رەسپۋبليكالىق ماڭىزى بار جولداردىڭ 396 ۋچاسكەسىندە سۋ تاسقىنىنىڭ قاۋپى بار. بۇل تۋرالى يندۋستريا جانە ينفراقۇرىلىمدىق دامۋ ءمينيسترى مارات قاراباەۆ ايتتى.

«رەسپۋبليكالىق جولداردىڭ ۇزىندىعى 25 مىڭ شاقىرىمدى قۇرايدى، تەكسەرۋلەردىڭ ناتيجەلەرى بويىنشا اقپان ايىندا 396 قاۋىپتى ۋچاسكى، 68 كوپىر مەن 768 سۋ وتكىزگىش قۇبىرلار انىقتالدى. وسى نىساندارعا 700-دەن استام جول-پايدالانۋ تەحنيكالارى بەكىتىلدى. سۋ تاسقىنىنا قارسى ءىس-شارالاردى ۋاقتىلى قامتاماسىز ەتۋ ءۇشىن بارلىق قاۋىپتى ۋچاسكەلەردە تاۋلىك بويى كەزەكشىلىك پەن كۇندەلىكتى قاراۋ جۇرگىزىلۋدە»، - دەدى ول.

ءمينيستردىڭ مالىمەتى بويىنشا، سۋ تاسقىنى قاۋپىن جويۋ ءۇشىن بارلىق قاجەتتى ينەرتتى جانە باسقا دا ماتەريالدار تولىق كولەمدە دايىندالعان.

«20 مىڭ تەكشە مەتر قۇم، 6 مىڭ تەكشە مەتر تاۋ تاس، 8 مىڭ تەكشە مەتر قيىرشىق تاس، 18 مىڭ تەكشە مەتر قۇم-قيىرشىق تاس جانە 125 مىڭ دانا قۇم سالىنعان قاپ دايىندالدى. قازىرگى تاڭدا وڭتۇستىك وڭىرلەردە بارلىق سۋ وتكىزگىش قۇبىرلار تاسقىن جانە ەرىگەن سۋلاردىڭ ءوتۋىن قامتاماسىز ەتۋدە، سولتۇستىك وڭىرلەردە اۋا رايى جاعدايىنا بايلانىستى 5 مىڭ 742 سۋ وتكىزگىش قۇبىرلارىنىڭ ساڭىلاۋلارىن اشۋ مەن قاردان تازارتۋ جۇمىستارى باستالدى»، - دەدى مارات قاراباەۆ.

Abai.kz