«Reuters» اگەنتتىگى: «اقش ترامپتىڭ كەزىندە قىتاي توراعاسى شي جيپيڭگە قارسى وپەراتسيا جوسپارلاعان»، - دەگەن ماقالا جارياىلادى.

اگەنتتىك دەرەگىنە سۇيەنسەك، 2019 جىلى اقش پرەزيدەنتى رەتىندە دونالد ترامپ ورتالىق بارلاۋ باسقارماسىنا (Central Intelligence Agency) قىتايدا شي توراعا ۇكىمەتىنە قارسى قوعامدىق پىكىر قالىپتاستىرۋ ءۇشىن جاسىرىن وپەراتسيا جۇرگىزۋدى تاپسىرعان.

جوسپار بويىنشا: CIA قىتايلىق الەۋمەتتىك جەلىلەردە جالعان اككاۋنتتار قۇرعان جانە وندا قىتاي بيلىگىنىڭ ارەكەتتەرى تۋرالى بەدەلگە نۇقسان كەلتىرەتىن اقپاراتتار تاراتقان وپەراتيۆتىك توپ جاساقتاعان.

اگەنتتەر قىتاي كوممۋنيستىك پارتياسىنىڭ مۇشەلەرى «زاڭسىز جينالعان اقشانى شەتەلدە جاسىرادى» دەگەن پوستتار جازىپ، قىتايدىڭ «ءبىر بەلدەۋ - ءبىر جول» ينفراقۇرىلىمدىق باستاماسىن ىسىراپشىل جانە سىبايلاس جەمقورلىق دەپ اتاعان.

مۇنداي وپەراتسيا جۇرگىزۋگە سەبەپ: ۆاشينگتوننىڭ قىتايدىڭ الەمدەگى ىقپالىنىڭ ارتۋىنان قورقىنىشى، بەيجىڭ گەوساياسي داۋلاردا دامۋشى ەلدەردىڭ قولداۋىنا قول جەتكىزۋگە تىرىسقانى، سونداي-اق جالعان ۇيىمداردىڭ كومەگىمەن اقش-تىڭ ىشىندە ءبولىنىس جاساۋعا تىرىسقانى تۋرالى بارلاۋ مالىمەتتەرى بولعان.

اگەنتتىك دەرەككوزدەرىنىڭ ايتۋىنشا، CIA اگەنتتەرى قىتاي ۇكىمەتىنە جانە ونىڭ سىرتىندا - وڭتۇستىك-شىعىس ازيا ەلدەرىندە، افريكادا جانە تىنىق مۇحيتتىڭ وڭتۇستىك بولىگىندەگى بەيجىڭ مەن ۆاشينگتون ىقپالى ءۇشىن كۇرەسىپ جاتقان ارالدىق مەملەكەتتەردە جۇرتشىلىقتى قارسى قويۋعا تىرىسقان.

امەريكاندىق بارلاۋ قىزمەتى دە شەتەلدىك باق-قا قحر بيلىگى تاراپىنان جاعىمسىز كورىنىس تاپقان بارلاۋ مالىمەتتەرىن تاراتقان.

«Reuters» اگەنتتىگى: «قولىمىزدا جو بايدەننىڭ اكىمشىلىگى بۇل وپەراتسيانى جالعاستىراتىنى تۋرالى دەرەك جوق»، - دەيدى. سونداي-اق،  اق ءۇيدىڭ ۇلتتىق قاۋىپسىزدىك كەڭەسىنىڭ وكىلدەرىنەن جوعارىداعى دەرەككە قاتىستى تۇسىنىكتەمە الا الماعان.

Abai.kz