پرەمەر-مينيستر ءاليحان سمايىلوۆتىڭ توراعالىعىمەن وتكەن كەڭەستە ەنەرگەتيكا مينيسترلىگى، «سامۇرىق-قازىنا» قورى جانە «قازمۇنايگاز» ۇلتتىق كومپانياسى باسشىلارىنىڭ قاتىسۋىمەن قازاقستاننىڭ ەنەرگەتيكا سالاسىن دامىتۋدىڭ وزەكتى ماسەلەلەرى قارالدى.

بۇل تۋرالى ۇكىمەت باسشىسىنىڭ ءباسپاسوز قىزمەتى حابارلادى.

اتاپ ايتقاندا، ءىرى حالىقارالىق ينۆەستورلاردى تارتۋ، جاڭا ەنەرگيا ءوندىرۋشى قۋاتتاردى (جىلۋ، ەلەكتر ەنەرگياسى) ىسكە قوسۋ، جاڭارتىلاتىن ەنەرگيا كوزدەرىن دامىتۋ جانە ينجەنەرلىك ينفراقۇرىلىمدى جاڭعىرتۋ جونىندەگى جوسپارلار تالقىلاندى.

سونىمەن قاتار كەڭەسكە قاتىسۋشىلار ىشكى نارىقتى جانار-جاعارماي ماتەريالدارىمەن قامتاماسىز ەتۋ شارالارىن قاراستىردى.

I توقساندا بەنزين، ديزەل وتىنى جانە سۇيىتىلعان گاز ءوندىرىسى بەكىتىلگەن جوسپاردان اسىپ ءتۇستى. اتاپ ايتقاندا، ديزەل وتىنىنىڭ قورى 1 قاڭتاردان 1 ناۋرىزعا دەيىن 241 مىڭ توننادان 326 مىڭ تونناعا دەيىن ۇلعايتىلدى.

قازىرگى ۋاقىتتا جانار-جاعارماي ماتەريالدارى ءبىرىنشى كەزەكتە ەگىس جۇمىستارىن جۇرگىزۋ ءۇشىن اۋىل شارۋاشىلىعى تاۋارىن وندىرۋشىلەرگە، سودان كەيىن جانارماي قۇيۋ ستانتسيالارى مەن الەۋمەتتىك ماڭىزى بار كاسىپورىندارعا جىبەرىلەدى.

وعان قوسا، كەيبىر وڭىردە تۇتىنۋ دەڭگەيىنىڭ وتە جوعارى بولۋىنا بايلانىستى وتىن جەتىسپەي جاتادى. وسىعان بايلانىستى ەنەرگەتيكا مينيسترلىگى قاجەتتى قوردى تولىقتىرۋ بويىنشا شارالار قابىلداپ جاتىر.

بۇدان باسقا ورتا مەرزىمدى جانە ۇزاق مەرزىمدى پەرسپەكتيۆادا وتىن ءوندىرۋ مەن تۇتىنۋ بالانسىن ەسكەرە وتىرىپ، گاز سالاسىن دامىتۋدىڭ وزەكتى ماسەلەلەرى قوزعالدى.

Abai.kz