سوڭعى كۇندەرى ەلدى دۇربەلەڭگە سالىپ، ۋكرايناداعى سوعىستى قولداعان كرەمل جىرشىسى گريگوري لەپستىڭ كونتسەرتى قازاقستاندا وتپەيتىن بولدى. مادەنيەت مينيسترلىگى ساياسي، يدەولوگيالىق سالماعى اۋىر وسى ىستە ءۇنسىز قالدى. سىرتقى ىستەر مينيسترلىگى تاراپىنان دا بۇل جاعدايدا مەملەكەتتىڭ مۇددەسىن قورعاپ، شەتەل انشىلەرىنىڭ اتا زاڭىمىزدا تىيىم سالىنعان سوعىستى ناسيحاتتاۋ ارەكەتىنە قارسىلىق ءبىلدىرىپ اۋىز اشقان ەشكىم بولمادى.

ەلىمىزدىڭ تىنىشتىعىنا قاۋىپتى كونتسەرتتى توقتاتقان ۇكىمەتتىڭ پارمەنى ەمەس، قازاقتىڭ باسقا جاعدايلاردا بايقالا بەرمەيتىن ۇيىمشىلدىعى، بىرلىگى! الەۋمەتتىك جەلىلەردە قانداستارىمىز ارانداتۋشىلاردىڭ بۇل كونتسەرتىنە بارماۋعا شاقىردى. ناتيجەسى ويداعىداي بولدى. قوناەۆ قالاسىندا 8 ماۋسىمدا وتەدى دەپ جوسپارلانعان كونتسەرتى وتپەي قالعاننان كەيىن لەپس ەندى قازاقستانعا كەلمەيتىنىن مالىمدەپتى. اتامنان ارمەن كەتسىن!

جاسىراتىن نەسى بار، رەسەيدەن ءبىر بارقىراعان ءانشى كەلسە ەسى قالماي كونتسەرتكە جۇگىرەتىن اعايىندارىمىز كوپ. انالار ساحنادا يرەلەڭدەپ، قيرالاڭداپ، شىڭعىرىپ، باقىرىپ قالتاسىن ويسىز قازاقتىڭ اقشاسىنا تولتىرادى دا كەتەدى. ءوزىنىڭ اسىلىنان دا وزگەنىڭ ساسىعىنا قۇمار ساناسىز قازاق ولار ءۇشىن ء"سۇتى" ۇزىلمەيتىن ساۋىن سيىرداي تابىستىڭ كوزى. ايتپەسە ءوزىمىزدىڭ قىزىلجاردا دا سولاردى تازا ونەرىمەن ون وراپ الاتىن انشىلەرىمىز بار عوي.

شالعاي اۋىلداردا دا مادەنيەت سالاسىنداعى شەندىلەردىڭ نازارىنا ىلىنبەي جۇرگەن تالاي دۇلدۇلدەر بار. امىرە قاشاۋباەۆ، شارا جيەنقۇلوۆا سياقتى ۇلتتىق ءان ونەرى جاۋحارلارىنان ميراس بولىپ قالعان ساحنامىزعا جات پيعىلدى وزگەلەردى ەمەس، ءوز ۇل-قىزدارىمىزدى شىعارمايمىز با؟

قازىرگى جاعدايدا ءان جاي عانا ونەر ەمەس، ناعىز ساياسي ۇگىتكە، وي-ساناعا ىقپال ەتۋ قۇرالىنا اينالدى. كورشى ەلدىڭ انشىلەرى ساياسي ارەكەتىن وسىمەن توقتاتادى دەپ ويلامايمىن. ولار ءالى دە كەلەر. بىراق ۇلتتىق سانامىزعا قوزعاۋ سالىپ بىرىكسەك قاس نيەتتى انشىلەر قازاق جەرىنە مۇلدەم اياق باسپايتىن بولادى. لەپستىڭ ورعا جىعىلۋىنان تۇيگەن ويىم وسى.

مارات ەرمۇقانوۆ

Abai.kz