28 ماۋسىم – بۇقارالىق اقپارات قۇرالدارىنىڭ قىزمەتكەرلەرى كۇنىنە وراي اقوردادا سالتاناتتى جيىن ءوتتى. وعان رەسپۋبليكالىق اقپارات قۇرالدارى عانا ەمەس، وڭىرلەردەگى جەتەكشى تەلەارنالاردىڭ، گازەت-جۋرنالداردىڭ، اقپاراتتىق رەسۋرستاردىڭ وكىلدەرى قاتىستى.

ەلدىڭ الەۋمەتتىك-ەكونوميكالىق جانە قوعامدىق-ساياسي دامۋىن اقپاراتتىق تۇرعىدان قامتاماسىز ەتۋ ىسىندەگى بۇقارالىق اقپارات قۇرالدارىنىڭ ەلەۋلى ءرولىن ەسكەرە وتىرىپ، قازاقستان رەسپۋبليكاسى پرەزيدەنتى قاسىم-جومارت توقاەۆ بۇقارالىق اقپارات قۇرالدارى سالاسىنداعى جۋرناليستەردى ءتول مەرەكەلەرىمەن قۇتتىقتاپ، سىيلىقتارىن تاپسىردى.

سونداي-اق، بيىل كۇزدە قازاقستاندا اتوم ەلەكتر ستانتسياسىن سالۋ ماسەلەسىنە بايلانىستى رەفەرەندۋم وتەدى. بۇل تۋرالى بۇگىنگى جيىندا پرەزيدەنت حابارلادى. ونىڭ سوزىنشە، اەس بويىنشا سوڭعى شەشىمدى حالىق قابىلدايدى.

پرەزيدەنت "ەكونوميكانى دامىتۋ ءۇشىن تۇراقتى ەنەرگيا كوزى كەرەك" دەيدى. توقاەۆ اتوم ەلەكتر ستانتسياسىن سالۋ ماسەلەسىن پىسىقتاۋعا ناقتى تاپسىرما بەرگەنىن ايتتى.

"قازىر جان-جاقتى تالقى بولىپ جاتىر. ءارتۇرلى پىكىر ايتىلىپ جاتىر. بۇل ۇدەرىسكە بۇقارالىق اقپارات قۇرالدارى دا بەلسەنە اتسالىسۋى كەرەك. شىن مانىندە، ەلىمىزدە اتوم ەنەرگەتيكاسىن دامىتۋعا زور مۇمكىندىك بار. ونى دۇرىس، ياعني ءتيىمدى پايدالانعان ءجون" دەدى توقاەۆ.

قاسىم-جومارت توقاەۆ باق وكىلدەرىن كاسىبي مەرەكەسىمەن قۇتتىقتاپ، جۋرناليستيكانىڭ مارتەبەلى ماماندىق ەكەنىن اتاپ ءوتتى.

– مەملەكەت تە، جۋرناليست تە ۇلت ءۇشىن قىزمەت ەتەدى، ەل تاعدىرىن شەشۋگە اتسالىسادى. ويتكەنى ۇلت ءباسپاسوزى مەن ۇلت مۇددەسى قاي كەزدە دە وزەكتەس بولعان. قازىر دە سولاي. ءبىزدىڭ ماقسات-مۇراتىمىز – ورتاق. بۇل – بارشاعا تەڭ مۇمكىندىكتەر بەرەتىن ادىلەتتى قازاقستاندى قۇرۋ. مەن بۇگىن مەديا سالاسى ماماندارىنىڭ وسى جولداعى قاجىرلى ەڭبەكتەرى ءۇشىن شىنايى ريزاشىلىعىمدى بىلدىرەمىن، – دەدى مەملەكەت باسشىسى.

پرەزيدەنت ەلىمىزدە جۇرگىزىلىپ جاتقان قوعامدىق-ساياسي، ەكونوميكالىق رەفورمالارعا ارنايى توقتالىپ، وسىنداي تىڭ باستامالاردى جۇرتشىلىققا جان-جاقتى تۇسىندىرۋگە جۋرناليستەر قاۋىمى زور ۇلەس قوسىپ كەلە جاتقانىنا نازار اۋداردى.

– كوپشىلىك مۇنى ءالى كۇنگە سەزىنبەي ءجۇر. الايدا قازاقستاندا الدەقاشان جاڭا ساياسي جاعداي قالىپتاستى. ونى ءسوز بوستاندىعىنان، اشىق باسەكەلەستىكتەن، بيلىك پەن قوعام اراسىنداعى كونسترۋكتيۆتى ديالوگتان، بۇكىل اقپاراتتىق رەسۋرستاردىڭ قول جەتىمدىلىگىنەن بايقاۋعا بولادى. ءبىز وسىنداي وزگەرىستەر جۇزەگە اسىرىلدى دەپ سەنىممەن ايتا الامىز. مۇنداي جاعدايدا باق-تىڭ ءرولى مەن جاۋاپكەرشىلىگى ارتا تۇسەدى. وتاندىق ماسس-مەديا ءاردايىم وبەكتيۆتىلىكتى، بەيتاراپتىلىقتى ساقتاپ، ەل مەن قوعامنىڭ مۇددەسىن بارىنەن جوعارى قوياتىنىنا سەنىمدىمىن، – دەدى قاسىم-جومارت توقاەۆ.

جيىندا بىرقاتار جۋرناليسكە قازاقستان رەسپۋبليكاسى پرەزيدەنتىنىڭ باق سالاسىنداعى سىيلىقتارى، گرانتتارى جانە العىسى سالتاناتتى تۇردە تابىستالدى.

سۋرەت: akorda.kz

Abai.kz