ساياسي سالماعى ءالسىز تاۋەلسىز ەلدەر ءۇشىن ەڭ قورقىنىشتى دۇنيە – قوس ازاماتتىق. جۋىردا قازاقستان مەن قىتاي قوس ازاماتتىقتى انىقتاۋ بويىنشا كەلىسءىم جاساۋعا بەلسەنە كىرىسىپ كەتتى. قۇپتارلىق ءىس. الايدا مۇندا ەسكەرۋگە ءتيىس ءبىر ماڭىزدى ءبىر فاكتور بار. ول – قىتايداعى قانداستار ماسەلەسى.

وسى جولى ماجىلىستە «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلداندى. ماقۇلدانىپ، سەنات قاراۋىنا جىبەرىلدى.

ءماجىلىستىڭ جالپى وتىرىسىندا: «ازاماتتاردىڭ قوس ازاماتتىعى تۋرالى اقپاراتتى تەك ولاردىڭ كەلىسىمى بويىنشا عانا بەرەمىز. كوبىنە ازاماتتار مۇندايعا كەلىسىم بەرمەيدى. بۇگىنگى كەلىسىمنىڭ راتيفيكاتسياسى وسى دەرەكتەردى جەدەل الۋعا مۇمكىندىك بەرەدى. قوس ازاماتتىقتى انىقتاۋ تۋرالى سۇراققا توقتاساق، بۇل كۇندەلىكتى جۇمىس. بيىل 462 ادام قوس ازاماتتىعى ءۇشىن اكىمشىلىك جاۋاپكەرشىلىككە تارتىلدى. بىراق قىتاي بويىنشا ونداي انىقتالعان جوق»، - دەدى ىشكى ىستەر ءمينيسترى ەرجان سادەنوۆ.

اتالعان كەلىسىمدى راتيفيكاتسيالاۋ ەكى ەلدىڭ قۇزىرەتتى ورگاندارى اراسىنداعى كوشى-قون جانە قوس ازاماتتىققا قارسى ءىس-قيمىل سالاسىنداعى ىنتىماقتاستىق ءۇشىن قۇقىقتىق نەگىز قالىپتاستىرۋعا مۇمكىندىك بەرىپ، كەلىسۋشى تاراپتاردىڭ ازاماتتارىنا قاتىستى كوشى-قون سالاسىندا اقپارات الماسۋ بويىنشا ءوزارا بىرلەسە ءىس-قيمىلدار جاساۋدى جۇزەگە اسىرادى، دەپ تۇسىندىرىلگەن.

ەگەر وسى زاڭ جوباسى قابىلدانسا، ەرتەڭ قازاقستانداعى قىتاي ەلشىلىگى مەن كونسۋلدىعىنىڭ تاس-تالقانى شىعۋى مۇمكىن!

اۋىت مۇقيبەك:

قر سەناتىنىڭ توراعاسى ماۋلەن اشىمباەۆتىڭ نازارىنا!

«قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى ماجىلىستە ماقۇلدانىپ، سەناتتىڭ قاراۋىنا بارىپتى.

ارينە، مۇنداي اقپارات الماسۋ تۋرالى كەلىسىمدى مەملەكەتتىك دەڭگەيدە بەكىتۋ تۋرالى ۇسىنىس ءبىزدىڭ پرەزيدەنتىمىز قاسىم-جومارت توقاەۆ جاعىنان جاسالماعانى بەلگىلى. بۇل ۇسىنىس قىتاي تارپانىنىڭ ءوتىنىشى ەكەنىندە داۋ جوق. جانە ونىڭ ارعى استارىندا نە پالە جاتقانى بەلگىسىز.

ەگەر، سەنات بۇل كەلىسىمگە ماقۇلدىق بەرىپ، پرەزيدەنت وعان قول قويسا، ەرتەڭ ول كەلىسىم ارقىلى قىتاي ۇكىمەتى قىتايداعى ەتنيكالىق قازاقتاردىڭ ەكى ەل اراسىنداعى ءجۇرىپ-تۇرۋىن شەكتەۋ، قازاقستان ازاماتتىعىن العان قانداستارىڭىزدىڭ قىتاي ازاماتتىعىنان شىعۋىن جانە قيىنداتۋ، قىتايدان زەينەتاقى الاتىن زەينەتكەرلەردىڭ زەينەتاقىسىن توقتاتۋ سەكىلدى «ءالاۋلايىن» تاعى باستايدى دەپ ويلايمىن.

ەگەر، وسىنداي جاعدايلار تاعى ءجۇز بەرسە، وندا تاۋەلسىزدىك جىلدارى قىتايدان ورالعان قازاقتار وعان توزبەيدى، قازاقستانداعى قىتاي ەلشىلىگى مەن كونسۋلىنىڭ تاس-تالقانىن شىعارىپ، كۇلىن كوككە ۇشىرۋى ابدەن مۇمكىن!

سوندىقتان، سەنات بۇل زاڭ جوباسىن قابىلداۋدان ءسوزسىز باس تارتۋى كەرەك!

Abai.kz