قازاقستاندا گاز قورى جەتكىلىكتى. بۇل تۋرالى «QazaqGaz» ۇك» اق باسقارما توراعاسىنىڭ ماركەتينگ جونىندەگى ورىنباسارى ارمان قاسەنوۆ ايتتى. 

«قازاقستاندا گاز قورى جەتكىلىكتى، ياعني 3,8 ترلن تەكشە مەتر شاماسىندا. ەگەر تاۋارلىق گازدى تۇتىنۋ شامامەن 25 ملرد تەكشە مەتر ەكەنىن ەسكەرسەك، گاز قورى 100 جىلعا ارتىعىمەن جەتەتىنىن ەسەپتەۋگە بولادى»، - دەدى ا. قاسەنوۆ ەلوردادا وتكەن قوعامدىق كەڭەس جيىنىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، قازىرگى كەزدە گاز وڭدەۋ ءىس-قيمىلدارىن ىنتالاندىرۋعا ءمان بەرۋ كەرەك.

«بۇگىن ءبىز قوعامدىق كەڭەستە وڭدەۋ ماسەلەسىن تالقىلاپ، ىشكى نارىقتاعى شىعىنىمىزدى كورسەتتىك. جالپى، جەر قويناۋىن پايدالانۋشىلارعا گاز ءۇشىن ءادىل باعا ۇسىنۋىمىز كەرەك. وسى ورايدا، ولار شيكى گازدى وڭدەۋدىڭ ءتيىستى كولەمىن شىعارا الماي جاتىر»، - دەدى QazaqGaz وكىلى.

بۇدان بۇرىن حابارلانعانداي، QazaqGaz ءىرى كوممەرتسيالىق ۇيىمدار مەن ماينەرلەرگە گازدى قىمبات باعامەن بەرۋدى سۇرادى. ارمان قاسەنوۆتىڭ ايتۋىنشا، گاز باعاسىنىڭ ارزان بولۋىنان ۇلتتىق وپەراتور شىعىنعا ۇشىراپ جاتىر.

Abai.kz