ەكىباستۇزدىڭ جىلۋ جەلىلەرىن جاڭارتۋعا 9 ملرد تەڭگە، قازاندىقتارىن جوندەۋگە 15 ملرد تەڭگە جۇمسالادى. بۇل تۋرالى پرەمەر-ءمينيستردىڭ ءبىرىنشى ورىنباسارى رومان سكليار ءماجىلىس دەپۋتاتتارىنىڭ ساۋالىنا بەرگەن جاۋابىندا ءمالىم ەتتى، دەپ حابارلايدى Ulysmedia.kz.

«قازىرگى تاڭدا ەكىباستۇز قالاسىنىڭ 5,3 كم جىلۋ جەلىلەرىن جاڭارتۋعا 9 ملرد 064 ملن 380 مىڭ تەڭگە كولەمىندە قاراجات ءبولىندى. سونىمەن قاتار، پاۆلودار وبلىسىنىڭ اكىمدىگى مەن «ورتالىق ازيا ەلەكتر ەنەرگەتيكالىق كورپوراتسياسى» اق اراسىندا جاۋاپكەرشىلىكتى جەرگىلىكتى اتقارۋشى ورگانمەن ءبولۋ بولىگىندە مەموراندۋمعا قول قويدى. ەكىباستۇز جىلۋ-ەلەكتر ورتالىعىنىڭ سۋ جىلىتۋ جانە ەنەرگەتيكالىق قازاندىقتارىن جوندەۋ بويىنشا قاجەتتى جۇمىستاردىڭ تىزبەسى ايقىندالدى. مەموراندۋم شەڭبەرىندە جەو-نىڭ 5 سۋ جىلىتۋ قازاندىعى (№11-15) جانە 3 ەنەرگەتيكالىق قازاندىق (№6, 7, 8), سونداي-اق قوسالقى جابدىقتار، عيماراتتاردى جوندەۋ جۇمىستارىن مەنشىك يەسىمەن تەپە-تەڭ نەگىزدە شامامەن 15 ملرد تەڭگە سوماعا جۇرگىزۋ بويىنشا ءىس-شارالار ازىرلەندى»، - دەدى رومان سكليار.

سونداي-اق، نىسانداعى 5 سۋ جىلىتۋ قازاندىعىندا جوندەۋ جۇمىستارىنىڭ ەسەپتەۋلەرى جۇرگىزىلىپ جاتىر.

«بۇدان باسقا، جىلۋمەن جابدىقتاۋدىڭ تەمپەراتۋرالىق كەستەسىن ساقتاماۋىنا بايلانىستى «ەكىباستۇزتەپلوەنەرگو» جشس 2022 جىلعى قاراشادان باستاپ (2023 جىلعى ناۋرىزدى قوسا العاندا) جىلۋ ەنەرگياسى ءۇشىن قايتا ەسەپتەۋ جۇرگىزدى. سونداي-اق، اكتسيونەرلەردىڭ ەسەبىنەن 2022 جىلعى جەلتوقساندا جانە 2023 جىلعى قاڭتاردا تۇتىنۋشىلارعا نورماتيۆتىك تۇتىنۋعا سايكەس تۇتىنىلعان ەلەكتر ەنەرگياسى ءۇشىن وتەماقى جاسالدى. بۇل رەتتە 2023 جىلدىڭ اقپان جانە ناۋرىز ايلارى ءۇشىن وتەماقىنى جاساۋ ماسەلەلەرىن جەرگىلىكتى اتقارۋشى ورگان جانە «واەك» اق پىسىقتاپ جاتىر»، - دەلىنگەن جاۋاپتا.

ەسكە سالا كەتەيىك، وتكەن جىلدىڭ قاراشاسىندا ەكىباستۇزداعى جىلۋ جەلىلەرىندە اپات بولىپ، بىردەن 149 تۇرعىن ءۇي جىلۋسىز قالعان ەدى. قالادا توتەنشە جاعداي جاريالاندى. تۇرعىندار قاتارىنان بىرنەشە كۇن بويى جىلۋسىز وتىردى. ۇيلەردەگى جىلۋ باتارەيالارى جارىلىپ، كاناليزاتسيا جەلىلەرى ءبۇلىندى. قالاداعى جاعدايدى تۇراقتاندىرۋ جۇمىستارى سوزباققا سالىندى.

8 اقپاندا «پاۆلودارەنەرگو» اق بۇرىنعى باس ديرەكتورى ۆاديم لەسين ەكىباستۇز قالاسىن جىلۋمەن  قامتۋ پروبلەماسىن جىلىتۋ ماۋسىمى اياقتالعانعا دەيىن شەشە المايتىنىن مالىمدەدى.

اقپان ايىنىڭ باسىندا وڭىرگە جۇمىس ساپارىمەن بارعان ۇكىمەت باسشىسىنىڭ ءبىرىنشى ورىنباسارى رومان سكليار ۆاديم لەسيننىڭ جۇمىسىن قاتاڭ سىنعا الىپ، ونىڭ قىزمەتىنەن بوساتىلۋىن تالاپ ەتتى.

15 اقپاندا كومپانياعا جاڭا باسشى تاعايىندالدى.

17 اقپاندا وڭىرلەردى دامىتۋ جونىندەگى پارلامەنتتىك تىڭداۋدا ەكىباستۇزداعى جىلۋ ماسەلەسى كوتەرىلىپ، سەناتور التىنبەك نۇحۇلى قالاداعى جىلۋمەن جابدىقتاۋ جۇيەسىنە جۇرگىزىلىپ جاتقان تۇگەندەۋ جۇمىستارىنىڭ ۇزاققا سوزىلىپ كەتكەنىن سىنعا الدى.

11 ساۋىردە ۇكىمەت باسشىسىنىڭ ءبىرىنشى ورىنباسارى رومان سكليار اۋديت اياقتالعانىن مالىمدەدى. ونىڭ سوزىنشە، ەكىباستۇز تۇرعىندارى كەلەسى جىلىتۋ ماۋسىمىندا جىلۋدان تارشىلىق كورمەيدى. سكليار جەو-نىڭ ءبىر بولىگى مەملەكەت ەسەبىنەن جوندەلەتىنىن جەتكىزدى. ال "ەكىباستۇزجىلۋەنەرگو" وزدەرىنە تيەسىلى قوندىرعىلاردى قارجىلاندىرادى. ەكى جاقتاپ قارجى كولەمىن ارتتىرىپ، جىلۋمەن جابدىقتاۋ ماسەلەسىن شەشۋ ۋادە ەتىلدى.

سونداي-اق، جۋىردا ەكىباستۇزدىڭ جىلۋ جەلىلەرىنە گيدراۆليكالىق سىناقتار جۇرگىزىلىپ، 100-دەن استام اقاۋ تابىلعانى حابارلاندى.

Abai.kz