قانشا ۋاقىت بويى كۇتىپ جۇرگەن شىۇ ءسامميتى ءوتتى. قازاقستان ۇيىمعا ءبىر جىل توراعالىق ەتىپ، ەندى مىنە بۇگىن سونىڭ قورىتىندىسىن شىعاردى. سامميتكە الەمنىڭ جەر-جەرىنەن مەملەكەت باسشىلارى مەن حالىقارالىق ۇيىم وكىلدەرى كەلگەن ەكەن. ونىڭ ۇستىنە بۇگىن بەلارۋس ۇيىمعا مۇشە اتاندى. باستاپقىدا شانحاي بەستىگى رەتىندە قۇرىلعان ۇيىمعا بەلارۋس قوسىلىپ، وندىققا اينالدى.

جالپى، بۇگىنگى ءوتىپ جاتقان ءىس-شارانىڭ ماڭىزى زور. اتالمىش ۇيىم ءبىر كەزدەرى ەۋرازيا ايماعىنداعى ىنتىماقتاستىقتى نىعايتۋ ءۇشىن قۇرىلعان بولاتىن. ال قازىر الەم تەرروريزم، ەكسترەميزم، كيبەرقاۋىپتەر پەن كليماتتىڭ وزگەرۋى سياقتى ءتۇرلى قاۋىپتەردىڭ الدىندا تۇرعان كەزدە، شىۇ ءرولى كۇن ساناپ ارتىپ كەلەدى.

سونىمەن بۇگىنگى كۇن ق. توقاەۆتىڭ قاتىسۋمەن وتكەن شىۇ-عا مۇشە مەملەكەتتەر باسشىلارى كەڭەسىنىڭ وتىرىسىنان باستالدى. وتىرىستا ءسوز سويلەگەن باسشىمىز بۇگىندە شانحاي ىنتىماقتاستىق ۇيىمى دوستىق، تاتۋ كورشىلىك، تەڭقۇقىقتىق پەن ءوزارا قولداۋدىڭ، ياعني «شانحاي رۋحى» نەگىزىندە جۇمىس ىستەيتىن مەملەكەتارالىق قاتىناستاردىڭ ءتيىمدى تەتىگىنە اينالعانىن اتاپ ءوتتى.

بىلتىردان باستاپ ۇيىمعا توراعالىق ەتكەن ۋاقىت ارالىعىندا ءتۇرلى دەڭگەيدە 150-گە جۋىق ءىس-شارا، سونىڭ ىشىندە تسيفرلىق دامۋ، تۋريزم، ەنەرگەتيكا، بيزنەس سالالارىندا فورۋمدار مەن شىۇ جاستار كەڭەسى وتكىزىلدى. بۇل جايلى دا ق. توقاەۆ مالىمدەدى. ارى قاراي ءوز سوزىندە ءتۇرلى ءىس-شارالاردىڭ ناتيجەسىندە شىۇ كەڭىستىگىندەگى ساۋدا-ەكونوميكالىق ىنتىماقتاستىق قارقىندى دامىپ كەلە جاتقانىنا توقتالدى.

جالپى، توقاەۆ قازاقستان شىۇ توراعاسى رەتىندە الدىڭعى سامميتتە ايتىلعان بارلىق ماقسات-مىندەتتى تولىعىمەن ورىنداعانىن ايتتى. سونداي-اق پرەزيدەنت ەلىمىزدىڭ باستامالارىن جۇزەگە اسىرۋعا قولداۋ كورسەتىپ، بەلسەندى اتسالىسقانى ءۇشىن بارلىق مەملەكەتكە شىنايى ريزاشىلىعىن ءبىلدىردى.

ارينە، پرەزيدەنت قاۋىپسىزدىك سالاسىنداعى ءوزارا سەنىم مەن ىنتىماقتاستىقتى نىعايتۋدى ءبىرىنشى ماڭىزدى باعىت ەكەنىن دە نازاردان تىس قالدىرعان جوق.

«قازىرگى كۇردەلى احۋال – نەگىزىنەن حالىقارالىق قاتىناستار جۇيەسىندەگى داعدارىس سالدارى. وسى رەتتە حالىقارالىق قۇقىقتىڭ كەمشىن تۇستارىن تۇزەپ، گەوساياسي تۇرعىدان جىككە بولىنۋگە جول بەرمەۋ ماقساتىمەن، تۇپتەپ كەلگەندە، جاھاندىق اۋقىمداعى بەيبىتشىلىك پەن قاۋىپسىزدىكتى نىعايتۋ ءۇشىن شىۇ ءوزىنىڭ تۇراقتاندىرۋشى جانە جاسامپازدىق ءرولىن كۇشەيتۋگە ءتيىس» دەپ شىۇ-نىڭ الەم ەلدەرىندەگى تۇراقتىلىققا ىقپال ەتە الاتىنىنا باسىمدىق بەرگەن ەكەن.

وتىرىستا قاتىسۋشى ەلدەر ءۇشىن عانا ەمەس، جالپى، الەم ەلدەرى ءۇشىن ماڭىزدى تاقىرىپتار قوزعالعان ەكەن. وسىنداي ايماقتىق ءىس-شارالاردىڭ ءوتۋى ماڭىزدى، سەبەبى بۇل تەك باسشىلاردىڭ كەزدەسۋى عانا ەمەس، پىكىر الماسىپ، ماڭىزدى شەشىمدەر قابىلداناتىن الاڭ.

قازبەك مايگەلدينوۆ

Abai.kz