استانا قالاسىنىڭ پروكۋراتۋراسى قايرات بورانباەۆ جانە ونىڭ سىبايلاستارىمەن كەلىسىمگە كەلدى.

استانا قالاسىنىڭ پروكۋراتۋراسى ق.بورانباەۆپەن جانە باسقا سوتتالۋشىلارمەن «قازترانسگاز» اق-نىڭ قاراجاتىن يەمدەنۋگە قاتىستى كىنانى مويىنداۋ تۋرالى پروتسەستىك كەلىسىم جاسادى. زاڭ بويىنشا مۇنداي كەلىسىم سوتتالۋشىلاردىڭ ەركىمەن، ولاردىڭ تاعىلعان ايىپپەن كەلىسۋىمەن، دالەلدەمەلەرگە داۋ كەلتىرمەۋىمەن، زالالدى مويىنداۋى جانە جابىرلەنۋشىنىڭ كەلىسىمىمەن جاسالادى. وسى ورايدا قالا پروكۋراتۋراسى سوتتالۋشىلاردىڭ كىنالارىن تولىق مويىنداۋىن جانە 14,5 ملرد تەڭگەنىڭ زالالىن وتەگەنىن ەسكەرىپ، جابىرلەنۋشى تاراپتاردىڭ كەلىسىمىمەن پروتسەستىك كەلىسىم جاساۋ تۋرالى شەشىم قابىلدادى.

اتالعان كەلىسىم بويىنشا قايرات بورانباەۆ جانە ونىڭ سىبايلاستارىنىڭ جازاسى جەڭىلدەي تۇسپەك.

«سوتتالۋشىلار جاساعان قىلمىستارىن مويىنداعاندىقتان ق. بورانباەۆ پەن ر. ناحانوۆتىڭ مۇلكىن تاركىلەپ، ارقايسىنا 6 جىل باس بوستاندىعىنان ايىرۋ جازاسىن قولدانسا، ال ت. جانۇزاقتى 5 جىل باس بوستاندىعىنان ايىرۋ جازاسى سۇرالدى. ۇشەۋى دە مەملەكەتتىك قىزمەتتى اتقارۋ قۇقىعىنان ءومىر بويىنا ايىرۋ جازاسىنىڭ تاعايىندالۋىمەن كەلىستى. مۇنداي جازا مولشەرى قىلمىستىق كودەكستىڭ 55-بابىنىڭ 3-بولىگىنىڭ تالاپتارىنا سۇيەنىپ ايقىندالدى. وعان سايكەس ءىس جۇرگىزۋ كەلىسىمى جاسالعان جاعدايدا جازانىڭ مەرزىمى مەن مولشەرى قىلمىستىق كودەكستىڭ ەرەكشە بولىگىنىڭ ءتيىستى بابىندا كوزدەلگەننەن جوعارى مەرزىمىنىڭ جارتىسىنان اسپاۋى ءتيىس»،-دەلىنگەن پروكۋراتۋرا تاراتقان حابارلامادا.

سونداي-اق، حابارلامادا قىلمىستىق كودەكستىڭ 189 جانە 218-باپتارى بويىنشا ەڭ جوعارى جازا 12 جىلدان اسپايتىنىن ەسكەرە وتىرىپ، سوتتالۋشىلارعا تيىسىنشە 6 جانە 5 جىلدان باس بوستاندىعىنان ايىرۋ جازاسىن (ەڭ جوعارى مەرزىمنىڭ جارتىسىنان اسپايتىن) تاعايىنداۋ ۇسىنىلعان.

اقپاراتتا ايتىلعانداي، پروتسەستىك كەلىسىمدى قاراۋ جانە ونى بەكىتۋ تۋرالى شەشىمدى قابىلداۋ ءۇشىن سوتقا جولداندى.

بۇعان دەيىن پروكۋروردىڭ قايرات بورانباەۆقا 6 جىل بەرۋدى سۇراعانى بەلگىلى بولعان.

فوتو: اشىق دەرەككوزدەن

Abai.kz