ءماجىلىس توراعاسى ەرلان قوشانوۆ رەسەي فەدەراتسياسىنا رەسمي ساپارى اياسىندا قازان قالاسىنا بارىپ، تاتارستان رەسپۋبليكاسىنىڭ رايسى رۋستام ميننيحانوۆپەن جانە تاتارستان مەملەكەتتىك كەڭەسىنىڭ توراعاسى فاريد مۋحامەتشينمەن كەزدەستى.

كەزدەسۋدە ەرلان قوشانوۆ تاتارستان رەسپۋبليكاسىنىڭ رايسى رۋستام ميننيحانوۆقا جۋىردا عانا قازاندا وتكەن «بولاشاقتىڭ ويىندارى» حالىقارالىق ءتۋرنيرىنىڭ سالتاناتتى اشىلۋىنا قاتىسقان قازاقستان پرەزيدەنتى قاسىم-جومارت توقاەۆتىڭ جىلى لەبىزىن جەتكىزدى.

– بۇل – شىن مانىندە سپورتتى، عىلىمدى جانە تەحنولوگيانى بىرىكتىرەتىن وتە كرەاتيۆتى شەشىم. وسى تاجىريبەنى ءارتۇرلى سالادا ءىس جۇزىندە قولدانۋ زور مۇمكىندىكتەرگە جول اشادى. سوندىقتان پرەزيدەنتىمىز كەلەسى «بولاشاقتىڭ ويىندارىن» قازاقستاندا وتكىزۋدى ۇسىندى، – دەدى ءماجىلىس سپيكەرى.

فوتو: ت.تانىباەۆ

ەرلان قوشانوۆ وڭىرارالىق ءوزارا ءىس-ارەكەت تۋرالى ايتا كەلە، تاتارستان رەسەيدىڭ جەتەكشى ونەركاسىپتىك ايماقتارىنىڭ ءبىرى جانە ءبىزدىڭ ەلىمىز ءۇشىن ماڭىزدى سەرىكتەس ەكەنىن اتاپ ءوتتى. بۇگىندە قازاقستاندا «تاتنەفت» (شينا زاۋىتى، بۋتاديەن ءوندىرىسى), «تەمپو» (ۇلكەن ديامەترلى تىك تىگىستى قۇبىرلار ءوندىرىسى), «كاماز» (جۇك كولىكتەرىن قۇراستىرۋ) جانە باسقا دا ءىرى كومپانيالار ءوز وندىرىستەرىن ىسكە قوستى.

تاراپتار ىنتىماقتاستىقتى، اسىرەسە، جوعارى تەحنولوگيالار سالاسىنداعى سەرىكتەستىكتى كەڭەيتۋ مۇمكىندىكتەرىن تالقىلادى. ءماجىلىس سپيكەرى وسىعان بايلانىستى پرەزيدەنت قاسىم-جومارت توقاەۆ قازاقستاندى «IT-مەملەكەتكە» اينالدىرۋ جونىندە ستراتەگيالىق مىندەت قويعانىن ايتتى.

فوتو: ت.تانىباەۆ

ءوز كەزەگىندە رۋستام ميننيحانوۆ قازاقستان پرەزيدەنتىمەن كەزدەسۋدى ەرەكشە ىقىلاسپەن ەسكە الىپ، قازاق جانە تاتار حالىقتارىنىڭ تاريحي-مادەني دەڭگەيدەگى جاقىندىعىن اتاپ ءوتىپ، قازاقستان مەن تاتارستان IT-پاركتەرىنىڭ الەۋەتىن بىرىكتىرۋدى ۇسىندى.

كەزدەسۋ سوڭىندا تاتارستان رايسى قازاقستان باسشىلىعىنىڭ بيىل استانادا «ۇلى دالا ءدۇبىرى» ۇرانىمەن وتەتىن بەسىنشى دۇنيەجۇزىلىك كوشپەندىلەر ويىندارىنا شاقىرۋىن ريزاشىلىقپەن قابىلدادى.

فوتو: ت.تانىباەۆ

ساپار بارىسىندا ءماجىلىس توراعاسى تاتارستان رەسپۋبليكاسى مەملەكەتتىك كەڭەسىنىڭ توراعاسى فاريد مۋحامەتشينمەن كەزدەسىپ، قازاقستان دەپۋتاتتارىنىڭ زاڭ شىعارۋ جۇمىسى تۋرالى ايتىپ بەردى. اسىرەسە، جاڭا سالىق، بيۋدجەت، قۇرىلىس جانە سۋ كودەكستەرىنە، حالىقتىڭ شامادان تىس نەسيە الۋىن تومەندەتۋ، لۋدومانيامەن كۇرەس، ايەلدەر مەن بالالاردى قورعاۋ جونىندەگى زاڭ جوبالارىنا توقتالدى.

سونداي-اق ول ارىپتەستەرىن مەملەكەتتىك كەڭەستىڭ 30 جىلدىعىمەن قۇتتىقتاپ، العا قويعان ماقساتتارىن جۇزەگە اسىرۋدا تولاعاي تابىس تىلەدى.

فوتو: ت.تانىباەۆ

– بىزگە پارلامەنتارالىق بايلانىستى دامىتىپ، جيعان تاجىريبەمەن الماسۋ وتە ماڭىزدى. دەپۋتاتتار جوعارى دەڭگەيدە قول جەتكىزىلگەن كەلىسىمدەردىڭ جۇزەگە اسۋىنا جان-جاقتى اتسالىسۋعا ءتيىس. بۇگىنگى تاڭدا قازاقستان-رەسەي قارىم-قاتىناسىنىڭ نەگىزىن وڭىرارالىق ىنتىماقتاستىق قۇرايدى. قازاقستان مەن رەسەي فەدەراتسياسىنىڭ 89 سۋبەكتىسىنىڭ 76-سىمەن تىكەلەي ساۋدا-ەكونوميكالىق بايلانىس بەلسەندى تۇردە دامىپ كەلەدى. ولاردىڭ ىشىندە تاتارستان كوش باستاپ تۇر، – دەدى ەرلان قوشانوۆ.

سونىمەن قاتار تاراپتار قازاقستان مەن تاتارستان اراسىنداعى مادەنيەت پەن ءبىلىم سالاسىنداعى ىنتىماقتاستىقتى تالقىلادى.

– ءبىزدىڭ ورتاق قۇندىلىقتارىمىز كوپ – ءدىنىمىز، سالت-ءداستۇر مەن ادەت-عۇرپىمىز ءبىر، ءتىلىمىز دە ۇقساس. مۇحتار اۋەزوۆتىڭ شىعارمالارى تاتار تىلىنە اۋدارىلعان. بيىل تاتار تىلىندە قازاق حالىق ەرتەگىلەرىنىڭ جيناعى شىعارىلادى. ءبىزدىڭ ەلىمىزدە ۇلى تاتار اقىندارى عابدوللا توقاي مەن مۇسا جالەلگە ەسكەرتكىشتەر ورناتىلدى. قازاقستاندا جىل سايىن سابانتوي كەڭىنەن اتاپ وتىلەدى. تاتارستان ۋنيۆەرسيتەتتەرىندە وقيتىن قازاقستاندىق ستۋدەنتتەر – ءبىزدىڭ حالىقتار اراسىنداعى التىن كوپىرىمىز، – دەدى ەرلان قوشانوۆ.

ءوز كەزەگىندە فاريد مۋحامەتشين ءوزارا مادەني جانە تۋريستىك بايلانىستى نىعايتۋعا شاقىردى. ول سونداي-اق ماسەلەلەردى شەشۋ جانە ناقتى جوبالاردى جۇزەگە اسىرۋداعى پارلامەنتشىلەردىڭ تۇراقتى ديالوگىنىڭ ماڭىزدىلىعىن اتاپ ءوتتى.

رەسمي ساپار اياسىندا ءماجىلىس دەلەگاتسياسى قازان كرەملىندە بولدى، ب.رامەەۆ اتىنداعى IT-پارك جوبالارىمەن، سونداي-اق IT ماماندار دايارلايتىن «21 مەكتەپ» جۇمىسىمەن جانە رەسەيدەگى حيميا ونەركاسىبىنىڭ كوشباسشىلارىنىڭ ءبىرى – «تەحنوپوليس حيمگراد» يننوۆاتسيالىق يندۋستريالىق پاركىنىڭ وندىرىستىك الاڭدارىمەن تانىستى.

ءماجىلىستىڭ ءباسپاسوز قىزمەتى، فوتو: ت.تانىباەۆ.

Abai.kz