ەرلان قارين: قۇمار ويىندارعا تاۋەلدى ادامداردى مەديتسينالىق وڭالتۋدىڭ ءتارتىبى بەلگىلەندى
![](https://abai.kz/content/uploads/2024/07/arinni-.jpg)
مەملەكەتتىك كەڭەسشى ەرلان قارين بۇگىن قابىلدانعان ويىن بيزنەسى ماسەلەلەرى تۋرالى جاڭا زاڭعا قاتىستى پىكىرىن ءبىلدىردى، دەپ حابارلايدى Abai.kz Kazinform سايتىنا سىلتەمە جاساپ.
«بۇگىن پرەزيدەنت لۋدومانياعا قارسى كۇرەسكە قاتىستى زاڭ اكتىلەرىنە تۇزەتۋ ەنگىزۋ تۋرالى قۇجاتقا قول قويدى. بۇل – ۇلتتىق قۇرىلتايدا كوتەرىلگەن باستامالاردى جۇزەگە اسىرۋ اياسىندا قابىلدانعان بەسىنشى زاڭ. مەملەكەت باسشىسى اتىراۋدا سويلەگەن سوزىندە لۋدومانيانى الەۋمەتتىك كەسەلدىڭ ءبىرى دەپ اتاپ ءوتتى جانە ءتيىستى نورماتيۆتىك قۇجاتتى پارلامەنتتىڭ قازىرگى سەسسياسىنىڭ سوڭىنا دەيىن قابىلداۋدى تاپسىردى. زاڭ جوباسى ءتۇرلى پىكىرتالاس الاڭىندا تالقىلانىپ، وعان دەپۋتاتتار، ۇلتتىق قۇرىلتايدىڭ جانە جاستار جونىندەگى كەڭەستىڭ مۇشەلەرى قاتىستى. مامىر ايىندا زاڭسىز ويىن بيزنەسى مەن لۋدومانياعا قارسى ءىس-قيمىل جونىندەگى كەشەندى جوسپار بەكىتىلىپ، ونىڭ ەرەجەلەرى جاڭا زاڭنىڭ نورمالارىمەن ۇيلەسىم تاپتى. پارلامەنت دەپۋتاتتارىنىڭ ۇسىنىسىمەن قابىلدانعان بۇل قۇجاتتا قۇمار ويىندارىن ويناۋعا رۇقسات بەرىلگەن ادامداردىڭ سانىن ازايتۋدى كوزدەيتىن جۇيەلى ءىس-شارالاردىڭ ءبىرتۇتاس كەشەنى قاراستىرىلعان. سونداي-اق مەملەكەتتىك قىزمەتشىلەردىڭ قۇمار ويىندارعا قاتىسۋىنا تىيىم سالىنعان»، - دەدى مەملەكەتتىك كەڭەسشى ەرلان قارين.
ول سونداي-اق اتالعان قۇجاتتاعى باستى جاڭالىقتاردىڭ بىرىنە توقتالدى.
«وسى قۇجاتتا كوزدەلگەن نەگىزگى جاڭالىقتىڭ ءبىرى – بورىشكەرلەردىڭ بىرىڭعاي تىزىمىندەگى ازاماتتارعا قاتىستى شەكتەۋ شارالارىنىڭ ەنگىزىلۋى. بۇل – 3,5 ميلليوننان استام ادام. بۋكمەكەر كونتورالارى مەن توتاليزاتورلاردىڭ بارلىق جەردەگى سىرتقى جارناماسىنا تىيىم سالىنادى. بۇدان بىلاي بايلانىس وپەراتورلارى ۇيالى تەلەفونعا جارناماسى بار ماتىندىك حابارلامانى جىبەرە المايدى. سونىمەن قاتار ليتسەنزياسى جوق شەتەلدىڭ بۋكمەكەرلىك كونتورالارىنىڭ، توتاليزاتورلارىنىڭ ينتەرنەت رەسۋرستارىنا جانە ونلاين-كازينولارعا تولىق تىيىم سالىنادى. لۋدومانياعا شالدىققان ازاماتتاردى ساۋىقتىرۋعا قاتىستى بىرقاتار شارا قاراستىرىلعان. قۇمار ويىندارعا تاۋەلدى ادامداردى مەديتسينالىق وڭالتۋدىڭ ءتارتىبى بەلگىلەندى. مۇنداي ادامداردى، قۇپيالىلىقتى ساقتاي وتىرىپ، اقىل-كەڭەس بەرۋ ارقىلى باقىلاۋعا الۋ ءتاسىلى ەنگىزىلدى»، - دەپ جازدى مەملەكەتتىك كەڭەسشى Telegram پاراقشاسىندا.
Abai.kz