ءماجىلىس دەپۋتاتى ەرمۇرات باپي سامات ابىشكە قاتىستى قىلمىستىق ءىس قوزعالىپ جاتقانى قوعامداعى قاتقىلدانعان جاعدايدى ءبىراز جىبىتەتىن جاڭالىق ەكەنىن ايتادى. دەپۋتاتتىڭ سوزىنشە، ەسكى قازاقستان توپتارىنىڭ ءار مۇشەسى قاڭتار وقيعاسىنا قاتىستى جاۋاپ بەرۋى كەرەك. بۇل تۋرالى Mezgil.kz حابارلايدى. 

«بۇنداي ماسەلەدە يگىلىكتىڭ ەرتە-كەشى جوق. ەسكى قازاقستانعا قاتىسى بار، سونىڭ باسىندا تۇرعان توپتىڭ ارقايسىسى قاڭتارعا بايلانىستى تەرگەلۋى كەرەك ەدى. تىم قۇرىعاندا سۇرالۋى كەرەك ەدى»، - دەدى ول.

دەپۋتات ءجۇرىپ جاتقان تەرگەۋ بارىسىندا جاڭا ەسىمدەر بەلگىلى بولۋى مۇمكىن ەكەنىن ايتادى.

«تەرگەۋ ناتيجەسىندە جاڭا ەسىمدەر اتالادى دەگەن ءۇمىت بار. ءجۇرىپ جاتقان سوتقا بايلانىستى ءبىراز ەسىمدەر اتالۋى كەرەك دەپ ويلايمىن»، - دەيدى ەرمۇرات باپي (دەرەككوزى: qaz365.kz).

ايتا كەتسەك، بۇدان بۇرىن باس پروكۋراتۋرانىڭ ارنايى پروكۋرورلارى ۇلتتىق قاۋىپسىزدىك كوميتەتى توراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى قاڭتار وقيعاسى كەزىندە بيلىك پەن لاۋازىمدىق وكىلەتتىكتەردى اسىرا پايدالانۋ فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىپ جاتقانىن حابارلاعان.

ال ۇلتتىق قاۋىپسىزدىك كوميتەتى (ۇقك) 5-ءشى دەپارتامەنتىنىڭ بۇرىنعى باسشىسى رۋسلان ىسقاقوۆ سوت كەزىندە قاڭتار وقيعاسى كەزىندە ەكس-پرەزيدەنت نۇرسۇلتان نازارباەۆتىڭ جيەنى – ۇلتتىق قاۋىپسىزدىك كوميتەتىنىڭ بۇرىنعى ءبىرىنشى ورىنباسارى سامات ءابىشتىڭ تاپسىرما بەرگەنىن ايتقان.

ول سونداي-اق، ارمان جۇماگەلديەۆتى («ديكي ارمان») تۇتقىنداۋ تۋرالى بۇيرىق شەتەلدەن كەلگەنىن ايتتى.

«ىسقاقوۆتىڭ سوزىنشە، ونىڭ قىلمىستىق ءىسى بويىنشا جاۋاپ الىنعاننان كەيىن ءبىر جىل وتكەن سوڭ ونىڭ ايعاقتارى قۇپيالانعان. ىسقاقوۆتىڭ مالىمدەۋىنشە، بۇل ءابىشتىڭ قاڭتارداعى ءرولىن جاسىرۋ ءۇشىن جاسالعان»، - دەپ جازدى جۋرناليست دانيار مولدابەكوۆ.

Abai.kz