اۋحاديەۆ كەڭەسكە 86 جىل!

مەملەكەت قايراتكەرى كەڭەس مۇستاحانۇلى اۋحاديەۆ الماتى قالاسى سوۆەت اۋداندىق پارتييا كوميتەتىنىڭ ءبىرىنشى حاتشىسى قىزمەتىندە سوكپ وك ساياسي بيۋروسىنىڭ مۇشەسى، قازاقستاننىڭ ءبىرىنشى باسشىسى دىنمۇحامەد احمەتۇلى قوناەۆقا (پارتبيلەتتى اۋىستىرۋ كەزىندە №00000011) ياعني وڭ ءبىرىنشى بيلەتتى تاپسىرۋ سالتاناتىندا مەن قازاق تەلەۆيزياسىنىڭ ارناۋلى ءتىلشىسى رەتىندە تەلەۆيزيالىق كورىنىستى بەينەبايان ازىرلەپ، سۇحبات العان ەدىم.

بۇل قوعام ومىرىندەگى تاريحي وقيعا. 1973 جىل. سول ساتتە ءبىرىنشى حاتشى كەڭەس مۇستاحانۇلى ديمەكەننىڭ الدىندا قاتتى تولقىپ تۇردى. وسى كورىنىستە ديماش احمەتۇلىنىڭ اق باتاسىن الدى. د. قوناەۆتىڭ سەنىمدى سەرىكتەسى ءارى لايىقتى ءىزباسارى بولا ءبىلدى. كەيىننەن الماتى قالاسىنىڭ مەرى-توراعاسى، الماتى وبلىستىق پارتيا كوميتەتىنىڭ ءبىرىنشى حاتشىسى قىزمەتتەرىن ابرويمەن اتقاردى. بۇل ديماش احمەتۇلىنىڭ كادر ساياساتىنداعى كورەگەندىك ىستەرىنىڭ ءبىرى، تىكەلەي قامقورلىعىندا بولدى.

الماتى قالاسى جانە وبلىستىڭ ىرگەلى ىستەرىنىڭ باسى-قاسىندا ءجۇردى. د. قوناەۆتىڭ تىكەلەي باسشىلىعىنىڭ ارقاسىندا الماتى قالاسىنداعى بىرنەشە ساۋلەت عيماراتتارى مەدەۋ، قازاقستان قوناق ءۇيى، پيونەرلەر سارايى، قاپشاعاي قالاسى، قاپشاعاي تەڭىزى، ۇلكەن الماتى كانالى، بارتوعاي سۋ قويماسى سالىندى. سول يگى ىستەردىڭ باسىندا قايراتكەر كەڭەس اۋحاديەۆ جۇرگەن ەدى. ءومىرىنىڭ سوڭعى جىلدارى د.ا. قوناەۆتىڭ ەسىمىن ماڭگى ساقتاۋعا ارنالعان ءىس-شارالاردىڭ ورتاسىندا (قوناەۆ قورىنىڭ) ءجۇردى.

وسىدان بىرنەشە جىل بۇرىن قىزىلوردا وبلىسىنىڭ اكىمى بولاتبەك قۋاندىقوۆتىڭ ارنايى شاقىرۋىمەن وبلىسقا تاۋەلسىز قازاقستاننىڭ تۇنعىش پرەمەرى ۇزاقباي كارامانوۆ، مەملەكەت قايراتكەرى كەڭەس اۋحاديەۆ، اكادەميك-دارىگەر كامال ورمانتاەۆتى اۋەجايدان كۇتىپ-الۋ، بىرگە ءجۇرۋ، كەزدەسۋ شارالارىن ۇيىمداستىرۋ ماعان (ول كەزدە وبلىس اكىمىنىڭ ورىنباسارى قىزمەتىندەمىن) تاپسىرىلعان ەدى. «سىر الاشتىڭ اناسى» دەپ اتالعان وڭىردە كيەلى ورىنداردا، قورقىت بابا كەسەنەسىندە، ايگىلى شايىر تۇرماعانبەت اۋىلىندا، مارال بابا كەسەنەسىندە، بايقوڭىر قالاشىعىندا (بۇل ايماقتا اكادەميك كامال ورمانتاەۆ تۋىپ وسكەن) ودان ءارى ارال اۋدانىندا (ۇزاقباي كارامانوۆتىڭ تۋعان اۋىلى) كىشى ارال، امانوتكەل سۋ توسپا ايلىقتارىندا بولدى، حالىقپەن كەزدەستى.

كەڭەس اۋحاديەۆ سىر ءوڭىرىنىڭ كيەلى توپىراعىندا قازاق حاندىعىنىڭ ءتورت استاناسى بولعان (سىعاناق، جانكەنت، ساۋران، قىزىلوردا) تاريحي ورىندار، ۇلى تۇلعالار مۇستافا شوقاي، تەمىربەك جۇرگەنوۆ تۋرالى ماعىنالى انگىمەلەر ايتقان ەدى كەزدەسۋلەردە. ەلى ءۇشىن قاجىماس ەڭبەكتىڭ ۇلگىسىن كورسەتكەن، حالىقتىڭ قۇرمەتىنە بولەنگەن دىنمۇحامەد قوناەۆ تا، ۇزاقباي كارامانوۆ تا، مىنە، كەڭەس اۋحاديەۆ تە ماڭگىلىك كەلمەس ساپارعا اتتاندى. بۇگىن، ياعني وسىدان ەكى جىل بۇرىن ءدال وسى كۇنى كەڭەس مۇستاحانۇلى دا دۇنيەدەن وزعان ەدى.

بۇل تاعدىر. «جازىمىشتان وزىمىش جوق». ۇلكەن تۇلعالاردىن جاندارى جاننەتتە، پەيىشتىڭ تورىنەن ورىن الىپ اللا الدىنان جارىلقاسىن. ءاۋمين!

ەرجان ءۋايىس،

قازاقستاننىڭ ەڭبەك سىڭىرگەن قايراتكەرى.

ىستانبۇل.

سۋرەتتە: كەڭەس اۋحاديەۆ، ۇزاقباي كارامانوۆ، كامال ورمانتاەۆ، ەرجان ءۋايىس.

Abai.kz