قازاقستان حالقى اسسامبلەياسى قوعامدا بولىپ جاتقان جايتتارعا ەشقاشان بەي-جاي قاراعان ەمەس. ۇيىم ۇنەمى ازاماتتىق ۇستانىمىن ءبىلدىرىپ وتىرادى. سونىڭ ءبىرى ەل-جۇرتتى ءدۇر سىلكىندىرگەن، تۇركيا مەملەكەتىندە تاياۋدا بولعان جويقىن جەر سىلكىنىسى. سوعان وراي اسسامبلەيا اتىنان «احىسكا» تۇرىك ەتنومادەني بىرلەستىگى گۋمانيتارلىق كومەك ۇيىمداستىردى.

اپاتتى وقيعادان قان جۇتىپ وتىرعان باۋىرلاس تۇرىك حالقىنا قازاقستاندىقتار، ەتنومادەني بىرلەستىكتەردىڭ وكىلدەرى جانە قازاقستان حالقى اسسامبلەياسىنىڭ مۇشەلەرى وقيعانىڭ العاشقى كۇندەرىنەن باستاپ تۇركيا ەلىنىڭ حالقىنا گۋمانيتارلىق كومەك جيناۋعا دەرەۋ كىرىسكەن بولاتىن.

العاشقى كۇندەرى قازاقستان حالقى اسسامبەلياسىنىڭ ەتنومادەني بىرلەستىكتەرى  تۇركيانىڭ زارداپ شەككەن قالالارىنا 28 ملن تەڭگە كولەمىندە قارجىلاي كومەك، سونىمەن قاتار 34 ملن تەڭگەدەن استام اقشاعا العاشقى قاجەتتىلىك تاۋارلارىن جيناپ، جىبەردى.

سونداي-اق، «احىسكا» تۇرىكتەر بىرلەستىگىنىڭ توراعاسى ماحمۋدجون ميراددينۇلى داۆريشەۆتىڭ ايتۋىنشا، ايماقتىق ەتنومادەني بىرلەستىكتەرى، قحا مۇشەلەرى، مەتسەناتتار، ءدىني بىرلەستىكتەردىڭ وكىلدەرى، اۋداندار، جالپى جۇرتشىلىق اتسالىسۋىمەن جامبىل وبلىسىنان 84 ملن 400 مىڭ تەڭگە قارجىلاي، 24 فۋرا 480 مىڭ توننا ازىق-تۇلىك جانە العاشقى قاجەتتىلىكتەگى قۇرالدار جينالعان.

ۇيلەستىرۋشىلەر كومەگىمەن ونىڭ 4 فۋراسى – سيرياعا، 20 فۋراسى – تۇركياعا جونەلتىلىپ، ال جينالعان قاراجات كومەك دۇنيەجۇزىلىك تۇرىك-احىسكا قاۋىمداستىعىنىڭ (DATÜB) ارنايى شوتىنا جىبەرىلگەن.

مۇنىڭ ءبارى 26 اقپاندا تاراز قالاسىندا «احىسكا» تۇرىكتەر ەتنومادەني بىرلەستىگىنىڭ ۇيىمداستىرۋىمەن وتكەن «كۇشىمىز بىرلىكتە» ءىس-شاراسى ۇستىندە ايتىلدى. ءىس-شارا قايىرىمدىلىق اس بەرۋ فورماتىندا وتكىزىلدى.

جيىنعا وبلىس، قالا اكىمدىگى، وبلىستىق، قالالىق ىشكى ساياسات باسقارماسىنىڭ وكىلدەرى، وڭىرلىك قازاقستان حالقى اسسامبلەياسى مەن ەتنومادەني بىرلەستىگىنىڭ مۇشەلەرى، ءبىلىم، سپورت سالاسى قىزمەتكەرلەرى مەن قوعام قايراتكەرلەرى، ءدىن وكىلدەرى مەن باق تىلشىلەرى جانە اسسامبلەيا جاستارى قاتىستى.

شاھارداعى ەتنوس وكىلدەرى – ەتنوسارالىق دوستىقتى ساقتاۋ، وسكەلەڭ ۇرپاقتىڭ بويىنا ءپاتريوتيزمدى دارىتۋ، مادەني جانە تاريحي مۇرالارىمىزدى ولارعا اماناتتاۋ، قايىرىمدىلىق ىستەرىندە ءوز ميسسياسىن لايىقتى ورىندايتىن جاندار. سونىمەن قاتار، بىرلىكتى، ەتنوسارالىق جانە دىنارالىق كەلىسىمدى نىعايتۋعا دا باعا جەتپەس ۇلەس قوسۋدا. سولاردىڭ بىرەگەيى بۇگىندە – «احىسكا» تۇرىك ەتنومادەني ورتالىعى بولىپ وتىر.

شارا بارىسىندا وبلىسقا بەلگىلى بىرقاتار ازاماتتار اپاتتى ايماققا قول ۇشىن بەرگەندەرگە العىسىن ءبىلدىردى. ولاردىڭ قاتارىندا «قوعامدىق كەلىسىم» مەكەمەسىنىڭ باسشىسى مۇباراك قاسىمقىزى دا ايماقتىق اسسامبلەيا اتىنان ءوز تىلەك-راحمەتىن ايتتى.

«احىسكا» تۇرىكتەر بىرلەستىگىنىڭ توراعاسى ماحمۋدجون ميراددينۇلى داۆريشەۆ:

«مەن بارشا جاماعاتقا زور راحمەتىمدى ايتامىن! باۋىرلاستىقتارىڭىزعا مىڭ العىس! اۋىزبىرشىلىگىمىز نىعايا ءتۇسسىن، اعايىن! الاپات ءزىلزالا، پالە-جالادان قازاقستانىمىز امان بولسىن! اسىمىز قابىل بولسىن!» - دەپ ەرەكشە ىستىق ىقىلاسپەن ءوزىنىڭ جۇرەكجاردى تىلەگىن ءبىلدىردى.

500 ادامعا دايىندالعان قايىرىمدىلىق اسىنىڭ ماقساتى دا كومەگىن اياماي، قولۇشىن بەرگەن جاندارعا العىس ايتۋ كۇنىنىڭ قارساڭىندا ريزاشىلىق ءبىلدىرۋ جانە اپاتتا شەيىت بولعاندارعا قۇران باعىشتاۋ، امانشىلىققا دۇعا ەتۋ بولاتىن.

ايتا كەتەيىك، اقپاننىڭ ايىنىڭ باسىندا تۇركيا مەن سيريادا بولعان 7,8 بالدىق جويقىن ءزىلزالا 50 مىڭعا جۋىق ادامنىڭ ءومىرىن قيدى، 23 ميلليونعا جۋىق ادام زارداپ شەكتى.

سول كەزدە الەم ەلدەرىمەن قاتار قازاقستان دا تۇرىك ەلىنە كومەك قولىن سوزۋدان قاپى قالمادى. مەملەكەت باسشىسىنىڭ تاپسىرماسىنا سايكەس تۇركيا رەسپۋبليكاسىنا گۋمانيتارلىق كومەك رەتىندە $1 ملن اۋداردى. سونىمەن قاتار جالپى سالماعى شامامەن 55 توننا بولاتىن كيىم-كەشەك (جىلى كۇرتەشەلەر مەن شالبارلار), قىسقى شاتىرلار، مەتالل كەرەۋەتتەر، توسەك-ورىن جابدىقتارى جانە باسقا دا كۇندەلىكتى قولدانىسقا قاجەتتى زاتتار گۋمانيتارلىق كومەك رەتىندە جىبەرىلدى.

قازاقستاندىقتاردىڭ تۇركياداعى جويقىن ءزىلزالادان زارداپ شەككەندەرگە 3,6 ملن دوللاردان استام قاراجات جيناپ بەردى.

«جەر سىلكىنىسىنەن زارداپ شەككەندەرگە ارنالعان كومەك شوتىنا بۇگىن قازاقستاندا جينالعان 216 مىڭ اقش دوللارى AFAD-تىڭ (تۇركيانىڭ توتەنشە جاعدايلار باسقارماسى – رەد.) رەسمي شوتىنا اۋدارىلدى. وسىلايشا، قايىرىمدىلىقتىڭ جالپى كولەمى 3 ملن 616 مىڭ اقش دوللارىن قۇرادى»، - دەلىنگەن تۇركيا ەلشىلىگىنىڭ 16 اقپانداعى مالىمەتىندە.

سونداي-اق باسپاناسىز قالعاندارعا قازاقستان تاراپىنان جالپى سانى 100-گە جۋىق كيىز ءۇي جەتكىزىلدى. ەلىمىزدىڭ قۇتقارۋشىلارى تۇركياعا اتتانىپ، 7 ادامدى قۇتقارىپ، 88 ادامنىڭ مۇردەسىن ءۇيىندى استىنان شىعاردى. 19 اقپاندا ولار جۇمىستارىن اياقتاپ، ەلگە ورالعان بولاتىن.

Abai.kz