ەلوردانى دامىتۋ ماسەلەلەرى جونىندەگى كەڭەستە پرەزيدەنت قاسىم-جومارت توقاەۆ استاناداعى ينتەرنەت ساپاسىن سىنعا الا كەلە، مينيستر باعدات مۋسيننەن ماسەلەنى قالاي جانە قاشان شەشەتىنىن سۇرادى.

«ءبىز ەسەپ جۇرگىزىپ، ناتيجەسىندە ينتەرنەت جىلدامدىعى ناشار 67 ورىندى انىقتادىق. ول جەرلەردىڭ تۇرعىندارىمەن دە كەزدەستىك. وندا ءۇيىنىڭ توبەسىنە ستانسا ورناتۋدان قورقاتىن راديوفوبتار تۇرادى. اكىمدىك 60 تۇرعىن ءۇي بويىنشا ءتۇسىندىرۋ جۇمىسىن جۇرگىزۋگە كومەك كورسەتتى. قازىرگى تاڭدا وسىنىڭ ىشىندە 33 ءۇي شاتىرىنا بازالىق ستانسا ورناتۋعا كەلىستى. ناتيجەسىندە ونىڭ بەسۋىنە قاجەتتى قۇرىلعى ورناتىلدى، التاۋىنا ورناتىلىپ جاتىر. قالعانى بويىنشا كەلىسىمشارت دايىندالۋ ۇستىندە. 28 ءۇي بويىنشا 3 اي بويى جۇمىس ىستەپ كەلەمىز، ولار كەلىسىم بەرمەي وتىر. تۇرعىندارعا ستانسانىڭ دەنساۋلىققا ەشقانداي زيانى جوق ەكەنىن تۇسىندىرە الماي كەلەمىز»، - دەدى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين.

ونىڭ ايتۋىنشا، زاڭ تالابىنا ساي ەگەر تۇرعىن ءۇيىنىڭ توبەسىنە بازالىق ستانسا ورناتۋعا قارسىلىق بىلدىرسە، وندا قۇرىلعى الىنىپ تاستالادى.

مينيستر كەلتىرگەن مالىمەت بويىنشا جىلىنا وسىنداي 150 ستانتسيا الىنادى.

«وسى ماسەلەدەن كەيىن زاڭعا وزگەرتۋ ەنگىزۋدى جوسپارلاپ وتىرمىز. وعان ساي تۇرعىنداردىڭ 50 پايىزى ستانسا ورناتۋعا قارسى بولسا عانا ونى الىپ تاستايمىز. ال ەكىنشى ماسەلە – تاريفتەردىڭ تومەندىگى. قولدانۋشىلار ينتەرنەتتە كوپ وتىرادى، تيىسىنشە ول جۇيەگە كوپ سالماق تۇسىرەدى. ماسەلەن، شەتەلدىكتەر قانداي دا ءبىر ماتەريالدى اشپاس بۇرىن «بۇل مەن ءۇشىن پايدالى ما، جوق پا؟» دەپ ويلانادى. ويتكەنى، ونى قاراسا، كوپ مەگابايتى كەتەدى»، - دەپ ءتۇسىندىردى باعدات مۋسين.

مينيستردەن كەيىن اتالعان ساۋالعا جاۋاپ بەرگەن ەلوردا اكىمى جەڭىس قاسىمبەك ينتەرنەت ساپاسىنا قاتىستى ماسەلە قازان ايىنا دەيىن 60-70% شەشىلەدى دەپ سەندىردى.

«نەگىزىنەن وسىنداي ورىندارداعى تۇرعىنداردىڭ 90 پايىزى كەلىسىمىن بەرەدى. تەك 3-5 ادامنىڭ قارسىلىعى قولبايلاۋ بولىپ وتىر. تيىسىنشە ستانتسيا ورناتۋعا رۇقسات بەرۋگە نيەتتى ادامدار وسىنداي تۇرعىنداردىڭ كەسىرىنەن بۇل ماسەلەگە تاپ بولىپ جاتىر»، - دەپ ءمالىم ەتتى استانا قالاسىنىڭ اكىمى جەڭىس قاسىمبەك.

ەسكە سالايىق، بۇگىن ەلوردانى دامىتۋ ماسەلەلەرى جونىندەگى كەڭەستە مەملەكەت باسشىسى قاسىم-جومارت توقاەۆ باس شاھارداعى ينتەرنەت ساپاسىن سىنعا العان ەدى.

فوتو: اشىق دەرەككوزدەن

Abai.kz