مەملەكەتتىك لاۋازىمدارعا ۇمىتكەرلەردىڭ قازاق ءتىلىن مەڭگەرۋى بويىنشا تالاپ زاڭنامالىق دەڭگەيدە رەتتەلمەگەن. بۇل تۋرالى ءماجىلىس دەپۋتاتتارىنىڭ ساۋالىنا مەملەكەتتىك قىزمەت ىستەرى اگەنتتىگى توراعاسىنىڭ مىندەتىن اتقارعان سالاۋات مۇكسىموۆتىڭ جاۋابىندا ايتىلعان.

«مەملەكەتتىك قىزمەت ىستەرى اگەنتتىگى ءوز قۇزىرەتى اياسىندا مەملەكەتتىك ءتىلدى دامىتۋ جۇمىستارىن ۇنەمى جۇرگىزۋدە. قازىرگى ۋاقىتتا مەملەكەتتىك لاۋازىمدارعا ۇمىتكەرلەر ءۇشىن مەملەكەتتىك ءتىلدى مەڭگەرۋ دەڭگەيى بويىنشا تالاپ جوق. ويتكەنى ماسەلە زاڭنامالىق دەڭگەيدە رەتتەلمەگەن. اتاپ ايتقاندا، كونستيتۋتسيانىڭ 7-بابىنا سايكەس قازاقستان رەسپۋبليكاسىندا قازاق ءتىلى مەملەكەتتىك ءتىل بولىپ تابىلادى. مەملەكەتتىك ۇيىمدار مەن جەرگىلىكتى ءوزىن-ءوزى باسقارۋ ورگاندارىندا قازاق تىلىمەن تەڭ دارەجەدە ورىس ءتىلى رەسمي تۇردە قولدانىلادى. كونستيتۋتسيانىڭ 14-بابىندا ەشكىمدى شىعۋ تەگىنە، الەۋمەتتىك، لاۋازىمدىق جانە مۇلىكتىك جاعدايىنا، جىنىسىنا، ناسىلىنە، ۇلتىنا، تىلىنە، دىنگە كوزقاراسىنا، نانىمىنا، تۇرعىلىقتى جەرىنە بايلانىستى نەمەسە كەز كەلگەن باسقا ءمان-جايلار بويىنشا كەمسىتۋگە بولمايتىندىعى كورسەتىلگەن. كونستيتۋتسيانىڭ 14-بابىندا كوزدەلگەن قۇقىقتار مەن بوستاندىقتار ەشبىر جاعدايدا شەكتەلۋگە جاتپايدى»، - دەدى ول جاۋابىندا.

ونىڭ اتاپ وتۋىنشە، كونستيتۋتسيانىڭ 33-بابى 4-تارماعىندا رەسپۋبليكا ازاماتتارىنىڭ مەملەكەتتىك قىزمەتكە كىرۋگە تەڭ قۇقىعى بار ەكەندىگى جازىلعان. مەملەكەتتىك قىزمەتشى لاۋازىمىنا كانديداتقا قويىلاتىن تالاپتار لاۋازىمدىق مىندەتتەردىڭ سيپاتىنا عانا بايلانىستى بولادى جانە زاڭمەن بەلگىلەنەدى.

«وسىعان قاراماستان اگەنتتىك مەملەكەتتىك قىزمەتتە مەملەكەتتىك ءتىلدىڭ اياسىن كەڭەيتۋ ماقساتىندا كەشەندى شارالاردى جۇزەگە اسىرۋدا. اتاپ ايتقاندا، 2021 جىلى وتكىزىلگەن پرەزيدەنتتىك جاستار كادر رەزەرۆىنە ىرىكتەۋدە ۇمىتكەرلەرگە مەملەكەتتىك ءتىلدى كەم دەگەندە ورتا دەڭگەيدە (ۆ1) مەڭگەرۋ تالابى ەنگىزىلدى. بۇل رەتتە، وسى جىلى ءۇشىنشى رەت ۇيىمداستىرىلۋى جوسپارلانىپ وتىرعان پرەزيدەنتتىك جاستار كادر رەزەرۆىنە ىرىكتەۋ كەزىندە دە مەملەكەتتىك ءتىلدى ءبىلۋ نەگىزگى تالاپ رەتىندە بەكىتىلدى. سونىمەن قاتار، 2022 جىلدان باستاپ قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنا جوعارى وقۋدان كەيىنگى ءبىلىم الۋشى ۇمىتكەرلەرگە مەملەكەتتىك ءتىلدى ورتا دەڭگەيدەن (ۆ1) تومەن ەمەس ءبىلۋى بويىنشا سەرتيفيكاتتارىنىڭ بولۋى تۋرالى تالاپ ەنگىزىلدى»، - دەدى سالاۋات مۇكسىموۆ.

Abai.kz