باكۋدە تۇركى مادەنيەتى مەن مۇراسى قورى كەڭەسىنىڭ ءبىرىنشى وتىرىسى ءوتتى. بۇل تۋرالى قر مادەنيەت جانە اقپارات مينيسترلىگىنىڭ ءباسپاسوز قىزمەتى حابارلادى.

كەزدەسۋدە قورعا قاتىسۋشى ەلدەردىڭ مادەنيەت مينيسترلىكتەرىنىڭ باسشىلارى باس قوستى.

تۇركى مادەنيەتى مەن مۇراسى قورى 2015 جىلى ازەربايجان پرەزيدەنتى يلحام اليەۆتىڭ باستاماسىمەن قۇرىلدى جانە ونى قازاقستان، قىرعىزستان جانە تۇركيا مەملەكەتتەرىنىڭ باسشىلارى قولدادى.

قور قۇرۋداعى نەگىزگى ماقسات – تۇركى مادەنيەتى مەن مۇراسىن ساقتاۋعا، زەردەلەۋگە جانە ناسيحاتتاۋعا ارنالعان باعدارلامالار مەن جوبالاردى قولداۋ جانە قارجىلاندىرۋ.

ءازىربايجان مادەنيەت ءمينيسترى ءادىل كەريملي قور الدىندا تۇركى الەمى ءۇشىن وزەكتى جاھاندىق جانە وڭىرلىك جاعدايعا ساي جاڭا باعىتتاردى دامىتۋدا اۋقىمدى مىندەتتەر تۇرعانىن اتاپ ءوتتى.

تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا قور ناتيجەلەرىمەن ءبولىسىپ، الداعى جاڭا باعىتتار مەن 2024-2025 جىلدارعا ارنالعان جۇمىس جوسپارىمەن تانىستىردى.

جالپى، قوردىڭ جۇمىس جوسپارىن بارلىق قاتىسۋشى ەلدەر قولدادى. اتالعان جوسپاردى جۇزەگە اسىرۋ ۇيىم قىزمەتىنە جاڭا سەرپىن بەرەرى ءسوزسىز.

قازاقستاننىڭ مادەنيەت جانە اقپارات ءمينيسترى ايدا بالاەۆا ءوز سوزىندە تۇركى مادەنيەتى مەن مۇراسى قورى تۇركى مەملەكەتتەرىنىڭ حالىقارالىق ارەناداعى بىرلىگىنىڭ ۇلگىسى ەكەنىن اتاپ ءوتتى.

«قور ءبىزدىڭ مادەنيەتىمىزدى دە، ەلىمىزدى دە ءبىر-بىرىمەن ودان ءارى جاقىنداستىرا تۇسەدى. مادەني جانە عىلىمي ءىس-شارالار، ونىڭ ىشىندە قوردىڭ ۇيىمداستىرۋىمەن وتەتىن كورمەلەر بايلانىسىمىزدى نىعايتادى جانە تىعىز ىنتىماقتاستىققا مۇمكىندىك تۋعىزادى»، – دەدى ايدا بالاەۆا. مينيستر وتىرىسقا قاتىسۋشىلاردى تاڭبالى پەتروگليفتەرىنە ارنالعان عىلىمي-پراكتيكالىق كونفەرەنتسياعا شاقىردى.

بيىل قازاقستاندا وتەتىن كونفەرەنتسياعا تۇركى الەمىنىڭ عالىمدارى جينالادى.

مينيستر تۇركى مەملەكەتتەرى ۇيىمى، حالىقارالىق تۇركى مادەنيەتى ۇيىمى، حالىقارالىق تۇركى اكادەمياسىنىڭ جانە حالىقارالىق تۇركى مادەنيەتى مەن مۇراسى قورىنىڭ تۇركى مۇراسىن ساقتاۋعا جانە ناسيحاتتاۋعا باعىتتالعان قىزمەتتەرىنىڭ ناقتى فۋنكتسيالارىن بىرگە اتقارۋ جانە ايقىنداۋ ءۇشىن جوسپارلاردى تالداۋ كەرەكتىگىن اتاپ ءوتتى.

وسىعان بايلانىستى، ونىڭ پىكىرىنشە، ەسكەرتكىشتەرگە ساراپتاما جۇرگىزۋ، رەستاۆراتسيا جاساۋ، سونداي-اق ولاردى يۋنەسكو تىزىمىنە ەنگىزۋ بويىنشا بىرىڭعاي توپ قۇرعان ءجون.

سونىمەن قاتار ايدا بالاەۆا 6-شى دۇنيەجۇزىلىك مادەنيەتارالىق ديالوگ بويىنشا فورۋمعا قاتىستى. فورۋم ازەربايجان پرەزيدەنتى يلحام اليەۆتىڭ قاتىسۋىمەن ءوتتى.

ءىس-شاراعا 110-نان استام ەلدەن جۇزدەگەن قاتىسۋشى كەلدى.

پانەلدىك پىكىرتالاستار مەن پلەنارلىق وتىرىستاردا ءبىلىم، جاستار، كليماتتىڭ وزگەرۋى، جاساندى ينتەللەكت، مادەني مۇرانى قورعاۋ، زاڭسىز كوشى-قون سياقتى تاقىرىپتار تالقىلاندى.

Abai.kz