مەن دەپۋتات ەدىل جاڭبىرشين اعامىزدى جاقسى تانيمىن. كوشى-قون ءۇردىسىن رەتتەۋگە ارنالعان زاڭدارعا بايلانىستى ءبىراز ۇسىنىستار بەردىم. بىراق، ناتيجەسىن كورگەم جوق.

سوعان قاراماستان، قاتتى بولماسا دا، بەلگىلى دارەجەدە سىيلايمىن. وتە ەڭبەكقور، بەلسەندى دەپۋتات. ءار ءسوزىن قالت جىبەرمەي تىڭداپ، وقىپ وتىراتىن ساناۋلى دەپۋتاتىمنىڭ بىرەۋى.

ەدىل تەرەكبايۇلىنىڭ «سۇراۋى بار...» كانالىنا بەرگەن سۇحباتىن مۇقيات، كەي جەرىن قايتالاپ تىڭداپ شىقتىم.

ەدىل اعا 29 جاسىندا دەكان بولىپتى. تۋعان جىلىنا قاراپ ەسەپتەسەم، 1995 جىلدارعا تۋرا كەلەدى ەكەن.

ەدەكەڭ كوپ نارسەنى وزگەرتىپ جىبەرگىسى كەلەتىن، جانىپ تۇرعان جىگىت بولعانىن ايتىپتى. بىراق، دەكان رەتىندە قانداي وزگەرىس اكەلگەنىن ايتپاپتى.

مەن 25 جاسىندا مەكتەپ ديرەكتورى بولدىم. بۇكىل اۋدان، ايماق، وبلىستى شۋلاتىپ ءجۇرىپ، ولكە ورتالىعى ۇرىمجىدەن 1 000 000 يۋان قاراجات ءبولدىرىپ اكەلىپ، ويمانبۇلاققا مەكتەپ سالدىردىم. بۇل 1994-1997 جىلدار ارالىعىندا بولعان وقيعا.

دەكان دەگەن قىزمەت جوعارى وقۋ ورنىندا بولادى. جوعارى وقۋ ورنى ۇلكەن قالالاردا، وبلىس ورتالىعىندا بولادى. ال، مەكتەپ اۋىلدا دا، قالادا دا بولادى. مەن اۋىلدا، ءبىر سايدىڭ قۋىسىندا ورنالاسقان مەكتەپتىڭ ديرەكتورى بولدىم.

ەدىل اعا قازاقستاندا، مەن قىتايدا قىزمەت ەتتىم.  قىسقاسى، ەدىل كوكەم ەكەۋمىز ءبىر مەزگىلدە جاۋاپتى قىزمەتتى باستاعان ەكەنبىز.

مەن، وسى جەردە كەسىپ ايتايىن، ءوزىمدى ەدىل تەرەكبايۇلىنان مىقتى بولدىم دەپ ايتقالى وتىرعان جوقپىن. بىراق، جاساعان جۇمىسىمىزدىڭ ناتيجەسى ەداۋىر پارىقتى ەكەنى جاسىرىن ەمەس.

ونىڭ ۇستىنە، ءوزىڭنىڭ تاۋەلسىز مەملەكەتىڭدە تۇرىپ، قىزمەت اتقارۋ مەن وزگە ۇلت ۇستەمدىك ەتەتىن مەملەكەتتە قىزمەت اتقارۋدىڭ اراسى جەر مەن كوكتەي پارىقتى بولاتىنى تاعى تۇسىنىكتى. ەندەشە، مەنىڭ سول كەزدە ەدىل اعاما قاراعاندا اۋىلدا تۇرىپ، اپىرىپ-جاپىرىپ جىبەرگەنىمنىڭ سىرى نەدە؟!

ونىڭ جالعىز-اق سىرى بار، مەندە قۇزىرەت بولدى. ول كەزدە قىتايدا اتقارۋشى بيلىكتىڭ قىزمەتىنىڭ ناتيجەسى پرەزيدەنتتىڭ تاپسىرماسىن قالاي ورىنداۋىمەن ەمەس، قىزمەتتە ءوز تاراپىڭنان قانداي جاڭالىق جاساعانىڭمەن باعالاناتىن. مۇنداي باسقارۋ جۇيەسى ادامنىڭ جەكە پوتەنتسيالىن اشۋعا مول مۇمكىندىك بەرەدى.

دەن سياوپين قۇرعان باسقارۋ جۇيەسى مينيسترلەر مەن اكىمدەردى قويىپ، ورتالاۋ مەكتەپتىڭ ديرەكتورى بولعان بىزگە سونداي مۇمكىندىك بەردى. مەن سول مۇمكىندىكتى قالت جىبەرمەي، پايدالانا الدىم.

ەگەر، سول كەزدە مەنىڭ ورنىمدا ەدىل تەرەكبايۇلى بولسا، مىنا قابىلەتىمەن ول مەكتەپ ەمەس، ءبىزدىڭ ويمانبۇلاقتان قۇلجاعا باراتىن لرت ساردىرىپ تاستايتىن ەدى.

ەدىل اعامىزدىڭ ءبىراز نارسەنى جاساپ جىبەرۋگە تەبىنى بۇگىن دە جەتىپ تۇر. امال نە، قاساڭ جۇيە ادىمىن اشتىرماي وتىر...

ايتايىن دەگەنىم، ەلىمىزدىڭ باسقارۋ جۇيەسىن وزگەرتۋ كەرەك! اتقارۋشى بيلىكتىڭ كوسىلىپ جۇمىس ىستەۋىنە مۇمكىندىك بەرەتىن جاڭا جۇيە بولماسا، ءبارى بوس ءسوز! ەگەر، جاقسى باسقارۋ جۇيەسى بولسا، ەدىل اعا سەكىلدى مىقتىلار عانا ەمەس، مەن سەكىلدى ءسوز قۋعان وسال باسشىلار دا قوماقتى جاڭالىق، زور ناتيجە جاراتا بەرەدى.

اۋىت مۇقيبەك

Abai.kz