وسى كۇندەرى شىمكەنت قالاسىندا جاراتىلىستانۋ-ماتەماتيكا پاندەرى بويىنشا رەسپۋبليكالىق وليمپيادا ءوتىپ جاتىر. بالالاردىڭ استان ۋلانىپ قالعانى جونىندە الەۋمەتتىك جەلىلەردە جازىلۋدا. شاعىمدارعا «دارىن» رەسپۋبليكالىق عىلىمي-پراكتيكالىق ورتالىعى دا، وقۋ-اعارتۋ مينيسترلىگى دە جاۋاپ بەردى، دەپ حابارلايدى Ulysmedia.kz.

«21 ناۋرىز كۇنى وليمپيادانىڭ 904 قاتىسۋشىسىنىڭ 12-سىندە دەنە قىزۋىنىڭ كوتەرىلۋى، اسقازان-ىشەك جولدارى قىزمەتىنىڭ بۇزىلۋى تۇرىندە سىرقات بەلگىلەرى پايدا بولدى. شاقىرىلعان جەدەل جاردەمنىڭ مەديتسينا ماماندارى قاراپ شىققاننان كەيىن بالالاردى شىمكەنت قالاسىنىڭ ينفەكتسيالىق اۋرۋحاناسىنا جەتكىزۋ شەشىمى قابىلداندى.

قازىرگى ۋاقىتتا بالالاردىڭ جاعدايى تۇراقتالدى. شىمكەنت قالاسىنىڭ سانيتاريالىق-باقىلاۋ قىزمەتى بولعان وقيعانىڭ سەبەبىن انىقتاۋ شارالارىن جۇرگىزىپ جاتىر. بالالار مەديتسينا ماماندارىنىڭ باقىلاۋىندا. وليمپيادانىڭ ۇيىمداستىرۋ كوميتەتى اتالعان قاتىسۋشىلارعا پسيحولوگيالىق كومەك كورسەتۋدە»، - دەلىنگەن «دارىن» ورتالىعىنىڭ رەسمي مالىمەتىندە.

اتاپ وتىلگەندەي، وليمپيادانىڭ ەكىنشى كەزەڭى بەلگىلەنگەن ۋاقىتتا باستالعان. اۋرۋحانادا جاتقان 12 وقۋشى وعان قاتىسا المادى.

«دەگەنمەن دە، وقۋشىلاردىڭ وليمپادانىڭ قورىتىندى كەزەڭىنە جولداما الۋى تاڭداعان ءپانى بويىنشا ولاردىڭ جوعارى دايىندىعىن كورسەتىپ وتىر. وليمپيادانى ۇيىمداستىرۋ كوميتەتى جەڭىسكە دەگەن جىگەرى ءۇشىن بالالارعا العىس ايتادى جانە وليمپيادا ناتيجەسى بويىنشا ولار ىنتىلاندىرىلاتىن بولادى»، - دەدى ورتالىقتان.

ال مينيسترلىكتىڭ مالىمەتىنە سۇيەنسەك، وقيعانىڭ ءمان-جايىن انىقتاۋ ءۇشىن شىمكەنتكە ۆيتسە-مينيستر باستاعان دەلەگاتسيا اتتانىپ كەتتى.

«وقۋ-اعارتۋ ءمينيسترىنىڭ تاپسىرماسىمەن ۆيتسە-مينيستر شولپان كارينوۆا، ورتا ءبىلىم بەرۋ كوميتەتى توراعاسىنىڭ ورىنباسارى، بالالار قۇقىعىن قورعاۋ كوميتەتىنىڭ توراعاسى باستاعان جۇمىس توبى سول جەرگە اتتانىپ كەتتى (...) جۇمىس توبى ءاربىر ماسەلەنى مۇقيات تەكسەرەتىن بولادى. جاعداي وقۋ-اعارتۋ مينيسترلىگىنىڭ جەكە باقىلاۋىندا»، - دەلىنگەن ءمينيستردىڭ ءباسپاسوز حاتشىسى مەرەكە نۇرمۇحانوۆانىڭ Facebook-پايدالانۋشىسىنا بەرگەن جاۋابىندا.

Abai.kz