ءماجىلىس دەپۋتاتتارىنىڭ ەكىنشى تولقىنى جاعدايدى باقىلاۋ ءۇشىن سۋ تاسقىنىنان زارداپ شەككەن ايماقتارعا اتتاندى. ولار جەرگىلىكتى تۇرعىندارمەن كەزدەسىپ، جەدەل شتاب جۇمىسىنا قاتىسۋدا.

سۋرەت: ءماجىلىستىڭ ءباسپاسوز قىزمەتى

اباي وبلىسىنان سايلانعان دەپۋتات نۇرتاي سابيليانوۆ سۋ تاسقىنىنا بايلانىستى حالىقتىڭ جاعدايىن ءبىلۋ ءۇشىن وڭىرگە كەلدى. ساپار بارىسىندا اياگوز اۋدانى بوزاي ەلدىمەكەنىندەگى قارعىن سۋ شايىپ كەتكەن كوپىرگە باردى. بۇدان كەيىن كوكپەكتى، جارما اۋداندارىندا بولىپ، سۋعا كەتكەن نىسانداردى كورىپ، جەرگىلىكتى تۇرعىنداردىڭ سۇراقتارىنا جاۋاپ بەردى.

اۋا تەمپەراتۋراسى كۇرت كوتەرىلىپ، قاردىڭ قارقىندى ەرۋىنە بايلانىستى اباي وبلىسىنىڭ ەكى اۋدانىندا جەرگىلىكتى توتەنشە جاعداي جاريالانعان بولاتىن. ايماقتاعى بىرنەشە اۋدان مەن سەمەي قالاسى ماڭىندا سۋ دەڭگەيى كوتەرىلىپ، سالدارىنان كوپىرلەر مەن جولداردى سۋ شايعان. قازىر وبلىس بويىنشا جاعداي تۇراقتاندى. سۋ تاسقىنىنان كەيىن جولدار قالپىنا كەلتىرىلىپ جاتىر.

سۋرەت: ءماجىلىستىڭ ءباسپاسوز قىزمەتى

ءماجىلىس دەپۋتاتتارى ەرلان سايروۆ پەن ۇلىقبەك تۋماشينوۆ سۋ تاسقىنىنىڭ الدىن الۋ بويىنشا اتقارىلىپ جاتقان جۇمىستى كورۋ ءۇشىن شىعىس قازاقستان وبلىسىنىڭ تارباعاتاي اۋدانىنا باردى. وڭىردە قازىرگى تاڭدا قاۋىپتىڭ بەتى قايتقان. جاعداي جەرگىلىكتى اكىمدىكتىڭ جانە ءماسليحات دەپۋتاتتارىنىڭ باقىلاۋىندا. وبلىستىق ماڭىزى بار اقسۋات-باكەي-قاراسۋ-اقجار تاس جولىنىڭ بولىگى كەسىلىپ، تاسقىن سۋدى جولدىڭ كەلەسى بەتىنە كەدەرگىسىز وتكىزۋ شارالارى جاسالعان.

سونىمەن قاتار ماجىلىسمەندەر رەسپۋبليكالىق ماڭىزى بار قالباتاۋ - مايقاپشاعاي جولىنىڭ قالباتاۋدان بوعاسقا دەيىنگى بولىگى بويىنشا جۇرگىزىلىپ جاتقان جوندەۋ جۇمىسىمەن تانىستى. وعان جاۋاپتى قىتايدىڭ «سين-سين» كومپانياسى وكىلدەرىمەن كەزدەسىپ، جوندەۋدى جىلدامداتۋ كەرەكتىگىن ايتتى.

سۋرەت: ءماجىلىستىڭ ءباسپاسوز قىزمەتى

باتىس قازاقستان وبلىسىندا ءماجىلىس دەپۋتاتى ابزال قۇسپان ورال قالاسىنداعى ەۆاكۋاتسيالىق پۋنكتتەردىڭ جاعدايىمەن تانىستى. بۇگىن ەرىكتىلەرمەن بىرگە قاراتوبە اۋدانىنا قاراستى قاراتوبە اۋىلىنا گۋمانيتارلىق كومەك جەتكىزدى. ونى جيناۋعا بىرقاتار قالانىڭ كاسىپكەرلەرى اتسالىستى. سونداي-اق ءتۇسىندىرۋ جۇمىستارىن جۇرگىزۋ ءۇشىن جەرگىلىكتى تۇرعىندارمەن كەزدەستى.

– سۋ كوپ كەلەتىندىكتەن تەرەكتى اۋدانى ۇزىنكول اۋىلىنداعى كولەمى 80 ملن تەكشە مەتر گيدروتەحنيكالىق قۇرىلىستار اپاتتى جاعدايدا تۇر. بوگەت بۇزىلسا، بەس اۋىلدىق وكرۋگكە سۋ باسۋ قاۋپى تونەدى. قيىندىققا قاراماستان اۋىل تۇرعىندارىن ۇيلەرىن تاستاپ كەتۋگە كوندىردىك. بۇل جۇمىسقا مىڭعا جۋىق پوليتسيا قىزمەتكەرى جۇمىلدىرىلدى، – دەيدى ابزال قۇسپان.

سۋرەت: ءماجىلىستىڭ ءباسپاسوز قىزمەتى

دەپۋتات ەركەبۇلان مامبەتوۆ سولتۇستىك قازاقستان وبلىسى قىزىلجار اۋدانىنداعى جاعدايمەن تانىستى. ۆاگۋلينو كەنتىندە 50 توننا ينەرتتى ماتەريال، جۇك تيەگىش، ەكسكاۆاتور، بۋلدوزەر، موتوپومپا تۇرىندەگى ارنايى تەحنيكا دايىندالعان. جەرگىلىكتى مەكتەپتە اۋىل تۇرعىندارىن قابىلداۋ پۋنكتى اشىلعان. ياكور، ولشانكا، سوكولوۆكا سەكىلدى كورشىلەس ەلدىمەكەندەردە دايىندىق قىزۋ ءجۇرىپ جاتىر.

– بارلىق جاعداي باقىلاۋدا، اۋىل تۇرعىندارى قيىندىقتا قالمايدى. قازىر ەڭ باستىسى – ادام شىعىنىن، مال مەن ماتەريالدىق شىعىننىڭ الدىن الۋ قاجەت. بيىل جاعداي وتە اۋىر. سۋ تاسقىنى 2017 جىلعىدان دا كوپ بولۋى مۇمكىن. ويتكەنى اقتوبە، اقمولا وبلىستارىنان كەلەتىن سۋدىڭ ءبارى وسى ايماق ارقىلى وتەدى. سۋ تاسقىنى تۇرعىندار  ۇشىن كۇتپەگەن جاعداي ەمەس، دەگەنمەن دايىن بولۋ قاجەت، – دەدى ەركەبۇلان مامبەتوۆ.

بۇدان كەيىن ءماجىلىس دەپۋتاتى شال اقىن اۋدانىندا بولىپ، تۇرعىنداردى ۋاقىتشا ورنالاستىرۋ ورتالىعىن، سەرگەەۆ قويماسىن، گريگورەۆكا اۋىلىنداعى درەناجدىق ۇڭعىمانى ارالادى. وتكەن تۇندە سۋ قويماسىندا 40 سم-گە دەيىن سۋ تاسقىنى تىركەلدى، الايدا قۇزىرلى ورگاندار جاعدايدى باقىلاۋدا ۇستاپ وتىر.

سۋرەت: ءماجىلىستىڭ ءباسپاسوز قىزمەتى

سونىمەن قاتار ءماجىلىس دەپۋتاتى ايداربەك قوجانازاروۆ قوستاناي وبلىسىنىڭ سۋ تاسقىنىنان زارداپ شەككەن امانگەلدى اۋدانى مەن ارقالىق قالاسىنا باردى. ولار ەڭ قاجەتتى دەگەن زاتتار – سۋ، جارما، كونسەرۆىلەر، توسەك-ورىن جابدىقتارى، مايشامدار، جەكە گيگيەنا قۇرالدارىن جەتكىزىپ بەردى. كەزدەسۋ بارىسىندا جەرگىلىكتى تۇرعىندار دەپۋتاتقا وزدەرىن تولعاندىرعان ساۋالدارىن قويدى.

– جاعداي ءالى دە قيىن، قاۋىپ سەيىلگەن جوق. سۋ دەڭگەيى كوتەرىلىپ جاتىر. جەرگىلىكتى تۇرعىنداردىڭ باسپانالارى، مۇلىكتەرى مەن مالدارى زارداپ شەكتى. جالپى ۇكىمەت ونىڭ بارلىعىنا جان-جاقتى قولداۋ كورسەتەدى، – دەدى ايداربەك قوجانازاروۆ.

سۋرەت: ءماجىلىستىڭ ءباسپاسوز قىزمەتى

ءماجىلىس دەپۋتاتتارى باۋىرجان سماعۇلوۆ پەن ارمان قالىقوۆ قاراعاندى ​​وبلىسىنا اتتاندى. مۇندا ولار نۇرا جانە بۇقار جىراۋ اۋداندارىنداعى جاڭاتالاپ، روستوۆكا، تەگىسجول، قىزىلجار سياقتى ەلدىمەكەندەردى ارالادى. بۇل اۋىلدارداعى جاعدايدى قالىپتى دەۋگە بولادى، بىراق سۋ باسۋ قاۋپى بار.

ءماجىلىس دەپۋتاتتارىنىڭ اتىراۋ جانە پاۆلودار وبلىستارىنداعى حالىقپەن جۇمىسى دا جالعاسۋدا.

Abai.kz