2023 جىلدىڭ مامىرى.  يتاليانىڭ ەميليا-رومانيا ايماعىندا سوڭعى 100 جىلداعى ەڭ جويقىن تابيعات اپات – سۋ تاسقىنى ورىن الدى.

تاسقىن سۋ يتاليانىڭ بولونيا، چەزەنا، فورلي، راۆەننا جانە ريمميني قالالارىن باستى. 16 ادام قازا تاۋىپ، 50 مىڭعا جۋىق ادام ەۆاكۋاتسيالانعان. اينالاسى ەكى اپتانىڭ ىشىندە ايماقتا جەتى ايلىق مولشەردە جاۋىن جاۋىپ، ايماقتاعى 23 وزەن ارناسىنان تاسىعان. 43 ءىرىلى-ۇساقتى قالا تاسقىن سۋدىڭ استىندا قالعان. يتاليانىڭ ازاماتتىق قورعانىس دەپارتامەنتى ەميليا-رومانيا ايماعىندا توتەنشە جاعداي جاريالاعان.

حرونولوگياسى:

بىرنەشە اي قۋاڭشىلىقتان كەيىن 2-3 مامىردا نوسەر جاۋىن قۇيىپ، ارتى تاسقىنعا ۇلاسقان. بىرنەشە وزەن ارناسىنان تاسىپ، رومانەنى سۋ باسقان. 2 ادام قازا تاپقان.

12 مامىردا بولونيا پروۆينتسياسىندا نوسەر جاۋىننىڭ ارتى سۋ تاسقىنىنا ۇلاسقان.

بۇل شەتىن وقيعانىڭ العاشقى كەزەڭى بولسا، قىزىلسۋدىڭ ەكىنشى لەگى 16 مامىردا جالعاسقان. ايماقتا «مينەرۆا» داۋىلى تۇرعان. نوسەر جاۋىن ەكى كۇن تولاسسىز جاۋىپ، 23 وزەن ارناسىنان تاسىعان. 14 ادام قازا تاۋىپ، 4 پروۆينتسيادا 300-گە جۋىق سەل ءجۇرۋ فاكتىسى تىركەلگەن. 50 مىڭعا جۋىق ادام ەۆاكۋاتسيالانعان.

داۋىل 17 مامىردىڭ ەكىنشى جارتىسىندا عانا تىنشىعانىمەن، تاسقىن سۋ تولاستاماعان. ءسويتىپ، يتاليانىڭ ازاماتتىق قورعانىس دەپارتامەنتى ەميليا-رومانيا ايماعىندا توتەنشە جاعداي جاريالاعان.

يتالياداعى شەتىن وقيعانىڭ زارداپتارىن جويۋعا، ىزدەستىرۋ-قۇتقارۋ جۇمىستارىنا ەلدىڭ قۇزىرلى ورگاندارىمەن بىرگە 1,5 مىڭعا جۋىق ەرىكتى مەن حالىقارالىق قىزىل كرەست ۇيىمى ەرىكتىلەرى دە كومەك بەرگەن.

ال قازاقستان پرەزيدەنتى قاسىم-جومارت توقاەۆ يتاليا پرەمەرى دجوردجا مەلوني حانىممەن تەلەفون ارقىلى سويلەسىپ، ەميليا-رومانيا ايماعىندا بولعان جويقىن سۋ تاسقىنى سالدارىنان ادامداردىڭ قازا تابۋىنا بايلانىستى پرەمەر-مينيسترگە جانە بارشا يتاليا حالقىنا كوڭىل ايتقان.

قاسىم-جومارت توقاەۆ پەن دجوردجا مەلونيدىڭ تەلەفون ارقىلى سويلەسۋى:

وسىنىڭ الدىندا يتاليا ۇكىمەتى باسشىسى استاناعا رەسمي ساپارمەن كەلەدى دەپ جوسپارلانعان ەدى. ەلدەگى شەتىن وقيعاعا بايلانىستى، بۇل ساپار كەيىنگە شەگەرىلگەن.

«ەميليا-رومانيا ايماعىندا بولعان جويقىن سۋ تاسقىنى سالدارىنان كوپتەگەن ادامنىڭ قازا تابۋىنا بايلانىستى يتاليا پرەمەر-ءمينيسترى دجوردجا مەلوني تابيعات اپاتىنان زارداپ شەككەن وڭىرلەرگە بارۋ ءۇشىن حيروسيمادا ءوتىپ جاتقان G7 سامميتىنە سوڭىنا دەيىن قاتىسپاي، ەلىنە قايتىپ بارادى.

كەلىپ تۇسكەن مالىمەت بويىنشا يتاليانىڭ سولتۇستىگىندە كەم دەگەندە 40-تان استام ەلدى مەكەن سۋ استىندا قالىپ، 20 مىڭنان استام ادام باسپاناسىنان ايىرىلدى.

وسى سەبەپكە بايلانىستى يتاليا ۇكىمەتى باسشىسىنىڭ استاناعا الدىن جوسپارلانعان جۇمىس ساپارى بولمايدى.

يتاليا تاراپى پرەزيدەنت قاسىم-جومارت توقاەۆ پەن دجوردجا مەلونيدىڭ تەلەفون ارقىلى سويلەسۋىن ۇيىمداستىرۋدى سۇرادى»، - دەپ جازدى اقوردانىڭ ءباسپاسوز قىزمەتى.

وسىدان كەيىن ەكى ەل باسشىلارى تەلەفون ارقىلى سويلەسكەن. اڭگىمەلەسۋ بارىسىندا ساياسي، ساۋدا-ەكونوميكالىق، ينۆەستيتسيالىق جانە گۋمانيتارلىق سالالارداعى ىنتىماقتاستىقتى دامىتۋ پەرسپەكتيۆالارىن تالقىلادى.

بىلتىر ەكى ەلدىڭ ءوزارا تاۋار اينالىمى 15 ميلليارد دوللارعا جۋىقتادى. ەلدەرىمىز ەكونوميكانىڭ ءتۇرلى سالاسىندا تىعىز قارىم-قاتىناس جاساپ كەلەدى. قازاقستاندا يتاليانىڭ 270-تەن استام كومپانياسى تابىستى جۇمىس ىستەپ جاتىر.

سونداي-اق مەملەكەتتەر باسشىلارى ەنەرگەتيكا، كولىك، ونەركاسىپ كووپەراتسياسى جانە اۋىل شارۋاشىلىعى سالالارىنداعى بىرلەسكەن جوبالاردى جۇزەگە اسىرۋ اياسىنداعى ىنتىماقتاستىق پەرسپەكتيۆالارىن قاراستىردى.

ارتىنشا، يتاليا پرەمەرى دجوردجا مەلوني حانىم الەۋمەتتىك جەلىدە:

«قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ مىرزامەن تەلەفون ارقىلى سويلەستىك. جىلى سويلەستىك. بۇل استانا مەن ءريمنىڭ مەملەكەتارالىق قارىم-قاتىناستارىنىڭ جوعارى دەڭگەيدە ەكەنىن جانە ونى ءارى قاراي دامىتۋعا ەكى تاراپ تا مۇددەلى ەكەنىن كورسەتەدى. پرەزيدەنت مىرزاعا ەميليا-رومانيا ايماعىنداعى تاسقىننان زارداپ شەككەن يتاليا حالقىنا كوڭىل ايتقانى ءۇشىن لاعىسىمدى بىلدىرەمىن»، - دەپ جازدى.

Abai.kz