جالپىۇلتتىق سوتسيال-دەموكراتيالىق پارتياسى ۇكىمەت باسشىسى لاۋازىمىنا ءاليحان سمايىلوۆتىڭ تاعايىندالۋىنا قارسى ەكەنىن ءبىلدىردى.

«بۇگىنگى كەزدەسۋدە كوتەرىلىپ وتىرعان سۇراق وتە ماڭىزدى، تاعدىرشەشتى دەسەك تە بولادى. ءسوز جوق، ءبىز ءسىزدىڭ 30 جىل بويى ابدەن بىلىققا باتقان جۇيەنى وزگەرتەمىن دەگەن قۇلشىنىسىڭىزدى كورىپ وتىرمىز. بىراق، ونى ەرتەڭ جۇزەگە اسىراتىن مەملەكەتتىك اپپارات، ونىڭ ىشىندە ۇكىمەت ەكەنى انىق. كۇنى كەشە ءوزىڭىز دە بولاشاق ۇكىمەتتىڭ الدىندا بۇرىن-سوڭدى بولماعان اۋقىمدى مىندەت قويدىڭىز. ءبىز 20 جىل بيلىككە وپپوزيتسيادا ءجۇرىپ، حالقىمىزدىڭ ءال-اۋقاتىنىڭ تومەندەۋىنە ۇكىمەتتىڭ ءالسىز الەۋمەتتىك ساياساتى ەكەندىگىنە كوزىمىز جەتتى. ال ەندى بۇگىن اماناتتىقتار ءوز كوپشىلىگىن كورسەتىپ، ۇسىنىس بەرىپ وتىر. ارينە، پارلامەنتتىك وپپوزيتسيا رەتىندە ءبىز ۇسىنىسقا قارسىمىز»، - دەدى مەملەكەت باسشىسى قاسىم-جومار توقاەۆ قاتىسقان ءماجىلىستىڭ جالپى وتىرىسىندا جسدپ فراكتسياسىنىڭ مۇشەسى نۇرلان اۋەسباەۆ.

دەپۋتات جيىننان شىققان سوڭ جۋرناليستەردىڭ سۇراقتارىنا جاۋاپ بەردى. ول ۇكىمەتتى باسقاراتىن ازامات 20 ميلليون حالقى بار قازاقستاننان تابىلاتىنى ايتتى.

ونىڭ ايتۋىنشا، پرەزيدەنت توقاەۆ رەفورمالار جاساپ، جاڭا قازاقستاندى قۇرۋعا تىرىسقانىمەن، قازىرگى ۇكىمەتپەن ونى جۇزەگە اسىرۋ مۇمكىن ەمەس.

Abai.kz