قازاقستان مەن تاجىكستان ساۋدا-ساتتىقتى دامىتۋدا بيزنەسمەندەرگە جاردەم كورسەتەتىن بىرلەسكەن كاسىپورىن قۇرماق. بۇل تۋرالى قازاقستاننىڭ سىرتقى ساۋدا پالاتاسىنىڭ باسقارما توراعاسى ايان ەرشوۆ ايتتى. 

«2021 جىلى ساۋدا ميسسياسى بارىسىندا ءبىز 80 ملن اقش دوللارىنان استام سوماعا بەس ەكسپورتتىق كەلىسىمگە قول قويدىق. وتكەن جىلى 100 ملن اقش دوللارى سوماسىنا التى قۇجاتتى راسىمدەدىك. بيىل دا ساۋدا ميسسياسىن وتكىزەمىز. وندا ءبىزدىڭ نىسانالى ينديكاتورىمىز 120 ملن اقش دوللارىن قۇرايدى»، - دەدى ايان ەرشوۆ.

ول تاجىكستاننىڭ قارقىندى دامىپ كەلە جاتقان ەكونوميكاسى بار ەل بولا وتىرىپ، قازاقستانمەن اسىرەسە مۇناي-حيميا جانە فارماتسەۆتيكا سالالارىندا ىنتىماقتاستىقتى دامىتۋعا ۇلكەن مۇمكىندىگى بار ەكەنىن اتاپ ءوتتى.

«الدىن الا تالداۋعا سايكەس، كاسىپورىندارىمىز تاجىكستانعا 170 ملن اقش دوللارىنان استام سوماعا شيكىزاتتىق ەمەس ەكسپورتتىڭ قوسىمشا كولەمىن ۇلعايتا الادى. ۆيتسە-پرەمەرلەر اتاپ وتكەن ەكى ميلليارد دوللار كولەمىنە ءبىز الداعى ەكى جىلدا جەتە الامىز دەپ ويلايمىن. جەكەلەگەن جوبالاردى ىسكە اسىرۋدان باستاپ، ءبىز ەكونوميكاداعى جۇيەلى ارىپتەستىككە كوشتىك. بۇعان بۇگىن قول قويىلعان ءبىر ميلليارد دوللاردان اساتىن كەلىسىمدەر دالەل بولا الادى. ارىپتەستەرىمىزبەن تاجىكستاندا بىرلەسكەن كاسىپورىن قۇرۋ تۋرالى تۇجىرىمداماعا قول قويدىق. بۇل كاسىپورىن ەكى تاراپتىڭ بيزنەسمەندەرىنە ءوزارا ساۋدانى دامىتۋعا، سونداي-اق ءۇشىنشى ەلدەرمەن ساۋدانى دامىتۋعا جاردەمدەسەتىن بولادى»، - دەپ تۇيىندەدى ءسوزىن پالاتا توراعاسى.

Abai.kz