550 شەتەل ازاماتىنا قازاقستاندا وقۋعا ءبىلىم گرانتتارى بەرىلدى. كونكۋرستىق ىرىكتەۋگە الەمنىڭ 71 ەلىنەن 16 098 ۇمىتكەر قاتىسقان.

– 2026-2027 وقۋ جىلىنا ارنالعان قازاقستان رەسپۋبليكاسىنىڭ ازاماتتىعى جوق شەتەل ازاماتتارىنا، ونىڭ ىشىندە قازاق ۇلتىنىڭ وكىلدەرىنە ارنالعان مەملەكەتتىك ستيپەنديالىق باعدارلاماسى اياسىنداعى كونكۋرستىق ىرىكتەۋ اياقتالدى. بايقاۋ قورىتىندىسى بويىنشا 550 ستيپەنديا يەگەرىنەن تۇراتىن نەگىزگى ءتىزىم بەكىتىلدى،  – دەپ حابارلايدى Aikyn.kz عىلىم جانە جوعارى ءبىلىم مينيسترلىگىنە سىلتەمە جاساپ.

اتالعان باعدارلاما 2019 جىلدان بەرى جۇزەگە اسىرىلىپ كەلەدى جانە حالىقارالىق اكادەميالىق ىنتىماقتاستىقتى دامىتۋعا، سونداي-اق دارىندى شەتەلدىك جاستاردى قازاقستاننىڭ جەتەكشى جوعارى وقۋ ورىندارىندا ءبىلىم الۋعا تارتۋعا باعىتتالعان.

2026 جىلى باعدارلاما شەڭبەرىندە:

* باكالاۆريات باعدارلامالارى بويىنشا وقۋعا – 490 ءبىلىم بەرۋ گرانتى;

* ماگيستراتۋرا باعدارلامالارى بويىنشا وقۋعا – 50 گرانت;

* دوكتورانتۋرا باعدارلامالارى بويىنشا وقۋعا – 10 گرانت ءبولىندى.

كونكۋرستىق ىرىكتەۋگە الەمنىڭ 71 ەلىنەن 16 098 ۇمىتكەر قاتىستى. قاتىسۋشىلاردىڭ ەداۋىر بولىگىن قازاقستان رەسپۋبليكاسىنىڭ ازاماتتىعى جوق قازاق ۇلتىنىڭ وكىلدەرى – قانداستار قۇرادى. اتالعان ساناتتاعى ازاماتتارعا ارنالعان باعدارلامانى ىسكە اسىرۋ قازاقستاندا ساپالى ءبىلىم الۋعا قولجەتىمدىلىكتى كەڭەيتۋگە جانە تاريحي وتانىمەن بايلانىستى نىعايتۋعا ىقپال ەتەدى.

باعدارلامانى ىسكە اسىرۋعا 886 ءبىلىم بەرۋ باعدارلاماسىن ۇسىنعان قازاقستاننىڭ 27 جوعارى وقۋ ورنى قاتىسادى. ستيپەنديا يەگەرلەرىنىڭ باسىم بولىگى ش.ءۋاليحانوۆ اتىنداعى كوكشەتاۋ ۋنيۆەرسيتەتىندە، Astana IT University-دە، ق.ي.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىندە، ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە، ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە جانە ەلىمىزدىڭ باسقا دا جوعارى وقۋ ورىندارىندا ءبىلىم الادى.

بيىل باعدارلاماعا قاتىسۋشىلاردىڭ گەوگرافياسى ايتارلىقتاي كەڭەيدى. ەگەر 2025 جىلى وقۋعا ۇسىنىلعاندار قاتارىندا 26 ەلدىڭ وكىلدەرى بولسا، 2026 جىلى بۇل كورسەتكىش 49 مەملەكەتكە دەيىن ارتتى. ەڭ كوپ ءوتىنىم پالەستينا، يندونەزيا، رەسەي فەدەراتسياسى، وزبەكستان رەسپۋبليكاسى جانە اۋعانستاننان كەلگەن ۇمىتكەرلەردەن ءتۇستى. العاش رەت ستيپەنديا يەگەرلەرى قاتارىندا اقش، يتاليا، گەرمانيا، مالديۆ رەسپۋبليكاسى جانە كورەيا رەسپۋبليكاسى ازاماتتارى بار.

باعدارلامانى ىسكە اسىرۋ قازاقستاننىڭ ورتالىق ازياداعى ءبىلىم بەرۋ ورتالىعى رەتىندەگى حالىقارالىق بەدەلىن نىعايتۋعا، اكادەميالىق ىنتىماقتاستىقتى كەڭەيتۋگە جانە قازاقستاندىق جوعارى وقۋ ورىندارىنا شەتەلدىك ستۋدەنتتەردى تارتۋعا ىقپال ەتەدى.

Abai.kz