قورعانىس ءمينيسترىنىڭ ورىنباسارى سۇلتان قامالەتدينوۆ قازاقستاننىڭ ۋكرايناداعى سوعىستى باقىلاپ وتىرعانىن، ول بويىنشا ءتيىستى قورىتىندى جاسالاتىنىن ايتتى، دەپ حابارلادى Halyq Uni.

«ارينە، بارلىق مەملەكەتتىڭ قارۋلى كۇشتەرى (ۋكرايناداعى سوعىسقا، – اۆتور) تالداۋ جاساپ، اسكەري قيمىلداردىڭ قالاي ءجۇرىپ جاتقانىن باقىلايدى. ءتيىستى قورىتىندى شىعارىلادى. ءبىر-بىرىنە ۇقساس قارۋلى قاقتىعىس بولمايدى، ارقايسىسىنىڭ ءوز ەرەكشەلىگى بار. سوندىقتان ءبىز (ۋكرايناداعى سوعىستى، – اۆتور) تالداپ، ءتيىستى قورىتىندى شىعارامىز. (قازاقستان قارۋلى كۇشتەرىنىڭ، – اۆتور) جاۋىنگەرلىك دايىندىق باعدارلاماسىنا تۇزەتۋ ەنگىزەمىز»، - دەدى ۆيتسە-مينيستر سەناتتىڭ جالپى وتىرىسىنان سوڭ.

سۇلتان قامالەتدينوۆ ۋكرايناداعى سوعىستان كەيىن قازاقستان اسكەرى دايىندىعىنا قانداي وزگەرىستەر ەنگىزىلگەنىنە دە توقتالدى.

«بىرىنشىدەن، ءبىز ۇشقىشسىز ۇشۋ اپپاراتتارىنىڭ (دروندار) وپەراتورلارىمەن جيىن وتكىزىپ، مۇقيات دايىندىقتى باستادىق. سەبەبى بۇل اسكەري كونفليكتىدە ۇشقىشسىز ۇشۋ اپپاراتتارى بارلاۋدا جانە شابۋىل جاساۋدا قولدانىلىپ جاتىر. ەكىنشىدەن، ارتيللەريا. زىمىران اسكەرلەرىنىڭ ءجيى قولدانىلاتىن جاۋىنگەرلىك دايىندىعىنا دا باسىمدىق بەرىلەتىن بولدى»، - دەدى ءمينيستردىڭ ورىنباسارى.

Abai.kz