ەستەرىڭىزدە بولسا جەلتوقسان ايىنىڭ اياعىندا پورتالىمىزدا مەملەكەت باسشىسى قاسىم-جومارت توقاەۆتى اتىنا «ۇلىمىز جاپتىم – جالا، جاقتىم – كۇيەمەن» جاقسىز سوتتالىپ كەتتى»، - دەپ اراشا سۇراعان اتا-انانىڭ ءۇشبۋ حاتى جاريالانعان ەدى.

Abai.kz – ەركىن اقپارات الاڭى بولعاندىقتان، ءسوز بوستاندىعىنىڭ پرينتسيپتەرىن باسشىلىققا الا وتىرىپ، اراشا سۇراعان اتا-انانىڭ جانايقايىن قوعام تالقىسىنا ۇسىندىق.

ءبىز سول ارادا اراشا سۇراپ كەلگەن اتا-انانى سوزگە تارتتىق. ءىستىڭ ءمان-جايىن سۇراپ بىلدىك. قىسقاشا بىلاي:

اشيرحان سەيدازوۆ پەن كاميلانىڭ نۋرماحانوۆا بالاسى ەرنار سەيدازوۆقا الماتى قالاسى الاتاۋ اۋداندىق سوتى مەن الماتى قالاسى قىلمىستىق ىستەر جونىندەگى القاسى «BI-GROUP» حولدينگىنىڭ ەنشىلەس كومپانيالارى – «كاسپاكو»  جانە   «Bi Global» جشس-دا زاڭسىز جاسالعان قۇجاتتاردىڭ نەگىزىندە ورىن العان زاڭسىز ارەكەتتەرىنە كۇيىنىپ، ۇلىنىڭ وسى كاسىپورىنداردا 2 اي عانا جۇمىس ىستەپ، اياق-استىنان  «96 000 000 (توقسان التى ميلليون) تەڭگەنىڭ ماتەريالىن ۇرلاپ كەتىپتى» دەگەن جالعان ايىپپەن 8 جىلعا سوتتالىپ كەتكەنىنە اراشا سۇرايدى.

«BI-GROUP» حولدينگىنىڭ ەنشىلەس كومپانيالارى – «كاسپاكو» جانە «Bi Global» جشس-ءنىڭ جەكە اقشاسى بولسا ءبىر ءسارى، بىراق  مەملەكەتتىڭ تاپسىرىسىمەن مەملەكەتتىڭ قارجىسىنا مەملەكەتتىك مەكتەپتەر سالىنىپ جاتقانىن الماتى قالاسى الاتاۋ اۋداندىق سوتى مەن الماتى قالاسى قىلمىستىق ىستەر جونىندەگى القاسى  مۇلدە  ەلمەگەن. لدەتاەۆ، ارىستانبەكوۆ دەگەن قىزمەتكەرلەر جالعان كۋا بولىپ، ەرنار سەيدازوۆتىڭ موينىنا «كاسپاكو» جانە «Bi Global» جشس-ءنىڭ باسشىلىعى جىمقىرعان اقشانى كوزبوياۋشىلىقپەن ارتا سالعان. ادىلەتتىك ءۇشىن شىرىلداعان انانىڭ زارىنا كىم قۇلاق اسادى؟

بۇگىن رەداكتسيامىزعا ۇلدارى ەرنار سەيدازوۆقا اراشا سۇراعان اتا-انا ەسىم-سويلارى ەلگە بەلگىلى، قوعامداعى وزەكتى ماسەلەلەردى وتكىر كوتەرىپ جۇرگەن ءماجىلىس دەپۋتاتتتارى: قازىبەك يسا، ەرمۇرات باپي، باقىتجان بازاربەك پەن ابزال قۇسپاننىڭ اتىنا ءۇشبۋ حات جولداپتى. اتى اتالعان دەپۋتاتتار قۇزىرلى ورگاندارعا سۇراۋ سالىپ، اراشا سۇراعان اتا-انانىڭ جانايقايىنا قانداي دا ءبىر رەاكتسيا بىلدىرەدى، سوتتاعى «بارماق-باستى، كوز قىستىلىققا» بەي-جاي قارامايدى دەپ سەنەدى.

سونداي-اق، ءبىز دە اتى اتالعان ءماجىلىس دەپۋتاتتارى جاريا جازىلعان ءۇشبۋ حاتقا رەداكتسيامىزعا قانداي دا ءبىر جاۋاپ قاتادى دەپ كۇتەمىز.

دەپۋتاتتار: قازىبەك يسا، ەرمۇرات باپي، باقىتجان بازاربەك پەن ابزال قۇسپانعا!

قۇرمەتتى دەپۋتاتتار!

سىزدەرگە وتكەن جىلدىڭ قاراشا ايىندا تومەندەگىدەي ارىزبەن جۇگىنىپ، ارقايسىسىڭىزدىڭ اتىڭىزعا وسى ارىزدى جولداعان ەدىم.

سىزدەر مەنىڭ ارىزىمدى ۋاكلەتتى مەملەكەتتىك مەكەمەلەر مەن  ورگاندارعا جولداپ، ارىزدا كورسەتىلگەن تالاپتاردى ءجىتى تەكسەرۋدى تالاپ ەتتىڭىزدەر.

سودان بەرى 2 اي ءوتتى، وسى ارىز بويىنشا ءبىر دە ءبىر مەملەكەتتىك مەكەمە تەكسەرەۋ جۇرگىزگەن جوق، تەكسەرۋ بولىپ جاتىر دەپ حابارلاعان جوق. ءبىر-بىرىنە ارىزدى سىلتەپ جولداعان حاتتاردان باسقا ەشقانداي تۇشىمدى جاۋاپ المادىق.

سىزدەر مەملەكەتتىك مەكەمەلەر مەن ورگاندارعا  جولداعان حاتتارىڭىزدا تەكسەرۋ ناتيجەسىن حابارلاۋعا تاپسىرما بەرگەن ەدىڭىزدەر، حابار الدىڭىزدار ما؟

وسى ارىزبەن باق ارقىلى قايتا جۇگىنە وتىرىپ، ادىلدىك پەن زاڭدىلىققا قول جەتكىزۋگە ىقپالى جاساۋلارىڭىزدى سۇرايمىن.

قۇرمەتتى دەپۋتاتتار!

سىزدەردەن الماتى قالاسى سوتتارىنداعى زاڭسىزدىق پەن ادىلەتسىزدىك،  مەملەكەت قارجىسىنا قۇرىلىستار سالىپ جاتقان BI-GROUP حولدينگىنىڭ  فيليالدارىنداعى قارجىلىق زاڭداردىڭ دورەكى بۇزىلۋىنا كوڭىل ءبولىپ، شارا قابىلداۋدى سۇرايمىن.

الماتى قالاسى الاتاۋ اۋداندىق سوتى مەن الماتى قالاسى قىلمىستىق ىستەر جونىندەگى القاسى BI-GROUP حولدينگىنىڭ فيليالدارى «كاسپاكو» جانە «Bi Global» جشس-ندە زاڭسىز جاسالعان قۇجاتتاردىڭ نەگىزىندە مەنىڭ بالام سەيدازوۆ ەرنار اشيرحانۇلىن 8 جىلعا سوتتاپ جىبەردى.

الماتى قالاسىنىڭ سوتتارى BI-GROUP-تا ورىن العان زاڭسىزدىقتارعا، ءتارتىپتىڭ جوقتىعىن، قىزمەتكەرلەردىڭ جاۋاپسىزدىعىن، اسىرەسە قارجى سالاسىنداعى ەرەجەلەردىڭ دورەكى بۇزىلۋىنا كوز جۇمىپ وتىر.

ءىس بويىنشا: «مەنىڭ بالام 2 اي عانا جۇمىس ىستەپ 96 000 000 (توقسان التى ميلليون) تەڭگەنىڭ ماتەريالىن ۇرلاپ كەتىپتى. ونىڭ ءبىر بولىگىن جۇمىسقا كىرمەي تۇرىپ-اق ۇراپتى.  ماتەريالدىق جاۋاپتى قىزمەتكەرلەر  -  ۋچاسكە باسشىسى (قويما باستىعى) مەن جوبا جەتەكشىسى ماتەريال كىرگەن-كىرمەگەنىن تەكسەرمەي، ناكلادنويعا قابىلداپ الدىم دەپ قول قويا بەرىپتى.  ول ۇرلانعان ماتەريال بۋحگالتەرلىك ەسەپپەن ءوتىپ، اقشاسى تولەنىپ كەتىپتى. ودان سوڭ دا ۇرلىق جاسالا بەرىپتى، ونى ەشكىم تەكسەرمەپتى،  سەنىپ جۇرە بەرىپتى. ماتەريال وبەكتىگە كىردى مە، كىرمەدى مە ەشكىم قاراماپتى. ول ۇرلىقتى 5 ايدان كەيىن عانا انىقتاپتى».

سوندا بۇل نە دەگەن قاداعالاۋ جوق، اشىق-شاشىق قۇرىلىس؟

جاۋاپتى قىزمەتكەرلەر، قاۋىپسىزدىك قىزمەتى قايدا قارايدى؟

جالپى ماتەريالدىق قۇندىلىقتار نەگە دۇرىس ەسەپكە الىنىپ، دۇرىس سانالىپ، نۇسقاۋلىققا ساي دۇرىس الىنىپ-بەرىلمەيدى؟

الدە انىقتالعانى انىقتالىپ، انىقتالماعانى وڭدى-سولدى شاشىلىپ كەتىپ جاتىر ما؟ ماتەريالدار قۇرىلىس وبەكتىلەرىنە جەتىپ جاتىر ما؟

الدە قاعازبەن ون توننا، ال ناقتى ءبىر توننا كىرىپ، ساپاسىز قۇرىلىستار سالىنىپ جاتىر ما؟

سۇراق كوپ.

BI-GROUP حولدينگىنىڭ قىزمەتكەرلەرى بۇل سۇراقتارعا جاۋاپ بەرە المادى.

سوت تا بۇل سۇراقتارعا جاۋاپ الۋعا تىرىسپادى!

سىزدەر تەكسەرىپ جاۋاپ الاتىن شىعارسىزدار دەپ جازىپ وتىرمىن.

مەن بالام سەيدازوۆ ە. BI-GROUP حولدينگىنىڭ «كاسپاكو» جانە «Bi Global» جشس-ندە جابدىقتاۋشى بولىپ 2021-2022 جىلدارى 2,5 اي جۇمىس ىستەپ، سول 2,5 ايدا «كاسپاكو» جشس-نە 62 426 380 (الپىس ەكى ميلليون ءتورت ءجۇز جيىرما التى مىڭ ءۇش ءجۇز سەكسەن) تەڭگە، «Bi Global» جشس-نە 33 679 175 (وتىز ءۇش ميلليون التى ءجۇز جەتپىس توعىز مىڭ ءجۇز جەتپىس بەس)تەڭگە شىعىن كەلتىردى دەگەن ايىپپەن سوتتالىپ كەتتى.

ءيا، مەنىڭ بالام سوت ۇكىمىمەن ايىپتى دەپ تانىلدى، بىراق سوت ءىستى ءادىل زاڭدى قارامادى، زاڭسىز ۇكىم شىعاردى.

زاڭسىزدىقتىڭ دالەلى سول – مەنىڭ بالام جۇمىس ىستەمەگەن كەزدە جوعالعان زاتتاردى دا مەنىڭ بالامنىڭ موينىنا جۇكتەدى.

ونىڭ سىرتىندا جوعالماعان، ياعني تۇگەندەۋ كەزىندە وبەكتىدە بار بولعان زاتتى دا ۇرلادى دەپ سوتتاپ وتىر.

زاڭسىز ۇكىمنىڭ شىعۋىنا «كاسپاكو» جانە «Bi Global» جشس-ءنىڭ ماتەريالدىق جاۋاپتى تۇلعالارى مەن قارجىلىق قاۋىپسىزدىك ءبولىمى قىزمەتكەرلەرىنىڭ زاڭ تالاپتارىن دورەكى تۇردە بۇزا وتىرىپ جاساعان قۇجاتتارى نەگىز بولدى.

سول قىزمەتكەرلەر كەلتىرىلگەن شىعىننىڭ جاۋاپتىلىعىنان ءوز باستارىن الىپ قاشۋ ءۇشىن بارلىعىن مەنىڭ بالام ە.سەيدازوۆتىڭ موينىنا ىلۋگە بارلارىن سالدى، سول ءۇشىن سوتتىڭ وزىنە ىقپال جاسادى دەپ ويلايمىن.

سەبەبى سوت:

- «كاسپاكو» جانە «Bi Global» جشس-ءنىڭ جاساعان تۇگەندەۋ تىزىمدەرى (ينۆەنتاريزاتسيوننىە وپيسي) قر قارجى ءمينيسترىنىڭ «بۋحگالتەرلىك ەسەپتى جۇرگىزۋ قاعيدالارىن بەكىتۋ تۋرالى» 2015 جىلعى 31 ناۋرىزداعى № 241 بۇيرىعىنىڭ ( قر ءام-ندە 2015 جىلى 6 مامىردا № 10954 تىركەلگەن)   تۇگەندەۋ جۇرگىزۋ ءتارتىبى تۋرالى 4 تاراۋىنىڭ  61, 65, 67 تارماقتارىن ورەسكەل بۇزا وتىرىپ جاسالعانىنا;

-تۇگەندەۋ ءتىزىمىن جاساۋعا كوميسسيا مۇشەسى رەتىندە قول قويعان  قىزمەتكەرلەردىڭ سوتتا وزدەرىنىڭ تۇگەندەۋگە قاتىسپاعانىن ايتقانىنا،

- تۇگەندەۋ ءتىزىمىن تۇگەندەۋگە قاتىسۋعا بولمايتىن ادامدار جاساعانىنا;

- «كاسپاكو» جانە «Bi Global» جشس-ندە بۋحگالتەرلىك ءىس-قۇجاتتاردىڭ قالاي بولسا سولاي جاسالاتىنىنا، ول قۇجاتتار كىم كورىنگەننىڭ، ءتىپتى سول مەكەمەلەردە جۇمىس ىستەمەيتىن ادامداردىڭ قولىندا جۇرەتىنىنە

- جوعالدى دەگەن ماتەريالداردى ۋچاسكە باسشىلارى قابىلداپ الىپ، بۋحگالتەريا ارقىلى وتكىزىپ، جەتكىزۋشىلەرگە اقشاسىن تولەپ قويىپ، ودان سوڭ  ول ماتەريال جوعالدى دەپ مەنىڭ بالاما جالا جاۋىپ وتىرعانىنا;

- مەنىڭ بالام ە.سەيدازوۆ جۇمىس ىستەمەگەن كەزدە جوعالىپتى دەگەن ماتەريالدى دا مەنىڭ بالامنىڭ موينىنا ىلگەنىنە;

- تۇگەندەۋ ءتىزىمى مەن اۋديت، ساراپتاما جانە سوت ۇكىمى بويىنشا ماتەريالدار مەن شىعىن كولەمى بويىنشا ايىرماشىلىقتارعا

- ءىس بويىنشا ماتەريالداردىڭ جەتكىزۋشى كومپانيالاردان ناقتى الىنعان-الىنباعانىن دالەلدەيتىن قۇجاتتاردىڭ جوقتىعىنا

- سوتتا «كاسپاكو» جانە «Bi Global» جشس-ءنىڭ قىزمەتكەرلەرى ءوز قىزمەتتىك مىندەتتەرى مەن بولعان جاعداي بويىنشا دۇرىس جاۋاپ بەرە الماي،   ماتەريالداردىڭ جوعالۋىنا قالاي جول بەرىلگەنىن تۇسىندىرە الماعانىنا

- قىزمەتكەرلەردىڭ جۇمىسقا دەگەن جاۋاپكەرشىلىگى جوقتىعىنا، ءوز مىندەتتەرىنە نەمقۇرايلىلىعىنا قاراماستان زاڭسىز ۇكىم شىعاردى.

بۇل زاڭسىز ۇكىمنىڭ شىعۋىنا سول جاۋاپسىز قىزمەتكەرلەر ىقپال جاساپ وتىر دەپ ويلايمىن.

قۇرمەتتى دەپۋتاتتار!

مەن قازىر قورعاۋشىمەن بىرگە كاسساتسيالىق سوتقا شاعىم دايىنداۋدامىن. ءالى دە بولسا ادىلدىك زاڭدىلىق بولادى دەپ ۇمىتتەنەمىن.

«كاسپاكو» جانە «Bi Global» جشس-ندە جاسالعان جالعان قۇجاتتاردىڭ نەگىزىندە سوتتىڭ زاڭ تالاپتارىن بۇزا وتىرىپ شىعارعان ۇكىمىن قوعام تالقىسىنا سالىپ، تالقىلاۋ ءۇشىن جۋرناليستەرگە اقپارات بەرۋگە ءماجبۇر بولىپ وتىرمىن.

جانە سوتتاعى ادىلەتسىزدىككە، BI-GROUP حولدينگىنىڭ ەنشىلەس كومپانيالارىنداعى تالان-تاراج بەن قارجىلىق زاڭسىزدىقتارعا باعا بەرۋ ءۇشىن سىزدەرگە، دەپۋتاتتارعا وسى حاتىمدى جولدايمىن.

ارينە ءسىز سوت ۇكىمى بار ەكەن دەپ مەنىڭ بالامنىڭ تاعدىرىنا ارالاسپاۋىڭىز مۇمكىن.

بىراق بۇكىر رەسپۋبليكا اۋماعىندا مەملەكەت قارجىسىنا مەكتەپتەر سالىپ جاتقان BI-GROUP حولدينگىنىڭ قالاي جۇمىس ىستەيتىنى تۋرالى اقپارات سىزدەرگە ماڭىزدى بولۋى ءتيىس دەپ ويلايمىن!

مەملەكەتتەن تاپسىرىستار الىپ، الەۋمەتتىك قۇرىلىستار – مەكتەپ، ەمحانا سياقتى ءىرى قۇرىلىستاردى سالىپ جاتقان حولدينگتەگى قارجى، ماتەريالدىق قۇندىلىقتارعا جاۋاپتى ادامداردىڭ جاۋاپسىزدىعى تۋرالى، قاتاڭ ەسەپتە بولۋى ءتيىس قۇجاتتاردىڭ قالاي بولسا سولاي جاسالاتىنىن، ءتارتىپتىڭ جوقتىعى تۋرالى ءبىلۋىڭىز كەرەك.

بۇنىڭ ارتىندا مەملەكەت قارجىسىن جىمقىرۋ، تالان-تاراجعا سالۋ،   ودان دا ماڭىزدىسى سالىنعان قۇرىلىس وبەكتىلەرىنىڭ دۇرىس سالىنباۋى، قاۋىپسىزدىك ماسەلەسى تۇرعانىنا اسا كوڭىل ءبولىڭىز.

سوتتا «كاسپاكو» جانە «Bi Global» جشس-ءنىڭ مەنىڭ بالامنان ماتەريالدى قابىلداپ الىپ، ناكلادنويلارعا قول قويىپ بەرگەن لدەتاەۆ، ارىستانبەكوۆ دەگەن قىزمەتكەرلەر «ول ماتەريالداردى كورگەن جوقپىز، سەيدازوۆقا سەنىپ قول قويدىق» دەپ جاۋاپ بەردى.

مەنىڭ بالامدى بۇرىن تانىمايتىن، بىلمەيتىن، تانىستىق-تۋىستىعى جوق ادامدار جۇمىسقا جاڭا كەلگەن ادامعا سەنىپ قالاي ميلليونداعان اقشانىڭ قۇجاتتارىنا قول قويىپ بەرە بەرەدى؟ بۇل جاۋاپسىزدىق پا؟ جاۋاپسىزدىق!

جانە وسى جاۋاپسىزدىقتى سوت ول  قىزمەتكەرلەر ءۇشىن قالىپتى جاعداي دەپ سانادى ەكەن. ولاردىڭ سوتتا ايتقانى «ءبىز ءبىر-بىرىمىزگە سەنىپ، تەكسەرمەي جۇمىس جاساي بەرەمىز» دەگەنىنە سەنە سالدى. بۇل سىبايلاسىپ قىلمىس جاساۋعا جول اشۋ دەپ سانايمىن!

ەگەر ول ولاردىڭ جەكە اقشاسى بولسا ءبارى ءبىر، بىراق مەملەكەتتىڭ تاپسىرىسىمەن مەملەكەتتىڭ قارجىسىنا مەملەكەتتىك مەكتەپتەر سالىنىپ جاتقانىن سوت مۇلدە ەلمەدى. مەملەكەتتىڭ اقشاسى وڭدى-سولدى شاشىلىپ جاتقان جوق پا دەگەن سۇراقتى قويمادى؟

سىزدەرگە ادۆوكاتتىڭ جازعان اپەللياتسيالىق شاعىمى جولدانعان.

اپەللياتسيالىق شاعىمدا «كاسپاكو» جانە «Bi Global» جشس-ءنىڭ   قىزمەتكەرلەرىنىڭ بۋحگالتەرلىك ەسەپ بويىنشا قانداي زاڭداردى بۇزىپ  قۇجاتتار جاساعانى، سوتتا قانداي جاۋاپ بەرگەنى، جالپى وسى ەكى مەكەمەدە جۇمىستىڭ قالاي جۇرەتىنى تۋرالى تولىق سيپاتتالعان.

ءىس بويىنشا ءمان-جايلاردى انىقتاپ سۇراعىڭىز كەلسە، جەكە كەزدەسۋگە كەلۋگە دايىنبىز.

وسى حاتىمدى وقىپ، ءمان-جايلاردى تەكسەرىپ، ءوز قورىتىندىڭىزدى جاساۋىڭىزدى سۇرايمىن.

BI-GROUP حولدينگى مەملەكەت قارجىسىنا سالعان قۇرىلىس وبەكتىلەرىنىڭ اسا قىمبات باعاعا سالىناتىندىعى تۋرالى قوعامدا ايتىلىپ جۇرگەن وي-پىكىرلەردىڭ باستى سەبەبىنىڭ ءبىرى – حولدينگ كومپانيالارىنداعى  زاڭسىزدىقپەن اقشا يگەرۋ بولىپ تابىلادى دەپ ويلايمىز.

سوندىقتان BI-GROUP حولدينگىنىڭ مەملەكەت قارجىسىن يگەرۋدەگى ءىس-ارەكەتىنە  سوڭعى 5 جىلدىق كولەمدە تەكسەرۋ جۇرگىزۋگە باستاما جاساۋدى سۇرايمىن.

سول تەكسەرۋدىڭ ناتيجەسىندە بالام ە.سەيدازوۆتىڭ ءىسى بويىنشا ورىن العان زاڭسىزدىقتاردى اشۋعا جانە ءادىل، زاڭدى شەشىمگە قول جەتكىزۋگە مۇمكىندىك بولادى دەپ سەنەمىن.

ءارى مەملەكەت قارجىسىن ماقساتتى، ۇنەمدى جۇمساۋ، قۇرىلىس وبەكتىلەرىنىڭ ساپالى سالىنۋى قامتاماسىز ەتىلەتىن بولادى.

اتا-انا جانە قوعامدىق قورعاۋشى كاميلا نۋرماحانوۆا، اشيرحان سەيدازوۆ

ەسكەرتۋ: ماقالادا اتى اتالاتىن زاڭدى نەمەسە جەكە تۇلعالار رەداكتسيامىزعا جاۋاپ بەرۋگە نيەتتى بولسا، ولاردىڭ دا پىكىرلەرىن ۇسىناتىن بولامىز.

Abai.kz