قازاقستان ءسىم باسشىلىعى ەلىمىزدەگى بەلارۋستىڭ توتەنشە جانە وكىلەتتى ەلشىسىن مينيسترلىككە شاقىرىپ، ەسكەرتۋ جاسادى، - دەپ جازادى Mezgil.kz اقپاراتتىق پورتالى. 

بۇل اقپارات قر ءسىم سايتىندا 21 تامىزدا كەشكە قاراي جاريالاندى. بۇنداي جاريالانىم جاساۋعا سەبەپ تە جوق ەمەس.

بەلارۋستىڭ قازاقستانداعى ەلشىسى – پاۆەل ۋتيۋپين دەيتىن ادام. مينيستر مۇرات نۇرتىلەۋ وسى ءۋتيۋپيندى شاقىرىپ رەسەي-ۋكراينا اراسىنداعى سوعىسقا قاتىستى قازاقستاننىڭ ءوز ۇستانىمى بار ەكەنىن ءبىلدىردى.

«مينيستر قازاقستان بۇۇ جارعىسىنا جانە حالىقارالىق قۇقىقتىڭ نەگىزىن قالاۋشى نورمالارىنا سايكەس تەڭگەرىمدى جانە بەيبىتشىل سىرتقى ساياسات جۇرگىزىپ جاتقانىن ەرەكشە اتاپ ءوتتى. ەلىمىز مەملەكەتتەر اراسىنداعى بارلىق كەلىسپەۋشىلىكتەر ساياسي جانە ديپلوماتيالىق جولدارمەن شەشىلۋى ءتيىس ەكەنىنە نىق سەنىمدى.

قازىرگى گەوساياسي جاعدايدا مەملەكەت باسشىسى جۇرگىزىپ جاتقان ەلىمىزدىڭ سىرتقى ساياسي باعىتى ءوزىنىڭ تيىمدىلىگىن كورسەتتى. وسىعان بايلانىستى مينيستر بەلارۋس تاراپىن قازىرگى پروتسەستەرگە قاتىستى استانانىڭ ۇستانىمىن وبەكتيۆتى باعالاۋعا شاقىردى»، - دەلىنگەن ءسىم حابارلاماسىندا.

(سۋرەت قر ءسىم حابارلاماسىنىڭ سكرينى)

قازاقستان ءسىم-ءىنىڭ بەلارۋس ەلشىسىن الدىرتىپ، ەسكەرتۋ جاساۋىنا بەلارۋس باسشىسى الەكساندر لۋكاشەنكونىڭ رەسەي جانە بەلارۋس تەلەارنالارىنا بەرگەن سۇحباتى، سۇحبات بارىسىندا قازاقستاننىڭ ساياسي ۇستانىمىن ءسوز ەتۋى سەبەپ بولعان.

لۋكاشەنكو نە دەدى؟

الەكساندر لۋكاشەنكو 20 تامىزدا «روسسيا» تەلەارناسىندا جاريالانعان سۇحباتىندا: «ءبىز كەيبىر پوستكەڭەستىك مەملەكەتتەر سياقتى تۇلكىبۇلاڭ ساياسات ۇستانا المايمىز. ولار رەسەيدەن بىردەڭە العىسى كەلەدى. بىراق ونىڭ ورنىنا ەشتەڭە بەرمەيدى. ولاي بولمايدى. بىرگە بولايىق!

رەسەيگە كەلىپ، قولداۋ مەن كومەك سۇراعان ۋاقىتتان كوپ ۇزاعان جوقپىز. مىسالى،  قازاقستاندا ءبىر وقيعا بولدى (2022  جىلعى قاڭتارداعى قايعىلى وقيعالاردى، سول كەزدە ەلگە ۇقشۇ كۇشتەرىنىڭ كىرگىزىلگەنىن مەڭزەپ وتىر - رەداكتسيا). قازاقستان كىمنەن كومەك سۇرادى؟ قىتايدان با، ءۇندىستاننان با؟ الدە پاكىستاننان با؟ جوق! «پۋتين، لۋكاشەنكو، كومەكتەسىڭىز»، - دەدى. سونان سوڭ، تۇسكە دەيىن-اق، ءبىزدىڭ ۇشاقتار قازاقستانعا قوندى. ءسويتىپ ءبارى تىنىشتالدى»، - دەگەن ەدى.

(سۋرەت: ا.لۋكاشەنكو / sputnik.by)

لۋكاشەنكوعا ارمەنيا دا وكپەلى

لۋكاشەنكونىڭ سۇحباتى قازاقتاردى عانا شاماندىرعان جوق. بەلارۋس پرەزيدەنتى اۋزى كوپىرىپ سويلەپ وتىرىپ، ارمەنيانىڭ دا سىرتقى ساياساتتاعى ۇستانىمىن سىناعان ەدى. ءسوزسىز، ەرەۆان لۋكاشەنكونىڭ مۇنىسىنا نەگاتيۆتى رەاكتسيا ءبىلدىردى.

لۋكاشەنكو: «ارمياندار بىزدەن باسقا كىمگە كەرەك؟ ەشكىمگە!»، - دەپ سويلەگەن. وسىدان سوڭ، ەرەۆان جۇرتى بەلارۋس ەلشىلىگىن جۇمىرتقا، قىزاناق جانە كارتوپپەن اتقىلاپ، نارازىلىققا شىقتى. نارازىلىقتى ارمەنياداعى «رەسپۋبليكا ءۇشىن» پارتياسى ۇيىمداستىرعان.

ءتۇيىن. قازاقستان رەسەيدىڭ ۋكرايناعا قارسى باسقىنشىلىق سوعىسىن قولدامايدى. رەسەي ۋكراينادان وككۋپاتسيالاپ العان، بۇۇ-دا مويىندالماعان اۋماقتاردى قازاقستان دا مويىندامايدى! قازاقستاننىڭ پوزيتسياسى – مەملەكەتتەردىڭ تەرريتوريالىق تۇتاستىعى بۇزىلماۋى كەرەك! وسى پرينتسيپكە سايكەس، قازاقستان ءسىم-ءى رەسەيدىڭ كۋرسكى وبلىسىنداعى جاعداي بويىنشا دا ءوز ۇستانىمىن جاريالاعان بولاتىن.

Abai.kz