مادەنيەت جانە اقپارات ۆيتسە-ءمينيسترى قانات ىسقاقوۆ بۇگىنگى تاڭدا قازاقستاندا TikTok-تى بۇعاتتاۋ ماسەلەسى كۇن تارتىبىندە تۇرعان جوقتىعىن مالىمدەدى، دەپ حابارلايدى Abai.kz.

– TikTok-قا قاتىستى ماسەلەنى ناقتىلايىق. شىنىندا دا، مينيسترلىك تاراپىنان بۇگىن دە بۇعاتتاۋ ماسەلەسى جوق. بىراق كەز-كەلگەن جاعدايدا، زاڭعا سايكەس، قولجەتىمدىلىكتى شەكتەۋگە بايلانىستى شارالار قاراستىرىلعان. ۇلتتىق قاۋىپسىزدىك ماسەلەسىنە بايلانىستى زاڭداردى اشىپ قاراۋدى ۇسىنامىز. وندا ءبارى انىق ءارى تۇسىنىكتى. اۋماقتىق تۇتاستىقتى بۇزۋ، قوعامعا تونەتىن قاتەرلەر، الەۋمەتتىك قاتەرلەر جانە ۇلتتىق قاۋىپسىزدىك قۇزىرەتىنە جاتاتىن وزگە دە ماسەلەلەر ايتىلادى ول جەردە، - دەيدى ىسقاقوۆ.

سونداي-اق، ودان Telegram مەسسەندجەرىندە ەسىرتكى ەركىن ساتىلىپ جاتقاندا TikTok نەگە كوپ اتالادى دەپ سۇرالدى.

– بىزگە رەتتەۋگە ەش كەدەرگى جوق. TikTok-پەن جۇمىس ىستەيمىز. ونى بۇعاتتاۋ جونىندە كۇن تارتىبىندە ماسەلە تۇرعان جوق. ناقتىلايىقشى، زاڭ بۇزىلاتىن كەزدەرگە كەلەتىن بولساق، ءبىز ونى ناقتى ايتتىق. بالالار كونتەنتىندەگى ولقىلىقتار، قورلاۋعا جانە جالا جابۋعا بايلانىستى ماسەلەلەر تۋىنداسا، البەتتە... ءبىز بارلىق ونلاين پلاتفورما اكىمشىلەرىمەن جۇمىس ىستەيمىز، - دەدى شەنەۋنىك.

ەسكە سالساق، مادەنيەت جانە اقپارات ءمينيسترى ايدا بالاەۆا TikTok-تا قۇقىقبۇزۋشىلىق فاكتىلەرى كوبەيىپ كەتكەندىكتەن، بۇعاتتاۋ ماسەلەسىن قاراستىرىپ جاتقانىن ايتقان ەدى.

Abai.kz