الەم جۇرتشىلىعى رف كارىس كارتاسىن ويناتۋعا كوشتى دەپ دۇرلىگۋدە. وعان سەبەپ رەسەي قورعانىس ءمينيسترى شويگۋ باستاعان دەلەگاتسيانىڭ وسى ەلگە جولىنىڭ ءتۇسۋى. شويگۋ باستاعان دەلەگاتسيانى پحەنيان اۋەجايىندا سولتۇستىك كورەيا ارمياسىنىڭ گەنەرالى كان سۋن نام جانە قۇرمەتتى قاراۋىل روتاسى قارسى الدى.

وسى ساپار ءۇشىن رەسەيدىڭ تاپقان سىلتاۋى كارىس سوعىسىنىڭ 70 جىلدىق مەرەيتويىنا قاتىسپاق. ءيا، رەسەي ءوزىن كسرو مۇراگەرى سانايدى. ءارى كەزىندە كەڭەس وداعى وسى ەلگە 1950-1953 جج. كومەكتەسىپ، ءبىرتۇتاس كورەيانى قاق جارىپ، ايىزى قانعان ەدى. قىرعي-قاباق سوعىس كەزىندە ەكى الىپ قاعانات كسرو مەن اقش وزدەرى 37-ءشى پاراللەلمەن ءبولىپ العان جەرلەرىندە ءبىرى – «سوتسياليستىك جۇماق»، ەكىنشىسى – «كاپيتاليستىك جۇماق» ورناتۋعا كوشتى. ونىڭ قانداي ناتيجە بەرگەنىن تاريح ءوزى-اق كورسەتىپ، اقش قاناتىنىڭ استىنا العان – وڭتۇستىك كەرەمەت دامىپ، رەسەي قولتىعىنا كىرگەن – سولتۇستىكتىڭ ۇسقىنى كەتتى. بار قولىنان كەلەتىنى جالعان اقش دوللارىن جاساپ، قارا بازاردا ساۋدالاۋ عانا.

كسرو داۋرەنىن اڭساعان ءپۋتيننىڭ نازارى وسى ەلگە تەگىن ءتۇسىپ وتىرعان جوق.
كيم چەن ىن ءوز تاراپىنان سەرگەي شويگۋدى قۇشاق جايا قابىلداپ، ەكى تاراپ «ايماقتىق ءھام جاھاندىق قاۋىپسىزدىك ماسەلەسىن» كەڭىنەن تالقىلادى دەپ رەسەيلىك باق شۋلاي جازدى. كحدر باسشىسى شويگۋعا ۋكرايناعا اشقان سوعىسىن قۇپتاعان ساناۋلى ەلدىڭ ءبىرى ەكەنىن تانىتىپ، ءالى كۇنگە دەيىن وزدەرىنە سالىنعان ساياسي ءھام ەكونوميكالىق سانكتسيالارعا مويىماي، ءوز تاراپتارىنان كەڭەستىك ۇلگىدەگى سوعىس قارۋ-جاراقتارىن دامىتا بىلگەنىن پاش ەتتى. جوعارعى مارتەبەلى قوناققا بالليستيكالىق زىمىراندارىن، جاڭا ۇلگىدەگى دروندارىن تاعى باسقا جاڭاشىل سوعىس تەحنولوگياسى ۇلگىلەرىن كورسەتىپ ءبىر ماقتانىپ قالدى.

شويگۋدىڭ بۇل ەلگە كەلگەن باستى ماقساتى اسكەري سالادا تىعىز ارىپتەستىك قارىم-قاتىناس ورناتۋ. بىراق 2017 جىلى بۇۇ قاۋىپسىزدىك كەڭەسى كحدر سانكتسيا سالعان كەزدە رەسەيدى جاقتاپ داۋىس بەرگەن بولاتىن. ەندى باسىنا كۇن تۋعاندا تۋىسىن ىزدەپ شارق ۇرعان كۇي كەشۋدە. اتاپ ايتار بولساق، سولتۇستىك كورەيا رەسەي ارمياسىنا ارتيللەريالىق وق-ءدارى مەن تەحنيكا جەتكىزىپ جاتقانىن ايداي الەم بىلسە دە، سولتۇستىك كورەيا مۇنى بەت باقتىرماي، مۇلدەم جوققا شىعارىپ كەلەدى.

بۇعان الىپ-قوسارىمىز، سولتۇستىك كورەيا ماسكەۋدىڭ ۋكراينانىڭ ءتورت وبلىسىن اننەكسيالاپ العانىن مويىنداعان ءۇش ەلدىڭ ءبىرى بولىپ وتىر. ازىرشە شويگۋدىڭ بۇل ساپارى نەمەن اياقتالارى بەلگىسىز.

Abai.kz