىنىن مالىمدەدى.

پىراليەۆكە بولىسقان تانىمال ادۆوكات ابزال قۇسپان اسكەري سوتتىڭ – قازاقستانداعى ەڭ ادىلەتسىز سوت ەكەنىن العا تارتىپ، بارماق باستى، كوز قىستىلىقپەن قوزعالعان ءىستى قالاي جاباتىنىن جايىپ سالعان ەدى. ابزالدىڭ ايتقانى ايداي كەلگەندەي.

اسكەري سالاداعى جىنىستىق زورلىق داۋى ءبىر بۇل ەمەس، بىلتىر ءبىر ايەل ازاماتشا ءوزى اسكەري مىندەت وتەگەن مەزگىلدە جەتەكشىلەرىنەن جىنىستىق ءزابىر كورگەنىن ايتىپ شاعىنعان. ول ءىس تە وسى جولعىداي «فاكتى راستالمادى» دەلىنىپ، جىلى جابىلعان. قازاقستاندا جاسوسپىرىمدەردىڭ جىنىستىق زورلىق قۇربانىنا اينالعانىنا كوز كورىپ، قۇلاق ۇيرەنگەلى قاشان. الماتىدا جەكە مەنشىك گيمنازيادا كومپيۋتەرمەن ءبىلىم يگەرۋدىڭ ورنىنا پورنو ۆيدەو كورۋدى ادەتكە اينالدىرعان وقۋشىلاردىڭ ارەكەتى جۇرتتىڭ جاعاسىن ۇستاتسا، كۇنى كەشە جاركەنتتە وقۋشى قىزدى زورلاپ، ارتىنان جۇرەگىنە ءۇش رەت پىشاق سۇعىپ، ءمايىتىن ورتەپ قىلمىسىن جاسىرماق بولعان دانىككەن ازعىن ءومىر بويى باس بوستاندىعىنان ايىرۋ جازاسىنا كەسىلدى.

جىنىستىق زورلىق كوپتەن بەرى دەپۋتاتتار مەن قوعام بەلسەندىلەرىنىڭ ەڭ كوپ قاۋزايتىن تاقىرىبىنا اينالدى. بەلگىلى كومپوزيتور قالدىبەك قۇرمانالى: «ەسترادا دا جۇرگەن قىزداردىڭ 90 پايىزى جەزوكشە» دەپ قويىپ قالعاندا ءۇنسىز قالعانبىز. كوگىلدىر ەكراننان تۇسپەيتىن پسيحولوگ ايدا حانىم: «اباي دا سۋىق جۇرىسكە سالىنعان»، دەپتى دەگەن قاڭقۋ ءسوزدى ەستىگەندە كىرەرگە تەسىك تاپپاي قىنجىلعانبىز. ادۆوكات پىراليەۆ جاريا ەتكەن سۇمدىقتىڭ قاسىندا ولاردىڭ سوزدەرى «قىز جىبەك سوندا كويلەگىن، بەلدەن جوعارى تۇرەدى» دەگەن سياقتى جاي ەروتيكا، قىزىل ءتىلدىڭ قىلمىڭى بولىپ قالدى.

ادۆوكات سەرجان پىراليەۆ پروكۋراتۋرانىڭ قورتىندىسىمەن مۇلدە كەلىسپەيتىنىن جەتكىزدى. ونىڭ ايتۋىنشا، «سەكسۋالدى زورلىق كورگەنى راستالمادى» دەۋ ءۇشىن مولەكۋلالىق-گەنەتيكالىق ساراپتاما قورىتىندىسى تولىق شىعۋى كەرەك، تەرگەۋ ءبىتۋى كەرەك. بىراق ءالى ەشقايسىسى اياعىنا جەتپەگەن.

«بۇعان دەيىن جاسالعان مولەكۋلالىق-گەنەتيكالىق ءتورت ساراپتاما قورىتىندىسىن قايدا جىبەرەدى؟ سوندا شۇلعاۋى مەن اياقكيىمىنەن باسقا جەرىنىڭ بارىنەن (اۋزى، ىشكيىمى) تابىلعان شاۋەتتى قايدا جىبەردى؟ ەكى نە ودان دا كوپ ەر ادامنىڭ دنق-سى تابىلدى، سونىڭ كىمگە تيەسىلى ەكەنىن ىزدەپ جاتىر. شەكارا زاستاۆاسىندا 88 اسكەري قىزمەتكەر بولعان. ولارعا دا ساراپتاما تاعايىندادى. 17 اقپاندا سول زاستاۆادا تاعى ينجەنەرلىك ساپەر روتاسىنىڭ 42 جاۋىنگەرى جاتقانىن ءبىلدىم. ولارعا دا مولەكۋلالىق-گەنەتيكالىق ساراپتاما جاسالىپ جاتىر»، - دەپتى پىراليەۆ ازاتتىققا.

ال جابىرلەنۋشى تاراپتىڭ ادۆوكاتى ايمان وماروۆا دا باس اسكەري پروكۋراتۋرانىڭ مالىمدەمەسىمەن كەلىسپەيدى.

- [اسكەري پروكۋراتۋرا] سوت ساراپتاماسىنىڭ ەشقانداي قورىتىندىسى شىقپاي جاتىپ «زورلىق-زومبىلىق بولعان جوق» دەپ تۇر. سوندا ولارعا قالاي سەنەمىز؟ [اسكەري پروكۋراتۋرا] وبەكتيۆتى بولۋى كەرەك، تەرگەۋ دە ءادىل بولۋى كەرەك. ولار تەرگەۋ بىتپەي جاتىپ وسىلاي دەپ وتىر. ەندى ولار ءىستى سوتقا «زورلىق-زومبىلىق بولمادى» دەپ جازدىرىپ جىبەرەدى دەپ ويلايمىن، - دەيدى وماروۆا.

كوپتىڭ قولداۋىنا يە بولعان ايگىلى ادۆوكاتتار انتىنا ادال بولىپ، قوعام نازارىن اۋدارعان ءىستى سوڭىنا دەيىن جەتكىزەدى دەگەن سەنىم بار. ويتپەگەندە قوعامدى جايلاعان سەكسۋالدىق ىندەتتىڭ تامىرى تەرەڭگە تارتا بەرەرى ءسوزسىز.

ەسبول ۇسەنۇلى

Abai.kz