پارلامەنت سايلاۋى قارساڭىندا «اق جول» پارتياسىنىڭ بۇرىنعى مۇشەسى ازامات ابىلداەۆ رەسەي باسشىسى پۋتيننءىڭ اتالمىش «ارناۋلى وپەراتسياسىن» قولدايمىن دەپ سۇحبات بەرىپ, قوعام نارازىلىعىن تۋدىرىپ، ارتىنان پارتيادان قۋىلعان ەدى.

سول كەزدە ەل ىشىندە ازاماتتاردىڭ قاتارىنىڭ مولدىعىن تىلگە تيەك ەتكەنبىز. كۇنى كەشە رەسەيدىڭ تومسك مەملەكەتتىك ۋنيۆەرسيتەتىندە وقيتىن قازاقستاندىق ستۋدەنت مارعۇلان بەكەنوۆتىڭ ءوز ەركىمەن «ۆاگنەر» جەندەتتەرىنىڭ قاتارىنا قوسىلىپ، 12 ءساۋىر كۇنى الدىنعى شەپكە اتتانعانى تاعى دا جۇرت تالقىسىنا ءتۇستى.

بىراق بەكەنوۆتىڭ اناسى الميرا بەكەنوۆا ۇلىن «ۆاگنەر» توبىنىڭ سوعىسقا كۇشتەپ اكەتكەنىنە سەنىمدى.

«ناۋرىزدا ول تومسكىدەن اياق استىنان كراسنودار ايماعىنا كەتكەندە قاتتى تاڭعالدىق. ول قىزىما كەتتىم دەدى، كەيىن بەلگىسىز بىرەۋلەر ونى ۇرلاپ اكەتىپ، «ۆاگنەر» توبىنا قوسقانى انىقتالدى. ونىمەن مولكينو حۋتورىندا كەزدەسۋگە مۇمكىندىك الدىم، ول جەردىڭ بارىندە «ۆاگنەرلىكتەردىڭ» پلاكاتى ءىلۋلى تۇر. ۇلىممەن دۇرىستاپ سويلەسۋگە مۇمكىندىك بەرگەن جوق، جاعدايى ناشار، بىراق ول ەشقانداي كەلىسىمشارتقا قول قويمادىم دەپ وتىر»، - دەپتى ازاتتىق سايتىنا بەرگەن سۇحباتىندا. ال قازاقستان سىرتقى ىستەر مينيسترلىگى مارعۇلان بەكەنوۆ «ۆاگنەر» قاتارىنا ءوز ەركىمەن قوسىلعان دەيدى.

«بىزدە بار مالىمەت بويىنشا، بۇل ازامات «ۆاگنەر» جەكە اسكەر توبىمەن ەرىكتى تۇردە كەلىسىمگە قول قويعان. قازاقستاننىڭ رەسەيدەگى ەلشىلىگى بۇل ازاماتتىڭ تۋىستارى قايىرىلعان سوڭ، رەسەيدىڭ ءتيىستى ورگاندارىنا سۇراۋ سالدى. اقپاراتتى تەكسەرىپ جاتىرمىز. كونسۋل ازاماتتىڭ تۋىستارىمەن بايلانىستا» - دەدى مينيسترلىكتىڭ رەسمي وكىلى ايبەك سمادياروۆ.

باتىس قازاقستان وبلىسىنىڭ 23 جاستاعى تۋماسى مارعۇلان ۆيدەو جولداۋىندا اتىشۋلى اسكەري توپقا ءوز ەركىمەن قوسىلعانىن جەتكىزگەن.

قازاقستان رەسپۋبليكاسىنىڭ زاڭناماسىندا، ناقتىراق ايتساق، قىلمىستىق كودەكستىڭ 172-بابىندا، شەتەلدىك قاقتىعىستارعا ارالاسقان ەل ازاماتتارىنىڭ 5 جىلدان 9 جىلعا دەيىن باس بوستاندىعىنان ايىرىلاتىنى جازىلعان. وتكەن اپتادا بۇقارالىق اقپارات قۇرالدارى ۇلتتىق قاۋىپسىزدىك كوميتەتىنىڭ قازاقستاندىقتاردىڭ ۋكراينا جەرىندەگى سوعىسقا ارالاسۋىنا قاتىستى 10 قىلمىستىق ءىستى تەرگەپ-تەكسەرۋدى باستاعانىن جارىسا جازىپ ەدى. دەسە دە «ۇلتتىق قاۋىپسىزدىك كوميتەتى تەرگەۋ ىسىنە قاتىستى ناقتى دەرەكتەردى اشىپ ايتپادى، قازاقستاندىقتاردىڭ قاي تاراپتا بولىسىپ، قاي شەپتە ۇرىسقا قاتىسقانى جايلى ازىرگە حابارلانعان جوق» دەلىنگەن ەدى.

مارعۇلاننىڭ ارەكەتىنەن ولاردىڭ حابارى بار ما، ول جاعى بەلگىسىز.

ەۋرووداق الدىنعى جۇما كۇنى «ۆاگنەر» قانقۇيلى توبىن ۋكرايناداعى سوعىسقا ارالاسقانى ءۇشىن سانكتسيا سالىنعانداردىڭ قاتارىنا قوستى. كەشە ءساۋىردىڭ 20-ى كۇنى شۆەيتساريا ۇكىمەتى دە «ۆاگنەر» مەن قوسا رەسەيدىڭ «ريا نوۆەستي» اگەنتتىگىنە كرەملدىڭ جالعان اقپاراتتارىن تاراتقانى ءۇشىن سانكتسيا سالدى.

ال بىزدە ءشى؟ كرەملدىڭ تەرىس اقپاراتىنا سەنىپ، ۇگىت ماشيناسىنا يلانىپ، سوعىسقا ۋكراينانى ايىپتاپ وتىرعانداردىڭ قاتارى قانشا ما؟! قولىنا قارۋ الىپ، باحمۇتتى ۋكراينداردان ازات ەتۋگە اتتانعان مارعۇلان سونىڭ ءبىرى ەمەس پە؟!

ەكىنشى دۇنيەجۇزىلىك سوعىس كەزىندە حالقىمىز ستاليننىڭ موبليزاتسياسىنىڭ كەسىرىنەن قىناداي قىرىلعانى تاريحي فاكت. ال ونى ءبىز ءالى كۇنگە «وتان قورعاۋ سوعىسى» دەپ بۇركەمەلەپ كەلەمىز. شىندىققا تۋرا قاراپ، تاريحقا ءوز باعاسىن بەرەتىن ۋاقىت كەلگەن جوق پا؟! ولاي ەتپەسەك سالدارى اۋىر بولايىن دەپ تۇر. ورىس ءتىلدى مارعۇلان ءپۋتيننىڭ موبليزاتسياسىن قازاقتارعا دا ورتاق ەكەن دەپ ءتۇسىنىپ قولىنا قارۋ العان شىعار، «وتان قورعاۋعا اتتاندىم» دەپ ويلاپ جۇرگەن بولار. بۇل ماسەلەگە مەملەكەتتىك ورعاندار سولقىلداقتىق تانىتپاي، ءتيىستى باعاسىن بەرۋى كەرەك.

ەسبول ۇسەنۇلى

Abai.kz