اقش-تاعى اقشالى تۋرنير ءھام پاريجدەگى قازاق نامىسى
![](https://abai.kz/content/uploads/2024/07/enoen-3.jpg)
پاريج وليمپياداسىنىڭ اشىلۋىنا ءبىر كۇن قالعاندا، تورتجىلدىقتىڭ باستى باسەكەسىنە قاتىسۋدان، انىعى قازاقستان نامىسىن قورعاۋدان باس تارتقان ەلەنا رىباكينانىڭ داۋى ءالى باسىلار ەمەس.
حالىقارالىق تەننيس فەدەراتسياسى ءبىر، قازاقستان تەننيس فەدەراتسياسى ەكى، قر سپورت جانە تۋريزم مينيسترلىگى ءۇش، رىباكينانىڭ ءوزى ءتورت قايتارا قايرىلۋ جاساپ، «دەنساۋلىعىنىڭ كەنەت سىر بەرگەنىن» ايتىپ اقتالسا دا، قازاق قوعامى، قازاقستان قوعامى ەلەنا رىباكينانىڭ بۇل ۋاجدەرىنە سەنىمسىزدىك بىلدىرۋدە. بۇل تۋرالى «رىباكينا ءبىزدى «لاقتىرىپ كەتتى»: رەسەي سپورتشىسىنا كەرەگى - قازاقتىڭ اقشاسى!» اتتى Abai.kz ماقالاسىندا ەگجەي-تەگجەيلى جازدىق.
![](https://abai.kz/content/uploads/2024/07/ekr-1-1024x924.jpg)
سۋرەت: Abai.kz سكرينى
دەسە دە، رىباكينا كىم، ول قازاقستان ازاماتتىعىن قاشان، قانداي ماقساتتى الدى دەگەن ساۋالدارعا جاۋاپ ىزدەي وتىرىپ، مىناداي ماقالاعا تاپ كەلدىك.
وليمپياداعا بارماعان رىباكينا اقش-تاعى اقشالى تۋرنيرگە قاتىسپاق!
اعىلشىن ءتىلدى «tennis.com» سايتى: «ەلەنا رىباكينا پاريج وليمپياداسىنان باس تارتتى، كارولين گارسيا ەندى ءبىرىنشى ورىنعا شىقتى» اتتى ماقالا جاريالاپتى.
![](https://abai.kz/content/uploads/2024/07/er-k.jpg)
سۋرەت: tennis.com سايتىنان سكرين
ماقالادا: ەلەنا رىباكينانىڭ پاريج وليمپياداسمىنىڭ جەرەبەسى تارتىلعاننان كەيىن جارىستان باس تارتقانى، حالىقارالىق تەننيس فەدەراتسياسى مەن قازاقستان تەننيس فەدەراتسياسىنىڭ تۇسىندىرمەلەرى ءھام رىباكينانىڭ ءوز اقتالۋى جايلى قىسقاشا بايانداي كەلىپ:
«25 جاستاعى تەننيسشى سوڭعى رەت «ۋيمبلدون» تۋرنيرىنە قاتىسىپ، جارتىلاي فينالدا اقىرعى چەمپيون باربورا كرەيچيكوۆاعا جەڭىلىپ قالدى.
ەندى رىباكينانىڭ نازارى سولتۇستىك امەريكاداعى حارد تۋرنيرلەرىنە اۋىپ وتىر. ول 6 تامىزدا تورونتودا رودجەرس ۇسىنعان National Bank Open تۋرنيرىندە باق سىنايدى دەپ وسپارلانعان»، - دەپ جازدى.
وليمپيادا اقشاسى رىباكينا ءۇشىن بولار-بولماس تيىن-تەبەن!
ەلەنا نامىس ەمەس، اقشا ءۇشىن جۇرگەن جان. داۋرەنىنىڭ بارىندا ءھام قولى ءجۇرىپ تۇرعاندا تەك ميلليوندىق ءباسى بار دودالارعا عانا اش قاسقىرداي جالاڭدايدى. قازاقستان تولقۇجاتى وعان تەك رەسەيلىك سپورتشىلارعا ۇلكەن تەننيستىڭ جولى جابىلعان شاقتا عانا كەرەك بولدى. قوعام پىكىرى قازىر وسى.
ولاي دەمەسكە لاجى جوق. الگىندە عانا «اۋىرىپ، ۇشاققا مىنۋدەن قالعان»، سونى سىلتاۋ ەتىپ، وليمپياداعا بارماي قويعان ەلەنا رىباكينانىڭ اقش-تاعى اقشالى تۋرنيرگە قاتىساتىنى تۋرالى باق جازدى. وسىدان سوڭ رىباكينا ءىرى قوماقتى قارجى ءباسى تىگىلگەن جارىستارعا قازاق ەلى اتاۋىن كوز قىلۋ ءۇشىن قاجەت ەتتى دەگەن ويدىڭ شىندىق ەكەنىن اڭعارامىز.
ەندى كەلىپ، ودان قازاقتىڭ جىرتىسىن جىرتپادىڭ دەپ سويلەۋدىڭ ءوزى اۋىزدى بوسقا اۋىرتقاندىق. وعان ەلىمىز ەمەس، ەلىمىزدىڭ اتىنان قاتىسىپ پايدا تابۋ عانا كەرەك ەدى. وليمپيادادان تۇسەتىن اقشا ول ءۇشىن قايىرشىعا بەرگەن تيىن-تەبەن ەسەپتى.
«وليمپيادا قورى، بارلىعى 50 مىڭ، ال اقش-تاعى فينال وليمپيادادان كەيىن باستالادى. «Open US»، 1.5 ميلليون. ەندى ءبارى تۇسىنىكتى بولدى، بيزنەسمەندەر اقشا ءۇشىن بارلىعىنا دايىن. وليمپيادادا 2,3 التىن الۋ وتە قيىن ەكەنىن ءبارىمىز دە تۇسىنەمىز. ەلەنا التىنعا شىنايى ۇمىتكەر بولدى. بىراق ول ءۇمىتتى اقتامادى. رەسەي فەدەراتسياسىندا وعان ەشكىم سەنبەگەن كەزدە قازاقستان وعان قانشا قاراجات سالدى؟!»، - دەيدى قازاق قوعامى...
Abai.kz