قۇقىق قورعاۋشى، قوعام بەلسەندىسى ايگەرىم قۇسايىنوۆا ينفورمبيۋرو پورتالىنا بەرگەن سۇحباتىندا ءۇي شارۋاسىنداعى ايەلدەردىڭ ەڭبەگىنە اقى تولەنۋى كەرەك ەكەنىن ايتتى. بۇل تۋرالى Abai.kz حابارلايدى.

گەندەرلىك تەڭدىك جانە گەندەرلىك ەكونوميكا بويىنشا ساراپشىنىڭ ايتۋىنشا، قازاقستاندىق ايەلدەر ورتا ەسەپپەن كۇنىنە 4 ساعات 13 مينۋت تەگىن جۇمىس ىستەيدى. بۇل كەي وبلىستاردا التى-جەتى ساعاتقا دەيىن جەتەدى.

"جۇمىس ىستەمەيسىز، بىراق تا ءۇي شارۋاسىنداعى ايەل بولساڭىز دا ءسىزدىڭ كورىنبەيتىن جۇمىسىڭىز بار. ونى عاسىرلار بويى كەلىندىك مىندەتىڭىز دەپ قاراپ كەلدى. بۇل دۇرىس ەمەس، سەبەبى كەلىندىك قىزمەت تۇرمىستاعى قۇلدىق دەپ اتالادى. البەتتە، بۇل قازاق قوعامىنا جات ەستىلەدى. ىدىس جۋ، كىر جۋ، تاماق جاساۋ تەك قانا ايەلدىڭ مىندەتى ەمەس، ونى ءبولىپ ىستەۋ كەرەك. 21-عاسىردا ايەلدەر دە ەركەكتەر سياقتى جۇمىس ىستەيدى، شارشايدى. بىراق تا نەلىكتەن ءالى دە ءۇي شارۋاسىن تەك ايەلدىڭ مىندەتى دەپ ەسەپتەيمىز؟ بۇل بارىپ تۇرعان ادىلەتسىزدىك قوي", – دەدى ساراپشى.

قۇقىق قورعاۋشى بۇل ماسەلەنى مەملەكەت ەسەبىنەن اقى تولەپ شەشۋگە بولاتىنىن ايتتى.

"دۇنيەجۇزىلىك بانكتىڭ ەسەپتەپ قويعان فورمۋلاسى، الگوريتمى دايىن، عىلىمي بازاسى بار. مەملەكەت جۇمىس ىستەگەن ۋاقىتىن ۇستەمەاقى رەتىندە تولەپ بەرىپ وتىرادى. ول اقشانى ايەل ساندىقتىڭ تۇبىنە تىعىپ قويمايدى، اقشا ماكروەكونوميكالىق اينالىمدا جۇرەدى. ايەلدەرگە ءۇي جۇمىسىنداعى ەڭبەگىنە اقى تولەمەگەندىكتەن بۇكىل مەملەكەت 8 ترلن اقش دوللارىن جوعالتىپ وتىر. ەكونوميكادا اقشا كوپ بولعان سايىن مەملەكەت داميدى. سول ءۇشىن بۇدان مەملەكەت تە، ايەل دە، ەركەك تە ۇتادى. سەگىز ساعات جۇمىستان ۇيگە كەلىپ، ءتورت ساعات جۇمىس ىستەگەن ايەل قاجيدى، ەموتسيونالدى شارشايدى. ول كارەراسىن ءوسىرۋدى ويلامايدى، سەبەبى ءۇي جۇمىسى ەلەنبەيدى، مىندەت بولىپ سانالادى. مۇنىڭ ادىلەتسىزدىك ەكەنىن مويىنداپ، مەملەكەت رەتىندە تالاپ ەتۋىمىز كەرەك. ءۇي جۇمىسىن كەلىن جاساۋعا مىندەتتى ەمەس دەپ ايتۋىمىز كەرەك", – دەدى ايگەرىم قۇسايىنقىزى.

Abai.kz