اقوردادا مەملەكەت باسشىسى قاسىم-جومارت توقاەۆتىڭ توراعالىعىمەن كەڭەس ءوتتى. جيىندا ۇلتتىق بانكتىڭ 2022 جىلى اتقارعان قىزمەتى تۋرالى ەسەپ بەرىلدى، دەپ حابارلايدى قازاقپارات.

ءىس-شاراعا ۇلتتىق بانك توراعاسى عالىمجان ءپىرماتوۆ، پرەزيدەنت اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆ، پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ، قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا، ۇلتتىق ەكونوميكا ءمينيسترى الىبەك قۋانتىروۆ قاتىستى.

قاسىم-جومارت توقاەۆقا 2022 جىلعى اقشا-كرەديت ساياساتىنىڭ جۇزەگە اسىرىلۋ ناتيجەلەرى، قارجى تۇراقتىلىعىن قامتاماسىز ەتۋ شارالارى، سونداي-اق ۇلتتىق بانكتىڭ التىن-ۆاليۋتا قورى مەن ۇلتتىق قور اكتيۆتەرىنىڭ جاي-كۇيى جونىندە باياندالدى.

پرەزيدەنتكە وتكەن جىلدىڭ قورىتىندىسى بويىنشا ەكونوميكانى دوللارلاۋ كورسەتكىشى 31,6 پايىزعا ازايعانى، ەكىنشى دەڭگەيدەگى بانكتەردىڭ ەكونوميكاعا كرەديت ءبولۋ كولەمى 23,3 پايىزعا ارتىپ، 22,8 تريلليون تەڭگەگە دەيىن جەتكەنى، سونىڭ ىشىندە بيزنەسكە بەرىلگەن كرەديتتىڭ 13,9 پايىزعا ءوسىپ، 9,6 تريلليون تەڭگەنى قۇراعانى جونىندە مالىمەت بەرىلدى. جالپى ەكونوميكاعا بولىنگەن كرەديت 2022 جىلى 21,7 پايىزعا ءوستى. 2023 جىلدىڭ 1 قاڭتارىنداعى مالىمەت بويىنشا ونىڭ كولەمى 28,9 تريلليون تەڭگەنى قۇرادى.

ۇلتتىق بانكتىڭ دەرەگى بويىنشا بىلتىر جالپى حالىقارالىق رەزەرۆتەر 1,2 ميلليارد دوللارعا كوبەيىپ، 90,8 ميلليارد دوللارعا جەتتى. سونىڭ ىشىندە التىن-ۆاليۋتا قورى – 35,1 ميلليارد دوللار، ۇلتتىق قور اكتيۆتەرى – 55,7 ميلليارد دوللار. 2014 جىلى بىرىكتىرىلگەن ۋاقىتتان بەرى بزجق زەينەتاقى اكتيۆتەرى كىرىسىنىڭ جىلدىق مولشەرى 9,33 پايىزدى قۇرادى.

ۇلتتىق بانكتىڭ مالىمەتى بويىنشا Fitch Ratings جانە S&P Global Ratings حالىقارالىق رەيتينگ اگەنتتىكتەرى قازاقستاننىڭ «ۆۆۆ» دەڭگەيىندەگى دەربەس رەيتينگىنە قاتىستى «تۇراقتى» دەگەن بولجامدى راستادى.

مەملەكەت باسشىسىنىڭ ايتۋىنشا، ينفلياتسيا، ماكروەكونوميكالىق جانە ەنەرگەتيكالىق تۇراقسىزدىق ءالى دە ەكونوميكانىڭ نەگىزگى تۇيتكىلدەرى رەتىندە ساقتالىپ وتىر.

«حالىقارالىق ۇيىمدار حالىقارالىق ۆاليۋتا قورىنىڭ باعالاۋى بويىنشا جاھاندىق ءوسىم 2021 جىلعى 6,2 پايىزدان 3,4 پايىزعا دەيىن ايتارلىقتاي باسەڭدەيتىنىن جانە باعا قىسىمى كۇشەيەتىنىن بولجاپ وتىر. مۇنىڭ ءبارى ەلىمىزدىڭ ەكونوميكالىق دامۋىنا اسەر ەتەدى، سونداي-اق ۇكىمەت پەن ۇلتتىق بانككە جانە باسقا دا مەملەكەتتىك ورگاندارعا اناعۇرلىم ۇيلەسىمدى ءارى ءتيىمدى جۇمىس جۇرگىزۋ قاجەت ەكەنىن بىلدىرەدى»، – دەدى قاسىم-جومارت توقاەۆ.

تالقىلاۋ قورىتىندىسى بويىنشا پرەزيدەنت جىلدىق ەسەپتى ماقۇلدادى.

Abai.kz