بۇگىن تۇندە الماتىدا ەلدى شىرت ۇيقىدان سىلكىپ تۇرعىزعان جەر سىلكىنىسى بولدى. ۇرەيلەنگەن حالىق جەڭىل-جەلپى كيىممەن سىرتقا شىعىپ كەتتى، كوپقاباتتى ۇيلەردە تۇراتىن تۇرعىندار قالانىڭ سىرتىنا قاراي اعىلىپ، كوشەلەردە قالىڭ كەپتەلىس ورنادى.

تاكسي باعالارى شارىقتاپ، جانارماي قۇيۋ بەكەتتەرىندە ۇزىن-سونار كەزەك پايدا بولدى.

(سۋرەت: Abai.kz پورتالىنىكى)

توتەنشە جاعدايلار دەپارتامەنتىنىڭ مالىمەتىنشە، جەر سىلكىنىسىنىڭ كۇشى - 5 بالل.

«تجم «ننتسسن جانە ي» جشس سەيسميكالىق ستانتسيالار جەلىسىمەن 2024 جىلعى 23 قاڭتاردا الماتى ۋاقىتىمەن 00 ساعات 09 مين 02 سەك (2024 جىلعى 22 قاڭتاردا گرينۆيچ بويىنشا 18 ساعات 09 مين 02 سەك) جەر سىلكىنىسى تىركەلدى. 

جەر سىلكىنىسىنىڭ ەپيتسەنترى الماتى قالاسىنان وڭتۇستىك-شىعىسقا قاراي 264 كم جەردە ورنالاسقان قازاقستان مەن قىرعىزستان شەكاراسى.
جەر سىلكىنىسىنىڭ ەنەرگەتيكالىق كلاسى 15.1. MPV ماگنيتۋداسى 6.7. ەپيتسەنتردىڭ كوورديناتتارى 41.22° س. ە. 78.65° ش. ب. تەرەڭدىگى 65 كم. سەزىلەتىندىگى تۋرالى مالىمەتتەر (دسم-64 شكالاسى بويىنشا): الماتى 5 بالل»،- دەپ حابارلادى توتەنشە جاعدايلار دەپارتامەنتىنىڭ ءباسپاسوز قىزمەتى.

(سۋرەت: قازتاگ-تىكى)

تۇنگى ساعات 00:20-دان باستاپ الماتى اكىمى ەربولات دوساەۆ جەدەل شتاب كەڭەسىن وتكىزىپ، قالادا حالىقتى جيناۋ پۋنكتتەرىنىڭ قۇرىلعانىن حابارلادى. قالا ءتارتىبىن قاداعالايتىن پوليتسيانىڭ سانى ارتىپ، كۇشەيتىلگەن رەجيمدە جۇمىس ىستەپ جاتىر. مەكتەپ، كوللەدج، بالاباقشا عيماراتتارى شتاتتىق رەجيمگە كوشتى.

«جەدەل مەديتسينالىق جاردەم قىزمەتى جانە بارلىق كوپبەيىندى ستاتسيونارلار، ونىڭ ىشىندە مامانداندىرىلعان ستاتسيونارلار، بالالار ستاتسيونارلارى، قالانىڭ بوساندىرۋ ۇيىمدارى كۇشەيتىلگەن رەجيمگە كوشتى. جالعان اقپاراتقا سەنبەۋلەرىڭىزدى جانە تاراتپاۋلارىڭىزدى سۇرايمىز. تەك رەسمي دەرەككوزدەرگە سەنۋگە شاقىرامىز»، - دەپ حابارلادى اكىمدىك.

(سۋرەت: Polisia.kz-تىكى)

تۇنگى ساعات 03:00 ۋاقىتىندا جەر سىلكىنىسىنىڭ سالدارىنان 8 ادامنىڭ زارداپ شەككەنى ايتىلدى. 3 ادام كوپقاباتتى ۇيلەردىڭ تەرەزەسىنەن سىرتقا سەكىرىپ كەتكەن، ءبىر تۇرعىن اۋىر جاراقاتپەن اۋرۋحاناعا تۇسكەن.

«جاراقات العان ءۇش ادام تۇرعىن ۇيلەردىڭ 2 جانە 3 قاباتىنان سەكىرگەن. مەديتسينالىق تەكسەرىستەن كەيىن ەكەۋى امبۋلاتوريالىق ەمدەلۋگە جىبەرىلدى. ءۇشىنشى ناۋقاستىڭ جاعدايى اۋىر، قازىر ول اۋرۋحانادا جاتىر.ۇيدەن جۇگىرىپ شىققان بەس ادام جاراقات الدى. بارلىق قاجەتتى مەديتسينالىق كومەك كورسەتىلگەننەن كەيىن ولار دا امبۋلاتوريالىق ەمدەۋگە جىبەرىلەدى»، - دەپ حابارلادى باسقارمادان.

كەيىن دەنساۋلىق ساقتاۋ مينيسترلىگى تۇنگى ساعات 1-دەن بەرى ءتۇرلى دارەجەدەگى جەڭىل جانە ورتاشا دارەجەدەگى جاراقات العان ادامداردىڭ سانىن جاريالادى: 44 ادام مەديتسينالىق كومەككە جۇگىنگەن.

ولاردىڭ ىشىندە باستىڭ كوگەرۋى، دەنەنىڭ تىرىسۋى جانە اياق-قولداردىڭ سوزىلۋى سەكىلدى جاراقاتتار بولعان. ءتۇرلى بەلگىلەرمەن ولار قالالىق اۋرۋحانالارعا جەتكىزىلدى. ونىڭ 34-ءى ەرەسەكتەر. 3 ادام اۋرۋحاناعا جاتقىزىلدى، تاعى 31 ادام امبۋلاتورلىق ەمدەۋگە جىبەرىلدى. سونداي-اق 10 بالاعا مەديتسينالىق كومەك كورسەتىلدى، ونىڭ 5-ەۋى اۋرۋحاناعا جاتقىزىلسا، تاعى 5 بالا امبۋلاتورلىق ەمدەلۋگە جىبەرىلدى.

الماتىداعى قۋاتتى جەر سىلكىنىسى كەزىندە قالا تۇرعىندارىنا SMS حابارلاما كەلمەگەن جانە قالا بويىنشا دابىل قوسىلماعان.

(سۋرەت: 716.kz-تەن الىندى)

دابىل نەگە قوسىلمادى؟ حابارلاما نەگە كەشىكتى؟ اتىعاەۆتىڭ تۇسىندىرمەسى

مۇنىڭ سەبەبىن الماتى قالالىق توتەنشە جاعدايلار دەپارتامەنتىنىڭ باسشىسى نۇرلان اتىعاەۆ ءتۇسىندىردى. ونىڭ سوزىنشە، SMS حابارلامالاردى جەدەل جىبەرگەندە، بۇل دەرەكتەر قالا تۇرعىندارىنا كەش جەتەدى. بۇل حالىق تىعىزدىعىمەن بايلانىستى.

«ۇيالى بايلانىس وپەراتورلارىنىڭ اقپاراتتى وڭدەۋگە ۋاقىتى جوق، سايكەسىنشە جەدەل اقپارات كەش كەلەدى»، - دەدى نۇرلان اتىعاەۆ.

(سۋرەت: ۆيدەو سكرينى)

ال دابىل نەلىكتەن قوسىلماعان دەگەن سۇراققا، ۇلتتىق سەيسمولوگيالىق باقىلاۋلار مەن زەرتتەۋلەر عىلىمي ورتالىعىنىڭ ديرەكتورى داۋلەت سارسەنباەۆ: «الماتىدا جەر سىلكىنىسى كەزىندە ىسكە قوسىلاتىن 843 ەلەكتر دابىل قۇرىلعىسى بار. ولار جەر ءدۇمپۋى 5 باللدان اسقان كەزدە عانا قوسىلادى»، - دەدى.

ايتۋىنشا، دابىل قوسىلسا تۇرعىندار اراسىندا دۇربەلەڭ ودان ءارى ءورشىپ كەتەر ەدى.

«تۇندە دابىلدى قوسۋ قاجەتتىلىك تۋدىرعان جوق. سەبەبى، بىزدە 5 بالل دەڭگەيىندە بولدى. سونداي- اق ول قوسىلسا تۇرعىندار اراسىندا دۇربەلەڭ تۋدىراتىن ەدى»، - دەدى ول.

الماتىدا تاڭەرتەڭگى ساعات 5 پەن 7 ارالىعىندا 2-3 بالدىق جەراستى دۇمپۋلەرى بولىپ ءوتتى. تجم مالىمەتى بويىنشا جەر سىلكىنىسىن الماتىدان باسقا شىمكەنت، استانا، شىعىس قازاقستان، جامبىل، جەتىسۋ، قاراعاندى ​​وبلىستارى تۇرعىندارى سەزگەن.

جەر دۇمپۋلەرىنە قاتىستى الەۋمەتتىك جەلىلەردە جالعان اقپاراتتار تاراپ كەتتى. ءال-فارابي اتىنداعى قازاق ۇلتتىق ۋنيۆەرسيتەتىنىڭ جاتاقحانالارى قيرادى دەگەن حاباردى ۋنيۆەرسيتەتتىڭ ءباسپاسوز قىزمەتى جوققا شىعاردى.

«قازۇۋ-دىڭ جاتاقحانالارى، ونىڭ ىشىندە N6, 8 جاتاقحانالاردىڭ قيراۋى مەن قازا تاپقاندار تۋرالى اقپارات شىندىققا جاناسپايدى. قازا تاپقاندار مەن جاتاقحانا قيراعان وقيعا بولعان جوق»، - دەلىنەدى قازۇۋ تاراتقان حابارلامادا.

(سۋرەت: قر تجم-عا تيەسىلى)

الماتىداعى جەر سىلكىنىسىنەن ەشقانداي عيمارات بۇلىنبەدى. بۇنى توتەنشە جاعدايلار ءمينيسترى سىرىم ءشارىپحانوۆ ۇكىمەت وتىرىسىندا ايتتى.

«سەيسمولوگيالىق باقىلاۋلار مەن زەرتەتۋلەر ۇلتتىق ورتالىعىنىڭ دەرەگى بويىنشا، 23 قاڭتار تۇنگى ساعات 0.09-دە الماتىدان وڭتۇستىك-شىعىسقا قاراي 264 شاقىرىم جەردە، قىتاي حالىق رەسپۋبليكاسى مەن قىرعىز رەسپۋبليكاسى شەكاراسىندا جەر سىلكىنىسى تىركەلدى. تاڭعى ساعات 7.00-دەگى جاعداي بويىنشا 3 ەلەۋلى سەيسميكالىق جاعداي تىركەلگەن. الماتى قالاسىنداعى ماكسيمالدى سەزىلۋى - 5 بالل، شىمكەنت قالاسىندا، جامبىل وبلىسىندا 2-3 بالل، جەتىسۋ وبلىسىندا بولدى. الدىن الا مالىمەت بويىنشا بۇلىنگەن عيماراتتار مەن قۇرىلىستار بولعان جوق»، - دەدى سىرىم ءشارىپحانوۆ.

ال ۇلتتىق سەيسمولوگيالىق باقىلاۋلار مەن زەرتتەۋلەر عىلىمي ورتالىعىنىڭ ديرەكتورى داۋلەت سارسەنباەۆ الماتىدا جاقىن ۋاقىتتا جويقىن جەر سىلكىنىسى بولمايتىنىن ايتادى.

«الماتىنىڭ تۇرعىندارى مەن قوناقتارىن جاقىن ارادا جويقىن جەر سىلكىنىسى كۇتىلمەيتىنىنە سەندىرگىم كەلەدى. بۇگىن بولعان سەيسميكالىق وقيعا قحر مەن قىرعىزستان رەسپۋبليكاسىنىڭ اۋماعىندا بولدى. الماتى مەن الماتى وبلىسىنىڭ تۇرعىندارى، جەتىسۋ وبلىسىنىڭ ءبىر بولىگىندە سەزىلگەن سىلكىنىستەر «افتەرشوك» بولىپ تابىلادى. ورتالىق ازيانىڭ بارلىق دەرلىك ەلدەرى سەيسميكالىق وقيعانى سەزىندى. قازىرگى ۋاقىتتا 10-نان استام افتەرشوك تىركەلدى، ونىڭ ىشىندە الماتى تۇرعىندارى 2 افتەرشوكتى سەزىندى. بايبالامعا سالىنۋدىڭ ەشقانداي سەبەبى جوق»، - دەدى ول.

Abai.kz