مەملەكەت باسشىسى اقش سەناتورى ستيۆ دەينستى قابىلدادى, دەپ حابارلادى اقوردا.

پرەزيدەنت قاسىم-جومارت توقاەۆ اقش سەناتىنىڭ مۇشەسى ستيۆ دەينسكە ءىلتيپات بىلدىرە وتىرىپ، قازاقستان مەن امەريكانىڭ ىنتىماقتاستىعى ءداستۇرلى تۇردە قارقىندى دامىپ كەلە جاتقانىن اتاپ ءوتتى. سونىمەن قاتار ەكىجاقتى قاتىناستاردا پارلامەنتتىك ديپلوماتيا ماڭىزدى ءرول اتقاراتىنىن ايتتى.

كەزدەسۋ بارىسىندا ساۋدا-ەكونوميكالىق ىقپالداستىق ماسەلەلەرى قاراستىرىلدى. قازاقستان پرەزيدەنتى ەلىمىزدە ينۆەستيتسيا تارتۋ، ەكونوميكانى ىرىقتاندىرۋ جانە ونەركاسىپتى دامىتۋ ىسىنە ەرەكشە نازار اۋدارىلىپ وتىرعانىن مالىمدەدى. قاسىم-جومارت توقاەۆتىڭ ايتۋىنشا، ەنەرگەتيكا، پايدالى قازبالاردى بارلاۋ ءارى وڭدەۋ، ينفراقۇرىلىمدى جاڭعىرتۋ جانە باسقا دا سالالار قازاق-امەريكان قارىم-قاتىناستارىنىڭ نەگىزگى باعىتتارى سانالادى.

سونداي-اق حالىقارالىق جانە وڭىرلىك قاۋىپسىزدىك ماسەلەسىنە باسا ءمان بەرىلدى.

بۇل رەتتە پرەزيدەنت ماسكەۋ وبلىسىنداعى لاڭكەستىك ارەكەتتى قازاقستان الەمدە العاشقىلاردىڭ ءبىرى بولىپ قاتاڭ ايىپتاعانىن جانە وسىنداي قيىن-قىستاۋ كەزەڭدە رەسەيمەن بىرگە ەكەنىن اتاپ ءوتتى.

قاسىم-جومارت توقاەۆتىڭ پىكىرىنشە، بارلىق ەل تەرروريزمگە قارسى كۇرەستە ءوزارا قارىم-قاتىناستارىنداعى قايشىلىقتارعا قاراماستان، ۇلكەن حالىقارالىق كواليتسيا اياسىندا كۇش بىرىكتىرۋگە ءتيىس. قازاقستان وسى ماڭىزدى ىسكە ءوز ۇلەسىن قوسۋعا دايىن.

جاقسىبەك جيەناليەۆ، ساياساتكەر:

- بۇگىن پرەزيدەنت قاسىم-جومارت توقاەۆ، اقش سەناتورى ستيۆ دەينستپەن كەزدەستى. ستيۆ دەينس ساياسات پەن بيزنەستى كەرەمەت ۇيلەستىرە بىلگەن تۇلعا. ساياسي قىزمەتكە كەلمەي تۇرىپ، بيزنەس سالاسىندا 27 جىل جۇمىس جاساعان. ساۋدا-ساتتىق، ەكونوميكا ءتىلىن جاقسى بىلەدى.

بۇل كەزدەسۋ قازاقستان مەن اقش اراسىنداعى ىنتىماقتاستىق پەن سەرىكتەستىككە جول اشاتىن كەزدەسۋ دەسە دە بولادى. قازاقستان ءۇشىن اقش سياقتى بەدەلى جوعارى ەلمەن جاقسى قارىم-قاتىناستا بولۋ وتە ماڭىزدى. بيىل ەكى ەل اراسىنداعى جاقسى قارىم-قاتىناستىڭ جالعاسقانىنا 33 جىل تولادى. وسى 33 جىل ىشىندە، اقش ينۆەستورلارى قازاقستاندا ءىرى جوبالاردىڭ جۇزەگە اسۋىنا ات سالىستى. قازىر ەنەرگەتيكا، پايدالى قازبالاردى وڭدەۋ، ينفراقۇرىلىمدى جاڭارتۋ سياقتى جوبالارعا اقش ينۆەستورلارىنان قولداۋ اۋاداي قاجەت. وسىنداي ەكونوميكالىق باعىتتاعى جوبالاردا قازاق-امەريكان قارىم-قاتىناستارىن كۇشەيتسە يگى بولار ەدى. شەتەلدىك ينۆەستورلارعا قولايلى ينۆەستيتسيالىق كليمات جاساساق، بىرىگىپ جۇمىس جاساۋ بارىسىندا ۇتىلمايتىنىمىز انىق.

بۇگىنگى كىننىڭ باستى تاقىرىبى تەرروريزم ەكەنى بەلگىلى. پرەزيدەنت ماسكەۋدە بولعان لاڭكەستىك ارەكەتكە قاتىستى ءوز ويىن ءبىلدىردى.

قاسىم-جومارت توقاەۆ: «بارلىق ەلگە قارسى كۇرەستە ءوزارا قارىم-قاتىناستارىنداعى قايشىلىقتارعا قاراماستان، ۇلكەن حالىقارالىق كواليتسيا اياسىندا كۇش بىرىكتىرۋگە ءتيىس»، - دەدى.

دۇرىس. تەرروريزم ىندەتىمەن كۇرەسۋدىڭ ءتيىمدى امالى وسى. جاھاندىق قاۋىپ-قاترەگە ەشقانداي ەل جالعىز تۇرا المايدى، تەك كۇش-جىگەرىمىزدى بىرىكتىرۋ ارقىلى عانا قارسى تۇرۋعا بولادى.

Abai.kz