وتكەن جۇمادا SANA FOUNDATION ۇيىمداستىرۋىمەن قوعامدىق لەكتسيا ءوتتى. رۋحاني-كاسىبي دامىعىسى كەلەتىندەرگە ارنالعان «كوك مۇحيت ستراتەگياسى» تاقىرىبىنداعى لەكتسيادا ءوز سالاسىندا كوك مۇحيت ستراتەگياسىنىڭ ۇلگىسىن جاساي العان كاسىپكەرلەر ءدارىس ءوتتى. جالپى سانى 220 ادامدى قامتىعان شارا كورەرمەندەر كوڭىلىنەن شىقتى.

SANA FOUNDATION قوعامدىق قورى بىرنەشە باعىتتا جۇمىس جاسايدى. كەزدەسۋدە «كوك مۇحيت ستراتەگياسى» كىتابىنىڭ تۇساۋى كەسىلدى. بۇل كىتاپ Harvard Business Review ءباسپاۇيىنىڭ الەمدە 4 ميلليون دانامەن تاراعان بەستسەللەرى. وسىعان دەيىن 47 تىلدە جارىق كورگەن.

سۋرەت: SANA FOUNDATION

سپيكەرلەر كاسىپ باستاعىسى كەلەتىندەر ءۇشىن ءوز سالالارى تۋرالى ءسوز قوزعادى.

«Easy Tap» IT كومپانياسىنىڭ نەگىزىن قالاۋشىسى، «Forbes 30 under 30»  قاتىسۋشىسى –  ماعزۇم تولەش «ستارتاپقا ءوز كوگىلدىر مۇحيتىن قالاي تابۋعا بولادى؟» تاقىرىبى اياسىندا سويلەدى. ونىڭ ايتۋىنشا، ستارتاپ – ۇلكەن تاۋەكەل.

سۋرەت: SANA FOUNDATION

ماعزۇم تولەش بيزنەسىن وزبەكستان مەن قىرعىزستان نارىعىنا شىعارعان. ەندى ونىڭ كاسىبى ازەربايجاننىڭ نارىعىنا دا شىعۋى مۇمكىن. ول كىتاپتىڭ ومىرىنە اسەرى تۋرالى:

«مەن كوك مۇحيت ستارتەگياسى» كىتابىن  2018 جىلى وقىدىم. كىتاپتى وقىعاننان كەيىن سول جىلدىڭ ءساۋىر ايىنان باستاپ ويلارىم وزگەرە باستادى. ونى جەلىدەگى جازبالارىمنان بايقاساڭىزدار دا بولادى»،-دەپ ايتتى.

سۋرەت: SANA FOUNDATION

ول EasyTap IT كومپانياسىنا $500 مىڭ دوللاردان استام ينۆەستيتسيا تارتقان، قازىر كومپانيانىڭ 1.5 جىل ىشىندە قۇنى $10 ملن دوللاردان اسقان.

وقىرماندارعا قازاقشا «سالا تاڭداۋ» يۋتۋب ارناسى ارقىلى تانىلعان كاسىپكەر ۇلان قۇرمانعاليەۆ تە ءسوز سويلەدى. ول كاسىپكەرلەردىڭ نەگىزگى جىبەرىپ الاتىن قاتەلىكتەرى تۋرالى ايتىپ، كاسىپتى قالاي تەز باستاۋ كەرەكتىگىن جانە قانداي تابىستى سالالارى بارىن باياندادى.

«كەز كەلگەن كاسىپتى بىردەن ۇلكەن قارجىمەن باستاۋعا بولمايدى. كاسىبىڭىزگە قاجەت جەر مەن قۇرىلعىلاردى باستاپقىدا جالعا الىڭىز. سول كەزدە  شىنىندا سول سالادا جۇمىس ىستەي الاسىز با، تەك قىزىعۋشىلىقپەن نارىققا كىرگىڭىز كەلدى مە ءبارى تۇسىنىكتى بولادى. ەگەر، ول كاسىپتى يگەرە المايتىنىڭىزدى تۇسىنسەڭىز، تەك جالعا الۋ اقىسى عانا شىعىن بولادى»،-دەپ كەڭەس بەردى.

ۇلان كاسىپ باستاۋ تاقىرىبىندا كونتەنت جاساعاندىقتان ءجيى تاۋەكەلگە تولى شەشىم قابىلدايدى. جيىرما ميلليون ءتىپتى ودان دا كوپ قارجى جوعالتقان شەشىمدەرى تۋرالى ايتىپ، جاس كاسىپكەرلەرگە وي سالدى.

⁠Urbo Coffee كوفەحانا جەلىسىنىڭ نەگىزىن قالاۋشىسى داۋرەن مۇراتحانۇلى الماتى نارىعىن قالاي جاۋلاعانى تۋرالى ايتىپ بەردى. قازىر ونىڭ كوفەحانالارى الماتىدا ەڭ كوپ فيليالعا يە، ال ەلىمىز بويىنشا 40 شاقتىسى بار. ول بيزنەستە ماسشتابقا شىعۋدىڭ جولدارىن ايتىپ بەردى.

«مەن كاسىپ باستاعانعا دەيىن مەملەكەتتىك قىزمەتكەر بولىپ جۇمىس ىستەدىم. كاسىپ باستاۋعا يدەيا مەن قالاۋ بار، قارجى جوق بولىپ ءجۇردىم. باستاپقىدا فرانچيزا الىپ، تەك فيليال رەتىندە كاسىبىمدى باستادىم. قازىر 7 جىل بۇرىن اشقان Smart Point-تاعى العاشقى بيزنەسىم ءالى كۇنگە دەيىن جۇمىس ىستەپ تۇر. الماتىدا 30 عا جۋىق كوفەحانا اشا الدىم»،-دەپ ايتتى.

Avataria بالالار پاركتەر جەلىسىنىڭ نەگىزىن قالاۋشى، vkorzinka.kz ازىق تۇلىك دۇكەندەر جەلىسى يەسى، YPO مۇشەسى الماز تۋلتاەۆ 28 جىلدان اسا تاجىريبەسى بار كاسىپكەر. ءوز مىسالىندا «كوك مۇحيت ستراتەگياسىنان» شابىت العان كاسىپكەر اتالمىش كىتاپتىڭ قازاق تىلىنە اۋدارىلۋىنا دەمەۋشىلىك ەتكەن. كىتاپ قازىر Kitapal دۇكەندەر جەلىسىنىڭ سورەلەرىنە قويىلىپ، ساتىلىمعا شىققان.

سونداي-اق، كەشتىڭ سوڭىن - MBA لەكتورى، ⁠انگليا بولاشاق ستيپەندياتى،  بيزنەس كونسۋلتانت ءارى PHD كانديدات جاسۇلان كۋشەباەۆ اياقتادى. ول كومپانيالارعا شولۋ جاساپ، كاسىپكەرلەرگە كوك مۇحيتقا شىعۋعا كەرەك تەوريالىق فورمۋلالارمەن ءبولىستى.

سۋرەت: SANA FOUNDATION

گريگوري پەتروۆتىڭ «فينليانديا – اق لالا گۇلدەر مەكەنى» كىتابىندا سنەلمان ەسىمدى كەيىپكەردىڭ لەكتسيالارى ەلدى قالاي وزگەرتكەنى ءسوز بولادى. سنەلمان سەكىلدى تۇلعالاردىڭ لەكتسياسىنان سوڭ، فينليانديا باتپاقتىڭ ۇستىندە تۇرعان ەلدەن الەمدەگى ەڭ باقىتتى ادامدار ءومىر سۇرەتىن ەلگە اينالعان. سپيكەرلەر سنەلمان سەكىلدى ءوز تاجىريبەلەرىمەن ءبولىسىپ، شاراعا كەلگەن ازاماتتاردىڭ  ساۋالدارىنا جاۋاپ بەردى.

قوعامدىق لەكتسيانىڭ ماقساتى – قوعامدى قالىپتاستىرۋشى پلاتفورما بولۋ ارقىلى ەلىمىزدەگى ءومىر ساپاسىن ارتتىرۋعا، ەكونوميكانى جاقسارتۋعا ۇلەس قوسۋ. ون جىل بۇرىن باستالىپ، اراعا ءبىراز جىلدار سالىپ قايتا جالعاسىن تاۋىپ  جاتقان قوعامدىق لەكتسيا كاسىپكەرلىك پەن اعارتۋشىلىقتى ترەندكە اينالدىرۋدى كوزدەيدى.

Abai.kz