قازاقستان 2023-2027 جىلدارعا دۇنيەجۇزىلىك مۇرالار كوميتەتىنىڭ مۇشەسى بولىپ سايلاندى. بۇل تۋرالى مەملەكەتتىك كەڭەسشى ەرلان قارين ايتتى.

«پاريجدەن جاعىمدى جاڭالىق جەتتى. يۋنەسكو باس كونفەرەنتسياسى جۇمىسىنىڭ سوڭعى كۇنى قازاقستان 2023-2027 جىلدارعا دۇنيەجۇزىلىك مۇرالار كوميتەتىنىڭ مۇشەسى بولىپ سايلاندى.

قۇرامىنا 21 مەملەكەت كىرەتىن دۇنيەجۇزىلىك مۇرالار كوميتەتى ─ يۋنەسكو-نىڭ اسا ماڭىزدى ءارى بەدەلدى باسقارۋشى ورگانى. بۇل كوميتەتتىڭ نىسانداردى دۇنيەجۇزىلىك مۇرالار تىزىمىنە ەنگىزۋگە جانە الىپ تاستاۋعا ايرىقشا قۇقىعى بار»، — دەلىنگەن جازبادا.

مەملەكەتتىك كەڭەسشىنىڭ دەرەگىنشە، قازاقستاننىڭ كانديداتۋراسىن 118 مەملەكەت قولداعان.

ەلىمىزدىڭ دۇنيەجۇزىلىك مۇرالار كوميتەتىنە مۇشە بولىپ سايلانۋى بىرەگەي مادەني جانە تابيعي مۇرالارامىزدى ساقتاۋعا قاتىستى بەلسەندى جۇمىسىمىزدى حالىقارالىق قاۋىمداستىقتىڭ مويىندايتىنىن كورسەتەدى.

سونداي-اق بۇعان دەيىن يۋنەسكو-نىڭ الماتىداعى كەڭسەسىنە ورتالىق ازيا مەملەكەتتەرىنەن بولەك اۋعانستان، پاكىستان جانە يران مەملەكەتتەرىن قامتيتىن كوپسەكتورلى ايماقتىق كەڭسە (بيۋرو) مارتەبەسىن بەرۋ تۋرالى شەشىم قابىلدانعان بولاتىن.

Abai.kz