وسى اپتاداعى قازاقستان قوعامىن ءدۇر سىلكىنتكەن جايت ەكس-مينيستر قۋاندىق بيشىمباەۆتىڭ سوتى بولدى.

باس پروكۋراتۋرا قۋاندىق بيشىمباەۆقا قاتىستى قىلمىستىق ءىس بويىنشا سوتقا دەيىنگى تەرگەپ-تەكسەرۋ ناتيجەلەرىنە كۇمان كەلتىرەتىن ماتەريالداردىڭ ەلىمىزدىڭ مەديا الاڭىندا جاريالانۋىنا بايلانىستى الاڭداۋشىلىق ءبىلدىردى.

قر باس پروكۋراتۋراسى وسىعان قاتىستى:

«مەديا-كەڭىستىكتە قۋاندىق بيشىمباەۆقا قاتىستى قىلمىستىق ءىس بويىنشا سوتقا دەيىنگى تەرگەپ-تەكسەرۋ ناتيجەلەرىنە كۇمان كەلتىرەتىن ماتەريالدار جاريالانۋدا. مۇنداي مالىمەتتەردى تاراتۋ ونىڭ ناقتى ءىس بويىنشا وبەكتيۆتى جانە ءادىل سوت تورەلىگىن جۇزەگە اسىرۋىنا كەدەرگى جاساۋ ماقساتىندا سوتقا اسەر ەتۋ نىسانى رەتىندە باعالانۋى مۇمكىن. قازاقستان رەسپۋبليكاسى قىلمىستىق كودەكسىنىڭ 407-بابىنا سايكەس سوتتىڭ قىزمەتىنە ارالاسۋعا جول بەرىلمەيدى جانە ونداي ارەكەت ءۇشىن جازالانادى» - دەپ مالىمدەدى.

بۇدان بولەك قر باس پروكۋراتۋراسى بىلە تۇرا جالعان مالىمەتتەردى تاراتقانى ءۇشىن قر قىلمىستىق كودەكسىنىڭ 274-بابى بويىنشا قىلمىستىق جاۋاپكەرشىلىك قاراستىرىلعانى دا ەسكەرتە كەتىپ جاساعان حابارلاماسىندا:

«وسىعان بايلانىستى باس پروكۋراتۋرا بارلىق ازاماتتار مەن باق-تاردى زاڭدىلىقتى ساقتاۋعا شاقىرادى، قىلمىستىق قۇقىق بۇزۋشىلىقتار جاساۋدان جانە سوتتىڭ قىزمەتiنە قانداي دا بولماسىن تۇردە ارالاسپاۋدى ەسكەرتەدى»، - دەلىنەدى.

قىلمىستى دەپ تابىلعان قۋاندىق بيشىمباەۆقا قانداي ايىپ تاعىلىپ وتىر؟

2023 جىلعى 9 قاراشادا ەلوردا مەيرامحانالارىنىڭ بىرىندە قايعىلى وقيعا بولدى – سالتانات نۇكەنوۆا دەنە جاراقاتىنان قايتىس بولدى. الدىن الا اقپارات بويىنشا ايەلدى جۇبايى قۋاندىق بيشىمباەۆ ۇرىپ-سوققان. كەيبىر بۇقارالىق اقپارات قۇرالدارىنىڭ حابارلاۋىنشا، زارداپ شەككەن ادامعا دەر كەزىندە مەديتسينالىق كومەك كورسەتىلمەگەن جانە جەدەل جاردەم كەلگەندە ايەل قايتىس بولىپ كەتكەن.

سول كۇنى ءىىم مەيرامحاناداعى توبەلەس فاكتىسىن عانا راستاپ، ايەلدىڭ دەنە جاراقاتىنان قايتىس بولعانىن ايتتى. الايدا پوليتسيا كۇدىكتىنىڭ اتىن اتاۋدان باس تارتتى.

كەيىن قازاقستاننىڭ ىشكى ىستەر ۆيتسە-ءمينيسترى ساكەن سارسەنوۆ قۋاندىق بيشىمباەۆتىڭ ۇستالعانىن راستادى. ال ىشكى ىستەر مينيسترلىگى سالتانات نۇكەنوۆانىڭ ولىمىنە قاتىستى تەرگەۋدى جەكە باقىلاۋعا الدى.

2024 جىلدىڭ قاڭتارىندا قازاقستان ىشكى ىستەر ءمينيسترىنىڭ ورىنباسارى يگور لەپەحا قۋاندىق بيشىمباەۆقا «ايرىقشا قاتىگەزدىكپەن جاسالعان كىسى ولتىرۋدەن» باسقا «ازاپتاۋ» بابى دا جۇكتەلەتىنىن ايتتى.

ەستەرىڭىزگە سالا كەتەتىن جايت: قۋاندىق بيشىمباەۆقا قاتىستى قىلمىستىق ءىس بويىنشا 11 ناۋرىزدا ءبىرىنشى سوت پروتسەسى ءوتتى. 12 ناۋرىزدا سوت تىڭدالىمى ءوز جالعاستىعىن تاپتى. ونىڭ قورىتىندىسى بويىنشا الدا بيشىمباەۆتىڭ ءىسىن القابيلەر قارايتىن بولدى. ايەلى سالتانات نۇكەنوۆانى ءولتىردى دەپ ايىپتالعان بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ ءىسى بويىنشا نەگىزگى سوت تالقىسى 27 ناۋرىزعا بەلگىلەنىپ وتىر.

وسىعان بايلانىستى باس پروكۋراتۋرا بارلىق ازاماتتار مەن باق-تاردى زاڭدىلىقتى ساقتاۋعا ۇندەدى.

Abai.kz