بۇگىن الماتىدا ورىس كنيازى الەكساندر نەۆسكيگە ارنالعان تاستۇعىر ورناتىلدى. ەسكەرتكىشتىڭ اشىلۋىنا الماتى قالاسىنىڭ اكىمى ەربولات دوساەۆ پەن رەسەي پرەزيدەنتىنىڭ كومەكشىسى، قازاقستان جايلى داۋلى پىكىر ايتىپ، قازاق قوعامىنىڭ نارازىلىعىن تۋدىرعان ۆلاديمير مەدينسكي كەلىپ قاتىسقان، دەپ جازادى Mezgil.kz. 

اتالعان اقپارات (نەۆسكي ەسكەرتكىشىنىڭ اشىلاتىنى تۋرالى) اپتا بۇرىن جاريالاندى. قازاقستانداعى پراۆوسلاۆتاردىڭ رەسمي سايتى سانالاتىن «mitropolia.kz» سايتى ءسۇيىنشى سۇراپ جازدى. وندا اتالعان ەسكەرتكىش كۇللى رەسەي پراۆوسلاۆتارىنىڭ پاتريارحى كيريللدىڭ باتاسىمەن، قازاقستان پرەزيدەنتى قاسىم-جومارت توقاەۆتىڭ رۇقساتىمەن سالىنعالى جاتقانى ايتىلعان.

بۇگىنشى اشىلۋ سالتاناتىندا اكىم دوساەۆ پرەزيدەنت توقاەۆتىڭ، كومەكشى مەدينسكي پرەزيدەنت ءپۋتيننىڭ ارنايى قۇتتىقتاۋلارىن وقىپ بەرگەن.

ەسكەرتكىش الماتىداعى الەكساندر نەۆسكي سوبورىنىڭ ماڭىندا ورنالاسقان. قازاقستانداعى پراۆوسلاۆ شىركەۋىنىڭ 20 جىلدىعىنا ارنالعان.

ورىس پاتشاسىنىڭ ەسكەرتكىشىن الماتىدا ورناتۋعا مۇرىندىق بولعان – رەسەي پرەزيدەنتىنىڭ كومەكشىسى ۆلاديمير مەدينسكي دەگەن ادام.

2021 جىلدىڭ ناۋرىزى. رەسەي پرەزيدەنتىنىڭ كومەكشىسى، رەسەيدىڭ بۇرىنعى مادەنيەت ءمينيسترى مەدينسكي: «ۇلى رەسەيدىڭ كەيبىر تەرريتوريالارى ۋكراينا، بەلارۋس پەن قازاقستانعا ءوتىپ كەتتى»، - دەپ سويلەگەن ەدى. رەسەيدىڭ بىلدەي ءبىر لاۋازىمدى شەندىسى، وندا دا رەسەي پرەزيدەنتىنىڭ كومەكشىسى دەيتىن ادامنىڭ بۇلاي سويلەۋى ءجۇردىم-باردىم قارايتىن ماسەلە ەمەس! وسىنداي ادامنىڭ الماتىعا كەلىپ، ورىس پاتشاسى الەكساندر نەۆسكيگە ارنالعان ەسكەرتكىشتى اشۋى - قاۋىپتى سيگنال!

Abai.kz