گەرمانيا ىشكى ىستەر ءمينيسترى نەنسي فەزەر پوليتسيا ورتالىق ازيا ەلدەرىنەن بارعان جەتى ادامدى ۇستاۋ ارقىلى تەررورلىق اكتىنىڭ الدىن العانىن مالىمدەدى.

«جەتى ادامدى قاماۋعا الۋ ارقىلى يسلامشىل تەرروريزمگە سوققى بەرىلدى. مۇنى جۇزەگە اسىرعان بيلىك ورگاندارىنا، ءبىرىنشى كەزەكتە ءبىزدىڭ مينيسترلىكتىڭ جانە فەدەرالدىق قىلمىس پوليتسياسىنا، ىشكى بارلاۋ قىزمەتىنە ريزاشىلىعىمدى بىلدىرەمىن»، - دەدى فەزەر.

وتكەن اپتادا گەرمانيانىڭ باس پروكۋراتۋراسى گەرمانيا مەن نيدەرلاندتا تەراكت ۇيىمداستىرۋدى كوزدەگەن جەتى ورتالىقازيالىقتىڭ ۇستالعانىن مالىمدەدى. وندا ولاردىڭ بەسەۋى تاجىك، بىرەۋى قىرعىز جانە تاعى بىرەۋى تۇركىمەن ازاماتتارى ەكەنى حابارلانعان. ۇستالعاندار ءبىرىن-ءبىرى كوپتەن بەرى بىلگەن، گەرمانياعا ۋكراينادان سوعىس باستالعاننان كوپ وتپەي بارعان.

ورتالىقازيالىقتار 2022 جىلى تەررورلىق ۇيىم قۇرىپ، گەرمانيادا نىساناعا الاتىن جەرلەردى قاراستىرىپ، قارۋ-جاراق تابۋ ارەكەتىن قاراستىرىپ جۇرگەن. پروكۋراتۋرا مالىمدەگەندەي، ۇستالعانداردىڭ ازىرگە ناقتى جوسپارلارى بولعان ەمەس.

Reuters اگەنتتىگى جازعانداي، ۇستالعانداردىڭ اراسىندا ابرورجون اتتى قىرعىزستاندىقتان باسقاسىنىڭ ءبارى 2022 جىلدىڭ ساۋىرىنەن بەرى "يسلام مەملەكەتى" تەررورلىق ۇيىم ءۇشىن اقشا جيناپ، بىرنەشە رەت شەتەلدەگى ەسەپ-شوتتارعا اقشا اۋدارعان.

Abai.kz