پرەمەر-ءمينيستردىڭ توراعالىعىمەن وتكەن ۇكىمەت وتىرىسىندا ەلىمىزدە بايلانىس ساپاسىن ودان ءارى جاقسارتۋ تۋرالى تسيفرلىق دامۋ ءمينيسترى جاسۇلان ماديەۆ باياندادى.

➤ بۇگىنگى جاعداي قالاي
قازاقستاندا ينتەرنەتتى قولداناناتىن حالىقتىڭ ۇلەسى دامىعان ەلدەر دەڭگەيىندە. رەسپۋبليكادا ترافيكتىڭ ءوسۋى 2020 جىلعا قاراعاندا 61,5%-عا، ال ابونەنتتەر سانى 12,9%-عا ءوستى.
Speedtest Ookla-نىڭ 2024 جىلعى ساۋىردەگى دەرەكتەرىنە سايكەس، ەلىمىز ينتەرنەتتىڭ ورتاشى جىلدامدىعى بويىنشا – 43,6 مبيت/س، الەم بويىنشا 66-ورىندا. بۇل رەسەي، قىرعىزستان جانە وزبەكستاننان جوعارى كورسەتكىش.

➤ اۋىلدارداعى ينتەرنەت
قازاقستاندا 6 290 اۋىل بار، ونىڭ ىشىندە سىمدى ينتەرنەت ارقىلى وپتيكا 2 606 اۋىلعا جەتكىزىلدى. ۇلتتىق جوبا شەڭبەرىندە ءمجا تەتىگى ارقىلى 3010 اۋىلعا وپتيكالىق بايلانىس جەلىلەرىن قوسۋ كوزدەلۋدە.
«سوڭعى» تۇتىنۋشى بولماعان جاعدايدا شاعىن جانە ورتا بايلانىس وپەراتورلارىنىڭ كۇردەلى شىعىندارىنىڭ 50%-ىن سۋبسيديالاۋ تەتىگى پايدالانىلادى.

ناتيجەسىندە 2,4 ملن ادامنىڭ ينتەرنەتكە قولجەتىمدىلىگىن قامتاماسىز ەتىلمەك. بايلانىس وپەراتورلارىنان 340 ملرد تەڭگەدەن استام كولەمدە جەكە ينۆەستيتسيا تارتۋ كوزدەلىپ وتىر.
ءموبيلدى ينتەرنەت بۇگىندە 4 866 اۋىلدا قولجەتىمدى. سالىق جەڭىلدىكتەرى اياسىندا 2023 جىلى 1 161 اۋىل 4G تەحنولوگياسىنا قوسىلدى. قالعان 1 424 اۋىل بويىنشا جۇمىس جالعاسۋدا.

➤ 5G تەحنولوگياسىن ەنگىزۋ
كسەلل جانە تەلە2 وپەراتورلارى استانا، الماتى، شىمكەنت جانە وبلىس ورتالىقتارىندا 5G بايلانىسپەن قامتۋدى كەڭەيتۋ جۇمىستارىن جالعاستىرادى. بۇگىنگى تاڭدا 20 قالادا 1 144 بازالىق ستانسا ورناتىلعان.
مەملەكەت باسشىسىنىڭ تاپسىرماسىنا سايكەس 5G ۇيالى بايلانىسىن ەنگىزۋ 2025 جىلدىڭ سوڭىنا دەيىن اياقتالۋى ءتيىس.
2027 جىلدىڭ سوڭىنا دەيىن ۇيالى بايلانىس وپەراتورلارى تەلەكوممۋنيكاتسيا سالاسىنا 450 ملرد تەڭگەدەن استام ينۆەستيتسيا سالاتىن بولادى.

➤ جاڭا جۇيەلىك شارالار
– ەلدى مەكەندەردىڭ باس جوسپارلارى مەن ەگجەي-تەگجەيلى جوسپارلاۋ جوبالارىندا بايلانىس جەلىلەرىنىڭ ينفراقۇرىلىمى كوزدەلەتىن بولادى;
– بازالىق ستانسالاردىڭ راديو سيگنالىنىڭ شەكتى رۇقسات ەتىلگەن دەڭگەيى بويىنشا نورماتيۆتەردى قايتا قاراۋ ۇسىنىلادى. دامىعان ەلدەر مەن ءتىپتى جاقىن شەتەلدەرمەن سالىستىرعاندا قازاقستاندا 10-20 ەسە قاتاڭ نورماتيۆتەر بار;
– مينيسترلىك اكىمدىكتەرمەن جانە وپەراتورلارمەن بىرلەسىپ قالالارداعى ناشار بايلانىسى بار «اق داقتاردى» جويۋدى جالعاستىرادى;
– مەملەكەتتىك مەكەمەلەردە بازالىق ستانسالاردى ورناتۋعا رۇقسات بەرۋ ءۇشىن وزگەرىستەر ەنگىزىلەدى (مەملەكەتتىك قۇپيالاردى قورعاۋ بويىنشا ارنايى ورىن جوق);
– Voice over Wi-Fi (VoWiFi) تەحنولوگياسىن، ياعني ءداستۇرلى ۇيالى جەلىلەردىڭ ورنىنا Wi-Fi جەلىلەرى ارقىلى داۋىستىق قوڭىراۋلاردى ىسكە قوسۋ ماسەلەسى پىسىقتالۋدا. بۇل ۇيالى بايلانىس ناشار جەرلەردە (پاركينگتەر) بايلانىس ساپاسىن جاقسارتۋدى قامتاماسىز ەتەدى;
- ەلىمىز بويىنشا بايلانىس ساپاسىن جاقسارتۋ بويىنشا جۇمىستاردى مونيتورينگىلەۋ ءۇشىن «تەلەكوممۋنيكاتسيالاردىڭ تسيفرلىق كارتاسى» ىسكە قوسىلادى. ءاربىر ادام ەلدى مەكەندەردەگى بايلانىس ساپاسىنىڭ پروبلەمالارىن جانە ولاردى جويۋ جوسپارلارىن كورە الادى، سونداي-اق كەز كەلگەن ورىن بويىنشا ءوز باعاسىن بەرە الادى. سىلتەمە مينيسترلىكتىڭ سايتىندا ورنالاستىرىلعان.

Abai.kz