28 قاراشادا باكۋدە، گەيدار اليەۆ ورتالىعىندا ءازىربايجان رەسپۋبليكاسىنىڭ مادەنيەت مينيسترلىگى ۇيىمداستىرعان «شىعارماشىلىق اپتا» اياسىندا مادەنيەت جانە كرەاتيۆتى يندۋستريالار فورۋمىنىڭ اشىلۋ سالتاناتى ءوتتى.

ايتا كەتۋ كەرەك، جوبا ءازىربايجان رەسپۋبليكاسىنىڭ پرەزيدەنتى يلحام اليەۆتىڭ 2022 جىلعى 22 شىلدەدەگى وكىمىمەن بەكىتىلگەن «ءازىربايجان رەسپۋبليكاسىنىڭ 2022-2026 جىلدارعا ارنالعان الەۋمەتتىك-ەكونوميكالىق دامۋ ستراتەگياسىن» ىسكە اسىرۋعا نەگىزىندە جۇزەگە اسىرىلۋدا.

فورۋم اياسىندا قاتىسۋشىلار كينو، انيماتسيا، مۋزىكا، مادەنيەت سالاسىنداعى ستارتاپتار، ويىن تەحنولوگيالارى، ءسان، ديزاين، سونداي-اق كرەاتيۆتى كەڭىستىكتەر مەن ايماقتار سياقتى كلاستەرلەردى قامتيتىن «مادەنيەت جانە كرەاتيۆتى يندۋستريالار كورمەسىمەن» (MY EXPO 2023) تانىستى.

تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا فورۋمنىڭ «مادەنيەت پەن كرەاتيۆتى يندۋستريالاردىڭ ەكوجۇيەسىن دامىتۋ: حالىقارالىق پەرسپەكتيۆا» تاقىرىبىنداعى پانەلدىك سەسسياسىنا قاتىستى.

اقتوتى رايىمقۇلوۆا اتالعان فورۋم ازىربايجانداعى ۇيىمنىڭ پرەزيدەنتى رەتىندە قاتىسقان العاشقى رەسمي ءىس-شارا بولعانىن اتاپ ءوتتى. ول تۇركى مەملەكەتتەرىنىڭ باسشىلارىنا، سونىڭ ىشىندە ءازىربايجان رەسپۋبليكاسىنىڭ پرەزيدەنتى يلحام اليەۆ مىرزاعا قوردىڭ پرەزيدەنتى لاۋازىمىنا تاعايىنداۋ كەزىندە كورسەتكەن سەنىمى ءۇشىن العىسىن ءبىلدىردى.

قور پرەزيدەنتى قازىرگى تسيفرلىق داۋىردەگى مادەنيەت پەن كرەاتيۆتى سالالاردىڭ ماڭىزدى ءرولىن اتاپ ءوتتى. ول جاھاندانۋ مەن مادەني ينتەگراتسيانى جۇزەگە اسىرۋدا ءار حالىقتىڭ بىرەگەي ماتەريالدىق جانە رۋحاني قۇندىلىقتارىن قۇرمەتتەۋ اراسىنداعى تەپە-تەڭدىكتى ساقتاۋدىڭ ماڭىزدىلىعىن اتاپ ءوتتى.

اقتوتى رايىمقۇلوۆا ءوزى باسقاراتىن ۇيىم مادەنيەتارالىق ديالوگتى دامىتۋعا ۇلەس قوساتىنىن، سونداي-اق تۇركىتىلدەس حالىقتار اراسىنداعى قارىم-قاتىناس پەن ءوزارا تۇسىنىستىك ءۇشىن پلاتفورما بولىپ تابىلاتىنىن حابارلادى.

ءىس-شارادا ازەربايجان رەسپۋبليكاسىنىڭ مادەنيەت ءمينيسترى ءادىل كەرىملي، ازەربايجان رەسپۋبليكاسى ەكونوميكا ءمينيسترىنىڭ ءبىرىنشى ورىنباسارى ەلنۋر اليەۆ جانە باسقا دا لاۋازىمدى تۇلعالار ءسوز سويلەدى.

Abai.kz