الماتىدا جولاۋشىلار اعىنىن ساراپتاۋ ناتيجەسىندە قالا مەتروسىندا جىلجىمالى قۇرامنىڭ سانى ءوستى.

الماتى اكىمدىگىنىڭ مالىمەتىنشە، قالانىڭ قاربالاس كەزىندە مەتروپوليتەن جەلىسىندە ەندى 5 مينۋت 38 سەكۋند جيىلىكپەن 11 جىلجىمالى قۇرام جۇرەتىن بولادى.

"وقۋ جىلىنىڭ باستالىسىمەن جولاۋشىلار اعىنى 70 مىڭنان 90 مىڭعا دەيىن ءوستى. تالداۋ ناتيجەسىندە جولاۋشىلار سانى كۇنىنە 100 مىڭعا دەيىن كوبەيگەنى ەسكەرىلىپ، جەلىگە قوسىمشا قۇرام شىعارۋ تۋرالى شەشىم قابىلداندى. ءار قۇرام جالپى سىيىمدىلىعى 900 ادامنان اساتىن 4 ۆاگوننان تۇرادى", - دەپ حابارلادى اكىمدىكتىڭ ءباسپاسوز قىزمەتى.

ەسكە سالساق، الماتىدا مەتروداعى پويىزداردىڭ ءجۇرۋ ارالىقتارى 6 مينۋتقا دەيىن قىسقارعان ەدى.

سونداي-اق الماتىدا مەترومەن جۇرەتىندەر سانى ارتقان.

سونىمەن بىرگە، الماتىلىقتار جىل سوڭىنا دەيىن مەترودا 5 تەڭگەمەن قاتىناي الاتىنى تۋرالى جازعانبىز.

فوتو: اشىق دەرەككوزدەن

Abai.kz