ءماجىلىس سپيكەرى ەرلان قوشانوۆ بىرىككەن اراب امىرلىكتەرىنىڭ ۇلتتىق كۇنىنە وراي ۇيىمداستىرىلعان سالتاناتتى جيىنعا قاتىسىپ، مەملەكەت باسشىسىنىڭ جانە پارلامەنت دەپۋتاتتارىنىڭ اتىنان ايتۋلى مەرەكەمەن قۇتتىقتادى.

ءماجىلىس توراعاسى امىرلىكتەردىڭ تاۋەلسىزدىكتىڭ العاشقى كۇندەرىنەن باستاپ قازاقستانعا جان-جاقتى قولداۋ كورسەتكەنى ءۇشىن العىسىن ءبىلدىرىپ، ەكى ەل اراسىنداعى شىنايى دوستىقتىڭ جىل ساناپ ارتىپ كەلە جاتقانىنا ەرەكشە ءمان بەردى.

پالاتا توراعاسى امىرلىكتەر قازاقستاننىڭ ماڭىزدى ءارى سەنىمدى سەرىكتەسى ەكەنىن، سونداي-اق جارتى عاسىر ىشىندە ەكونوميكاسى ورگە باسقان، قۋاتتى مەملەكەتكە اينالعانىن اتاپ ءوتتى.

– ەلدەرىمىز اراسىنداعى ەكىجاقتى سىندارلى بايلانىس پەن بارلىق سالاداعى ىنتىماقتاستىعىمىز جەمىستى دامىپ كەلەدى. ول، ارينە، مەملەكەتتەرىمىزدىڭ باسشىلارىنىڭ ۇندەسكەن ساياساتىنىڭ ارقاسى. بيىل قاڭتاردا قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ بىرىككەن اراب امىرلىكتەرىنە رەسمي ساپارمەن باردى. ەكى ەل باسشىلىعىنىڭ تۇراقتى كەزدەسۋلەرى ساياسي ديالوگ پەن ساۋدا-ەكونوميكالىق ىنتىماقتاستىقتى جاڭا دەڭگەيگە كوتەردى. الداعى ۋاقىتتا كوشباسشىلارىمىزدىڭ سەرىكتەستىكتى تەرەڭدەتۋگە باعىتتالعان جۇمىسىن پارلامەنت دەڭگەيىندە جالعاستىرامىز، – دەدى ءماجىلىس سپيكەرى.

ەرلان قوشانوۆ بىرىككەن اراب امىرلىكتەرىنىڭ بۇكىل الەمدە جاڭارتىلاتىن ەنەرگيا كوزدەرى جوبالارىن ءتيىمدى جۇزەگە اسىرىپ، وسى سالاداعى وزىق تەحنولوگيالاردىڭ ورتالىعىنا اينالعانىنا نازار اۋداردى. وسى ورايدا جاقىندا دۋبايدا وتەتىن كليماتتىڭ وزگەرۋى جونىندەگى 28-ءشى كونفەرەنتسيانىڭ تابىستى وتۋىنە تىلەكتەستىك ءبىلدىردى.

– ەكى ەلدىڭ ۇقساس قۇندىلىقتارى مەن ۇمتىلىستارى، سىندارلى ساياساتى مەن بايىپتى ۇستانىمدارى، ءوزارا سىيلاستىعى قازاقستان-امىرلىكتەر قارىم-قاتىناسىن جەمىستى ىنتىماقتاستىقتىڭ ۇلگىسىنە اينالدىردى دەسەك ارتىق ايتقاندىق ەمەس. دوستاس ەكى مەملەكەت اراسىنداعى قارىم-قاتىناستىڭ الەۋەتى بۇدان دا زور. بىرگە باعىندىرار بەلەستەر ءالى الدا دەپ بىلەمىن، – دەدى ەرلان قوشانوۆ.

Abai.kz