مامىر ايىنىڭ ون ەكىسى كۇنى جازۋشىلار وداعىنىڭ كەزەكتى قۇرىلتايى وتەدى. قۇرىلتايدا قازىرگى قازاق ادەبيەتىنىڭ وزەكتى ماسەلەلەرى تالدانىپ، وداقتىڭ جاڭا توراعاسى سايلانباق. وسىعان بايلانىستى الەۋمەتتىك جەلىلەردە، ادەبيەتشى قاۋىم اراسىندا گۋ-گۋ اڭگىمە ءجۇرىپ جاتىر.

2018 جىلى قجو-نىڭ باسقارما توراعاسى بولىپ اقىن ۇلىقبەك ەسداۋلەت سايلانعان. ول توراعالىق ەتكەن تۇستا كوپتەگەن جاس قالامگەر وداق مۇشەلىگىنە ءوتتى، حالىقارالىق ادەبي فورۋمدار دا ۇيىمداستىرىلدى. تورەلىگىن وقىرمان، جازارمان قاۋىم ايتا جاتار. ال كەزەكتى سايلاۋ نەسىمەن قىزىق؟

تۋرا ءبىر اي بۇرىن قجو باسقارما توراعاسىنىڭ ورىنباسارى بولعان اقىن اقبەرەن ەلگەزەك ءوزىنىڭ فەيسبۋك جەلىسىندەگى پاراقشاسىندا: «مەن بۇگىننەن باستاپ قازاقستان جازۋشىلار وداعىنداعى قىزمەتىمنەن رەسمي تۇردە كەتتىم. كەلە جاتقان قۇرىلتايدا قويىلاتىن سپەكتاكلگە قاتىسۋعا قۇلقىم جوق» دەگەن جازبا قالدىردى. ەكى كۇننەن سوڭ توراعامەن باس ارازدىعى جوق ەكەنىن ايتىپ، «سپەكتاكل» ءسوزىنىڭ ءمانىن وزىنشە ءتۇسىندىردى جانە سايلاۋعا قاتىسپايتىنىن مالىمدەدى.

ىلە-شالا جازۋشى ارمان المەنبەت قجو توراعالىعىنا ءوزىن ۇسىناتىنىن مالىمدەپ، باعدارلاماسىن جاريالادى. كەشە، سارسەنبى كۇنى، جازۋشى-دراماتۋرگ دۋمان رامازان فب-پاراقشاسىنا قازىرگى وداقتىڭ جاي-كۇيىن جازىپ، «مەن دە ءوز كانديداتۋرامدى ۇسىنامىن» دەدى. ول دا باعدارلاما ازىرلەگەن ەكەن. ا.المەنبەت د. رامازاندى دەباتقا شاقىرىپ ەدى، بىراق ول ءۇزىلدى-كەسىلدى باس تارتتى.

مۇنىڭ الدىندا ۇلىقبەك ەسداۋلەت باق-قا بەرگەن سۇحباتىندا سايلاۋعا قايتا تۇسەتىنىن جانە ءوزىن اقورداداعى كۋراتورى دا قولدايتىنىن ايتقان. ءۇش قالامگەردەن باسقا توراعالىققا تاعى كىمدەر ءۇمىتتى.

ۇزىن قۇلاقتان جەتكەن اقپار بويىنشا، جازۋشى مەرەكە قۇلكەنوۆ، اقىن عالىم جايلىباي، اقىن-جازۋشى نۇرجان قۋانتايۇلى دا باق سىناپ كورمەك ەكەن. دەگەنمەن بۇل تۋرالى قالامگەرلەردىڭ ءوزى جۇمعان اۋزىن اشپاي وتىر.

وسى جولعى سايلاۋدىڭ بۇرىنعى سايلاۋلاردان ەرەكشەلىگى سول – قالامگەرلەر الداعى بەس جىلدا اتقاراتىن جۇمىستارىن باعدارلاما رەتىندە دايىنداپ، حالىققا ۇسىندى. بۇعان قوسا، ونى ورىندايمىن دەپ تە قاسام ءىشتى.

ال جازۋشىلار وداعى كەرەك پە، جوق پا – جالپى جۇرتتىڭ پىكىرى ەكىگە جارىلادى. ءبىر بىلەتىنىمىز، قاسيەتتى قاراشاڭىراقتىڭ باسشىلىعىنا كىم كەلسە دە، بەس جىلدان كەيىن جوعارىداعى سۇراققا نۇكتە قويىلاتىنى انىق.

Abai.kz