ءبىرمانداتتى وكرۋگتەر بويىنشا ءماجىلىس دەپۋتاتتىعىنا سايلاۋعا تۇسكەن كانديدات، ساياساتكەر رىسبەك سارسەنباي وتكەن سايلاۋدىڭ ادىلەتسىز وتكەنىن ايتتى. بۇل تۋرالى ۇمىتكەر ءوز پىكىرىن «Dات» باسىلىمىنا جاريالادى.

«مەن، پارلامەنت ءماجىلىسىنىڭ دەپۋتاتتىعىنا الماتى وبلىسىنداعى № 11 سايلاۋ وكرۋگى بويىنشا كانديدات سارسەنباي رىسبەك، 2023 جىلعى 19 ناۋرىزداعى سايلاۋعا بايلانىستى كوپشىلىككە تومەندەگى جاعدايدى مالىمدەيمىن.

كەزەكتەن تىس سايلاۋ كەزەكتى ۇرلىقپەن، قاراۋلىقپەن، زاڭسىزدىقپەن ءوتتى. بۇعان قازاقستان بويىنشا دالەلدەر جەتكىلىكتى.

بۇل وكرۋگتەگى تەڭسىزدىك سايلاۋشىلارمەن كەزدەسۋ كەزىندە اكىمدىكتەردىڭ بەلگىلى ءبىر كانديداتتىڭ شاشباۋىن كوتەرىپ، قولايلى عيماراتتار ءبولىپ، ادامدار جيناپ بەرۋىنەن باستالدى. داۋىس بەرۋگە قاتىسۋشىلاردىڭ سانىن قولدان كوبەيتتى. ونى «امانات» پارتياسى مەن بيلىكتىڭ ءوزى قالاعان كانديداتتىڭ پايداسىنا ءبولدى.

وبلىستا سايلاۋعا قاتىسۋشىلاردىڭ نەگىزگى كورسەتكىشى 10–18 پايىز كولەمىندە بولدى. الايدا قوناەۆ قالاسىنداعى، تالعار اۋداندارىنداعى كەيبىر سايلاۋ ۋچاسكەلەرى بيۋللەتەن الدى دەگەندەردىڭ كورسەتكىشىن 65-تەن 96 پايىزعا دەيىن ءوسىرىپ كورسەتتى. سوعان سايكەس، بيلىك جاقتاسقان كانديداتۋراعا داۋىس بەرگەندەردىڭ سانى اسپانعا شىقتى. قوناەۆ قالاسىنداعى اۋرۋحانانىڭ، اسكەري بولىمدەردىڭ 100 پايىزى تەك ءبىر عانا كانديداتقا قولداۋ تانىتقانى تاڭدانارلىق ءجايت. بۇل قالا بويىنشا بارلىق سايلاۋشىلاردىڭ سانى 48 502, ال داۋىس بەرۋگە قاتىستى دەلىنگەنى – 21 900. ناقتىلى داۋىس بەرۋشىلەردىڭ سانى 10 870 ادام.

قۇزىرلى كوميسسيا 11 030 «ءولى جاندى» ساناققا قوسقان. سول ارقىلى ماعان قارسىلاس جاساعان ادامىنىڭ، بيلىك پارتياسى جاقتاستارىن رەكوردتىق مولشەردە كوبەيتكەن. وسىنداي تولىپ جاتقان قولدان جاسالعان كورسەتكىشتەر، بۇرمالاۋشىلىقتار – جوعارىدان تۇسكەن تاپسىرما، نۇسقاۋدىڭ سالدارى ەكەنى داۋسىز.

11-وكرۋگتىك سايلاۋ كوميسسياسىنىڭ ءتورايىمى ءاميروۆا ءماجىلىس دەپۋتاتتارى كانديداتىنىڭ سەنىمدى وكىلىنە، ءتىپتى كانديداتتىڭ وزىنە حاتتامالار تاپسىرىلعان اۋدانداردىڭ مالىمەتىن بەرۋدەن باس تارتتى. الايدا بارلىق اۋدانداردىڭ جيناقتالعان قورىتىندىسى شىقپاستان، حاتتاماسى جاسالماستان بۇرىن، كەيبىر اقپارات قۇرالدارىندا بىزدەن جاسىرعان دەرەكتەر حابارلاندى. قوعامدىق پىكىردى الدىن الا وزدەرى ويلاستىرعان جوسپارعا بەيىمدەۋ ءۇشىن، بيلىك وسىنى ىستەدى. كوميسسياداعىلار سايلاۋ ۋچاسكەلەرىنە اياق اتتاپ باسپاعان، سايلاۋ اتاۋلىعا سەنىمسىزدىكپەن قارايتىن ازاماتتاردىڭ داۋسىن وزدەرىنىڭ لاس ماقساتتارىنا پايدالاندى. ياعني، يەسىز قالعان داۋىستاردى ۇرلادى.

ونى ار-ۇياتتان گورى، دەپۋتاتتىق مانداتتى يەمدەنۋدى كوكسەگەندەرگە تارتۋ ەتتى. بيلىككە قارسى شىعىپ جۇرگەن، سىنعا الاتىن، اقيقاتتى ايتاتىن، ادىلەتتىلىكتى تالاپ ەتەتىن ازاماتتاردى پارلامەنتكە وتكىزبەۋ ءۇشىن، وسىنداي ارامزالىققا باردى. كەزەكتەن تىس سايلاۋدى وتكىزۋشىلەر ساياسي وزگەرىستى قالامايتىندىعىن، اۆتوريتارلىق بيلىك جۇيەسىن، جەمقورلىق پەن سىبايلاستىقتى ساقتاپ قالۋدى كوزدەيتىندىگىن ايقىن اڭعارتتى. ولار ءوز دەگەندەرىنە جەتتى.

مەن بۇعان ءۇزىلدى-كەسىلدى قارسىمىن! ۇرلىق جولىمەن قۇرالعان بيلىك، ياعني پارلامەنت ۇرى-قارىلاردىڭ مۇددەسىن قورعايتىن، سوعان قىزمەت قىلاتىن وردا بولادى. بۇعان وتكەن كەزەڭدەر تولىق دالەل. وسىنداي پارلامەنت حالىققا كەرەك پە؟ ارينە، جوق!

قادىرلى حالايىق، ماعان ءۇمىت ارتقان ىزگى نيەتتەگى بارشاڭىزعا، شىنايى قولداۋشىلارىما، قوعامدى وزگەرتۋگە بىلەك سىبانا كىرىسىپ جۇرگەن بەلسەندى ازاماتتارعا، دوستارىم مەن جاقىندارىما مىڭ رەت العىس ايتامىن! سىزدەردىڭ ماعان كورسەتكەن كومەكتەرىڭىز وراسان زور! سىزدەر جاقسى ءومىر سۇرۋگە كەدەرگى كەلتىرگەن، توزىعى جەتكەن نازارباەۆتىق، توقاەۆتىق جۇيەدەن ارىلۋدى قالادىڭىزدار. سول ءۇشىن ماعان داۋىس بەردىڭىزدەر. مەنىڭ باعدارلامامدا بۇل اشىق كورسەتىلدى.

مىنە، سوندىقتان دا سىزدەردىڭ داۋىستارىڭىزدى ازشىلىققا اينالدىردى. بۇل سايلاۋدا ءبىز جەڭىلگەن جوقپىز. ادىلەتسىز تورەشىلەر مەنىڭ ءالسىز قارسىلاسىمنىڭ قولىن جوعارى كوتەردى. مۇنداي كەلەڭسىز جاعدايلار سپورتتا دا، سايلاۋدا دا كەزىگەدى. مۇنىڭ اتى – ادىلەتسىزدىك، قيانات.

سايلاۋ كوميسسيالارىن، ولاردىڭ باسشىلارى مەن مۇشەلەرىن سايلاۋ تۋرالى زاڭدى بۇزعاندىعى ءۇشىن قىلمىستىق جاۋاپكەرشىلىككە تارتۋدى تالاپ ەتەمىن. 11-وكرۋگتاعى سايلاۋدى زاڭسىز، ادىلەتسىز دەپ ەسەپتەيمىن.

قازاقستان رەسپۋبليكاسى پارلامەنتى ءماجىلىسىنىڭ سايلاۋى قايتادان وتكىزىلسىن! مەن وسىنى تالاپ ەتەمىن! ءبىزدىڭ تالابىمىز ورىندالۋى ءۇشىن، مەنى جاقتاعان جانە باسقا دا ءوزىن-ءوزى ۇسىنۋ جولدارىمەن كانديداتتىققا سايلاۋعا تۇسكەن بارشا ازاماتتاردى قولداپ، قاجەت بولعان جاعدايدا الاڭدارعا بارىپ، ميتينگىلەر وتكىزىپ، بۇكىل حالىق بولىپ، تالاپ ەتۋىمىز كەرەك»،-دەپ جازدى قوعام قايراتكەرى.

Abai.kz