مەملەكەت باسشىسى تۋريزم جانە سپورت ءمينيسترى ەرمەك مارجىقپاەۆتى قابىلدادى، دەپ حابارلايدى Abai.kz Kazinform سايتىنا سىلتەمە جاساپ.

قاسىم-جومارت توقاەۆقا ەل سپورتشىلارىنىڭ ءحححىىى جازعى وليمپيادا ويىندارىنا دايىندىعى تۋرالى ەسەپ بەرىلدى. سونداي-اق ليتسەنزيالىق تۋرنيرلەردىڭ قورىتىندىسى جونىندە باياندالدى.

ءمينيستردىڭ ايتۋىنشا، ءتورت جىلدىقتىڭ باستى دوداسىنا قازاقستان ۇلتتىق قۇراماسى سپورتتىڭ 25 تۇرىنەن 92 ليتسەنزيا يەلەنگەن. پاريجدە بارلىعى 80 سپورتشى ەل نامىسىن قورعايدى.

ەرمەك مارجىقپاەۆ ۇلتتىق قۇرامانىڭ وليمپياداعا دەيىنگى وقۋ-جاتتىعۋ جيىندارى مەن سپورتشىلاردى قولداۋ شارالارى تۋرالى ايتتى. سونىمەن قاتار سپورتتى باسقارۋ ينستيتۋتتارىن جەتىلدىرۋ باعىتىندا جۇرگىزىلىپ جاتقان جۇمىستاردىڭ ەسەبىن بەردى.

مەملەكەت باسشىسى وليمپيادا ويىندارىنىڭ سپورتشىلارىمىزعا زور جاۋاپكەرشىلىك جۇكتەيتىنىن اتاپ ءوتتى. سونداي-اق قازاقستان قۇراماسى الەم الدىندا مادەنيەتتى، ۇستامدى ءارى وزىق ۇلگىلەرىمەن ەرەكشەلەنۋگە ءتيىس ەكەنىنە نازار اۋداردى.

Abai.kz